MANIFESTACIÓN ESCONTRA’L PARU Y LA PRECARIEDÁ - Xixón 30/10/2014
Uge: “Queremos un trabayu dignu n’Asturies y nun colar de la nuesa tierra“
L’Asamblea de Paraes y Precarios d’Asturies convocó una manifestación peles cais de Xixón esti xueves 30 d’ochobre. Unos cientos de persones percorrieron la ciudá asturiana vindicando meyores nes polítiques d’emplegu, un repartu del trabayu y renta básica ente otres custiones. La forciada emigración de gran parte de la mocedá asturiano foi ún de los temes más sentíos nos glayíos de los manifestantes. ALDERIQUES D’ASTURIES: Tais organizando esta manifestación porque la mocedá tien un futuru enforma complicáu, ¿non? UGE: Sí, paez qu’últimamente nun alcontramos trabayu tampocu se mos dexa estudiar, quítennoslo tou. Hai xente que pue emigrar pero nun queremos éso. Nós lo que queremos ye un trabayu con drechos n’Asturies, quedanos na nuesa tierra y vivir equí.
AL: Tuvistis otra aición que foi na Estación d’Autobuses en Xixón cola puesta d’un cartelu col llema “La Xeneración Alsa”, ¿un alcuñu mui significativu? UGE: Sí, hebo una “Xeneración Alsa” fai tiempu que foi una xente xoven que tuvo de colar fuera, naquella época foi España’l so destín, pero agora ye verdá que se marcha p’Alemaña y pa otros llaos. Al final ye lo mesmu. Nun queremos ser otra xeneración d’éses. Foi un actu más pa convocar la manifestación y ye una de les maneres que discurrimos pa pelear, pa salir a la cai y protestar.
AL: La clas política mira pa otru lláu y diz que ye lo “normal” pa formase dir fuera pero’l problema ye cuando se fai obligáu, ¿nun ye asina? UGE: Eso ye otra cosa, que tu decidas marchar fuera pa formate, llueu retornar, trabayar meyor y tener deprendíu más. Lo que pasa agora ye que nos formamos equí pero prepárennos pa trabayar n’Europa amás en precariu. Equí ye imposible trabayar y ellí atopamos trabayu precariu, marchando obligaos, nun por voluntá propia. Lo que queremos ye quedanos equí. Hai una chavalina que cuela agora p’Alemaña y va obligada.
AL: ¿Cómo se suma la mocedá a les vueses vindicaciones? UGE: Ye un pocu difícil llegar a la xente mozo. Ye más cenciello llegar a la xente mayor que tien más vezu nestes lluches. A la xente xoven paez que se nos acostumbró a nun pelear, a quedanos en casa, ver la tele y tragar con tou que yá vendrá meyor, demientres los nuesos pás ayúdenos….pero non. Supongo qu’entamarán a espertar pocu a pocu porque ven que nun tienen futuru ellos tampocu. AL: A esta situación hai que suma-y tola corrupción que ye endémica. N’Asturies el casu Fernández Villa, n’España otros casos. Esos políticos que dicen qu’hai qu’emigrar tan garrando tou pal bolsu……… UGE: Lo que faen ye lo fácil. Siempres foi asina, quédense les perres y nós que nos comamos la mierda demientres ellos viven bien y tranquilos.