Nos Historia den Moveshon by Biblioteka Nashonal Korsou

Nos historia den moveshon! E Korona di Triunfo, Logro i Perseveransia

Marilyn

Outornan:

Herta

Marilyn Alcalá-Wallé Herta Parabirsing-Balentina Nidia Rosaria-Wallé

Nidia

Willemstad, Curaçao yüni 2021

KOLOFON Nos historia den moveshon! E Korona di Triunfo, Logro i Perseveransia. ISBN 978-99904-5-293-8 Promé edishon: yüni 2021 Outornan: Marilyn Alcalá-Wallé, Herta Parabirsing-Balentina, Nidia Rosaria-Wallé Redakshon: Marilyn Alcalá-Wallé, Herta Parabirsing-Balentina, Nidia Rosaria-Wallé Diseño gráfiko: Herta Parabirsing-Balentina Imprenta: Tramm Imaging Solutions Fotografia: Angelica Abath-Delgado, Marilyn Alcalá-Wallé, Jesus C. Lopez, Herta Parabirsing-Balentina, Tico Vos Un danki speshal na: Gerardo (Dito) Abbad, Giovanni Abath (7.1), Jessica Damon, Charles do Rego, Venancio (Pacheco) Domacassé, Sergio (Gino) Everon, Fransisco (Shon Pau) Paulina, Sonia Simon-Franco, Lizette Sambo-Velder i kolaboradornan di Ministerio di Enseñansa, Siensia, Kultura i Deporte Tur derecho reservá. Sin pèrmit riba papel di e outornan, no por reprodusí, fotokopiá, i tampoko multipliká di ningun otra forma nada di e buki aki, a ménos ku esei sosodé konforme derecho di outor. Alle rechten voorbehouden. Zonder schriftelijk toestemming van de schrijvers mag niets uit deze uitgave worden gereproduceerd, gefotokopieerd of op enige andere wijze worden verveelvoudigd, tenzij dit geschiedt conform de auteurswet. All rights reserved. Without permission of the autor no part of this book may be reproduced, fotocopied, nor multiplied by any other means, except as provided by the copywrite laws.

Historia tras di realisashon di un protekshon pa nos Bandera Nashonal i nifikashon di e eskudonan ku ta forma parti di e protekshon:

Un bandera bon protehá i respetá!

Kontenido 1. Introdukshon 2. Importansha di un bandera 3. Historia di nos Bandera 4. Motivashon i Preparashon pa un protekshon 5. E eskoho 6. Konstrukshon i Instalashon 7. E Korona i e símbolonan riba e Korona 8. Splikashon i Presentashon 9. Inougurashon i Konklushon 10. Fuentenan

Anekso: Himno di Kòrsou

1. Introdukshon Por fin e buki tan sperá tokante nos bandera i e Korona pa protehá e bandera di Kòrsou a mira lus di dia. Direktamente despues di mi instalashon komo Minister di Enseñansa, Siensia, Kultura i Deporte di Kòrsou, mi a pone komo un di mi prioridatnan pa riba tereno di Kultura, pa duna kontenido konkreto na e palabrashon den e Akuerdo di Gobernashon: ‘Realisando e Máksimo Potensial di Kòrsou’ (mei 2017). Den e Akuerdo menshoná a pone énfasis riba un ‘Kultura di Union den Diversidat’ pa aksentuá ku den tur e diferensianan di rasa, oriundo, kreensia i kustumbernan, nos por kapitalisá i deskubrí kon riku nos ta huntu komo un komunidat. Komo pueblo nos tin algun símbolo nashonal ku ta identifiká nos mes komo e Kurasoleño. Nos bandera ta un di e semáforonan importante ku ta uni nos. E bandera tin su nifikashon i nos a kana un proseso pa yega na nos mes bandera nashonal! Un bandera pues ta un fuente di identifikashon masha importante i nos mester respet’é i proteh’é mas mihó posibel. Esei a pone ku un di mi prioridatnan durante mi periodo di gobernashon tabata pa laga traha un protekshon, un Korona rondó di e bandera, kaminda komo nashon nos ta despleg’é formalmente. Esta Plasa Brion. Un di e kondishonnan ku e Korona mester a reflehá ta algu profundo ku ta uni nos komo komunidat. Esaki a resultá finalmente den identifikashon di algun momento den historia ku ta inegabel komo Kurasoleño, kaminda nos pueblo durante siglonan a pasa den un proseso ku nos i nos ansestronan a eksperensiá momentonan inolvidabel i remarkabel. Pues e historia ta den moveshon i esaki nos ta mira bèk den e eskudonan i símbolonan riba e Korona, ku a haña e nòmber di Nos historia den moveshon! E Korona di Triunfo, Logro i Perseveransia. 6

E historia menshoná ta fuente importante pa ekspresá fundeshi di nos kultura. Kisas tin hende ta puntra kiko nos tin ku komprondé bou di kultura. Pa fasilidat i uniformidat den definishon, e buki aki ta mantené e definishon di UNESCO, ku ta indiká ku kultura por ser konsiderá komo: E konhunto di e rasgonan distintivo, spiritual i material, intelektual i afektivo, ku ta karakterisá un sosiedat òf un grupo sosial. Kultura no ta limitá na solamente arte i literatura, pero e ta tambe estilo di bida, sistema di biba i kompartí huntu, balornan komun, tradishon i kreensia. Kultura ta hunga un ròl importante den kada sosiedat rònt mundu i ta influenshá diferente faseta den nos bida, tantu den nos tempu liber komo nos bida profeshonal! E ròl di kultura den desaroyo di kada pais mester wòrdu rekonosé, preservá i respetá dor di un i tur. Kultura ta base pa desaroyo di un komunidat. E ta un instrumento importante pa konstrukshon i edifikashon di un pais. Nos komunidat konosé un historia kultural tangibel i intangibel, ku ta hasi di nos kultura i nos komunidat un mosaiko kolorido, diverso i riku. E buki ‘Nos historia den moveshon. E Korona di Triunfo, Logro i Perseveransia’ tin komo meta pa duna nos komunidat mas informashon tokante nos bandera, e motivashon i preparashon pa yega na un Korona rondó di e bandera i e historia ku e obra ta konta nos. E buki aki no tabata posibel sin trabounan intensivo di Sra. Herta Parabirsing-Balentina (un tremendo motor) i Sra. Nidia Rosaria-Wallé (ku un abilidat pa presishon i dokumentashon inkreibel) ku huntu ku mi persona a traha lunanan pa realisá e soño aki. Mi ta sumamente satisfecho ku despues ku komunidat durante hopi aña tabata solisitá un protekshon rondó di nos bandera riba Plasa Brion, ami mes a tuma e inisiativa huntu ku mi ekipo di sosten, pa traha i move tur baranka den kaminda pa por realisá e soño aki. Un danki speshal alabes ta bai na tur ku a kontribuí signifikantemente den realisashon di e proyekto aki den e tempu stipulá di un aña!! Un trabou di kita sombré!!

Èks-minister di Enseñansa, Siensia, Kultura i Deporte di Kòrsou Drs. Marilyn Alcalá-Wallé

2. Importansha di un bandera Mundialmente nos ta nota ku tur pais tin nan mes bandera. Un bandera nashonal no ta djis un opheto ku ta kologá den laira. Un bandera nashonal ta un símbolo esensial i importante pa un pais. Un bandera nashonal ta simbolisá e outoridat i poder ku un nashon tin i alabes ta sirbi komo e semáforo di union, orguyo i pas den un pais. No ta un obligashon pa un pais tin su propio bandera. Pero sí ta asina ku un bandera di un pais por fungi komo simbolisashon i representashon di un pais. Eksistensia i funshon di un bandera ta fundamental pa representá un pais internashonalmente i nashonalmente . Internashonalmente nos bandera ta fungi komo un punto di rekonosimentu di nos pais i ta distinguí nos pais for di un otro pais. Asina un bandera bai laira, un otro pais por identifiká ta kua pueblo e ta representá. Hopi bandera den pasado a wòrdu diseñá komo un instrumento di rekonosimentu durante guera. Durante guera hopi biaha sòldatnan tabatin problema pa rekonosé na kua grupo nan tabata pertenesé, dor ku durante bataya e medio ambiente tabata kontaminá ku stòf i otro opheto i gruponan tabata ménos bon visibel. Ora e sòldatnan tabata wak ariba, nan por a distinguí bandera di nan pais wayando, i por a reagrupá ku nan kompatriotanan. Kada bandera tin su mes historia. Kada pais mes ta determiná di kua forma e ke wòrdu rekonosé den eksterior i dor di otro paisnan den mundu a base di e komposishon di su bandera. Un bandera por ta e.o. simbolisá un suseso importante di un pais, e pais mes, òf por pinta un potrèt di pasado di un pais. Por ehèmpel e bandera Merikano te ainda tin 13 strepi kòrá i blanku, nifikando e 13 kolonianan original di e pais. E bandera di Oustralia por ehèmpel tin un huki na

man robes ku e bandera Britániko pa mustra e konekshon di e Reino Unido (British Commonwealth). Nashonalmente e bandera ta un di e símbolonan ku un pueblo ta identifiká su mes kuné fuertemente. Nos bandera ta e semáforo di union, diversidat i di identidat di pueblo di Kòrsou. E bandera ta duna e sentido di nashonalismo, patriotismo i shovinismo. E bandera di Kòrsou no solamente ta fungi komo símbolo di union, pero tambe di emansipashon, libertat, speransa i inspirashon pa nos nashon! Un bandera tin multiple uso i ta fungi komo e símbolo di union i rekonosimentu na diferente okashon. Ora un bandera ta wòrdu hisá òf e ta kologá, e ta duna hende e sentido di rekonosimentu i konekshon ku otro. Na diferente pais, inkluyendo Kòrsou, ta hasi bon uso di e bandera na okashonnan speshal manera eventonan grandi di un pais, durante deporte, durante evento kultural i na apertura i serada di un siman eskolar. E momento supremo na Kòrsou sinembargo ta keda 1 di yüli anualmente kaminda ofisialmente ta baha e bandera, pa riba 2 di yüli hisa e bandera di un forma respetuoso i solèm, despues ku Parlamento tene su reunion krepúskulo i solèm. No ta solamente na aktividatnan plasentero ta hasi uso di e bandera. Durante entiero tambe ta hasi uso di nos bandera kaminda ta kologá e bandera ‘halve stok’ pa indiká ku un hende a bai sosegá. Na okashon ta kubri e kaha di morto tambe ku e bandera komo forma di rèspèt, prinsipalmente si e persona a nifiká hopi pa e pais. Pues e bandera no ta wòrdu eksperensiá solamente komo e símbolo nashonal pero tambe ta wòrdu usá komo un íkono kultural (morto i entiero den seno familiar). Na hopi okashon un bandera ta nase na momento ku un pais ta wòrdu (re)formá, ora e ta optené un otro status (por ehèmpel outónomo), òf despues di (un lucha pa) independensia. E ta un símbolo nashonal ku nifikashon mesun profundo ku un eskudo i un himno di un pais. Un bandera, mayoria biaha, manera ya a ser menshoná, den forma apstrakto ta konta historia di un pais òf a lo ménos ta referí na algu sumamente fundamental! Pero e pregunta kardinal ta: Kon nos komunidat a yega na un bandera i un diseño pa un propio bandera? Di kon Kòrsou a skohe pa un propio bandera? Di kon a skohe e fecha 2 di yüli 1984 pa hisa nos propio bandera? E siguiente kapítulo ta elaborá riba e preguntanan ariba menshoná. 9

3. Historia di nos Bandera Historia di un pueblo i prinsipalmente historia di susesonan remarkabel, ta masha importante pa un komunidat por reflehá riba kon ta yega na sierto desishonnan, den kua ambiente esaki ta tuma lugá i bou di kua kondishon. E historia pa yega na un propio bandera ta unu sumamente interesante. Manera diferente pais mundialmente ta hasi, sea nan gobièrnu ta skohe un bandera òf ta habri e oportunidat pa e komunidat por partisipá na diseño di su propio bandera. Den kaso di Kòrsou a tuma un trayekto di aproksimadamente ocho (8) aña pa nos a konosé nos mes bandera nashonal. Segun informashon optené di Sr. Venancio B. “Pacheco” Domacassé, ku ta un di e motornan importante i for di prinsipio komprometé den realisashon di e bandera di Kòrsou, a lanta un nesesidat despues di 30 di mei 1969, pa sigui ku e proseso di emansipashon i trankilisá diferente situashon den komunidat. Tres diputado enkargá ku Enseñansa, Kultura i Deporte durante nan periodo di gobernashon tabatin e enkargo pa realisá e proyekto di nos Bandera, konsekutivamente Sr. Frank Rozendal, Sr. Winston Lourens, i Sr. Wilfrido Franco. 2 di yüli 1984 Kòrsou a yega na e kulminashon ora Gobièrnu di Kòrsou a hisa e bandera pa promé biaha riba Plasa Brion na Awasa, Otrobanda. Promé ku esei a toka honor na sr. Wilfrido Marcolino “Willy” Franco (*24-01-1937 - †25-06-1987) den Konseho Insular pa anunsiá e desishon di Gobièrnu di Kòrsou pa riba e fecha menshoná en adelante, Kòrsou tin su propio Dia di Himno i Bandera. Un pasashi di e momento supremo sitando sr. Franco den Konseho Insular: “……..den e espíritu di emansipashon di nos pueblo, Gobièrnu di Kòrsou a disidí ku awor en adelante 2 di yüli ta e Dia di Himno i Bandera. Riba e Dia di Himno i Bandera nos mester uni i pensa huntu riba progreso di nos isla i nos hendenan. Laga nos komo Konseho Insular di Kòrsou duna nos kontribushon proklamando unánimamente nos bandera komo símbolo di nos union.” Por kanta himno sin 10

bandera, pero e bandera ta duna e realse. Ora ta kanta himno den presensia di bandera e protokòl ta preskribí ku tin ku para ku e mannan largu kontra di kurpa i wak e bandera. Hende hòmber mester kita pèchi òf sombré. Promé ku a yega asina leu tabatin hinter un proseso pa yega na e bandera di Kòrsou, ku ta un bandera blou (kolor di Panton 280), ku un strepi hel (kolor di Panton 102) i dos strea (kolor blanku) ariba na man robes kaminda ta hisa e bandera, un chikitu i un mas grandi. E kolor blou ta para pa e lealtat di nos pueblo. E kolor blou riba e strepi hel ta simbolisá nos shelu blou. E blou bou di e strepi hel ta simbolisá nos laman blou kristalino. E strepi hel ta pará pa e solo ku ta bria riba Kòrsou, ta alegrá nos, ta mustra e kalor i yovialidat ku nos ta radia. E strea grandi ta simbolisá Kòrsou i esun chikitu ‘Klein Curaçao’. E streanan tin 5 punta, indikando ku e komunidat di Kòrsou ta oriundo di 5 kontinente. E kolor blanku por lo demas ta para pa pas i felisidat pasombra e komunidat a bin den pas pa buska su felisidat i tur nashonalidat aki ta biba den pas ku otro. Pa a yega na e diseño di e bandera di Kòrsou, Gobièrnu a instalá un Komishon di Bandera, presidí pa Sr. Venancio (Pacheco) Domacassé. A tene un kompetensia, ku a resultá den 1782 proposishon. E Komishon di Bandera a skohe dies diseño husgando kada unu riba nan mérito. E diseño ku a hasi mas impakto i ku a wòrdu skohé a bin for di man di Sr. Martin den Dulk, ku e tempu ei tabatin 20 aña di edat. Segun e komishon Sr. den Dulk no a solamente skohe un diseño ku ta rekonosibel pa e isla, pero alabes a skohe pa un símbolo simpel di manera ku un mucha tambe por pint’é sin muchu difikultat. Gobièrnu di Kòrsou, riba rekomendashon di e Komishon di Bandera bou di presidensia di sr. Pacheco Domacassé, na 1984 a skohe konsientemente pa permanentemente hisa nos bandera na Plasa Brion òf Awasá. Esaki pa diferente motibu: 1. E sitio ta sentral i asesibel pa hinter komunidat; 2. E ta den serkania di e sentro gobernamental (e.o. Fort Amsterdam kaminda Gobernador i gobièrnu ta ubiká i serka di Stadhuis/Parlamento i komunidat por yega fasilmente; 11

3. E infrastruktura ta ideal i espasioso i por akapará un multitut sin difikultat; 4. Plasa Brion histórikamente i tradishonalmente ta un sitio kaminda semper a tuma lugá manifestashonnan kultural popular, por ehèmpel, bendishon di nos komunidat dor di Obispo di Willemstad pa añanan largu; 5. Komunidat di Kòrsou den e epoká di añanan ochtenta tabata den un estado total di euforia i emoshon ku por fin e ta bai haña su propio bandera i tabata un orguyo pa e bandera waya na entrada di nos haf Santa Ana, kaminda mundialmente tur hende ku drenta nos haf por a sera konosí inmediatamente ku nos bandera. Riba e imágennan anekso, por haña un bista di e promé okashon na 1984 ora e bandera di Kòrsou a bai laira riba Áwasa. Den e époka aki, e sitio pa hisa e bandera tabata direktamente banda di pia di brùg na Otrabanda. Den fondo por mira un hotèl den Punda banda di Fort Amsterdam.

Fuente: Archivo Nashonal Kòrsou

Pueblo di Kòrsou tabata den un estado di ékstasis, un situashon di plenitut máksimo ya ku nos himno, (referensia: página 56), nos propio idioma i awor nos bandera tabata un realidat. Nan tres ta wòrdu konsiderá e símbolonan prinsipal di identifikashon di un Fuente: Archivo Nashonal Kòrsou pais. E lema tabata tur kaminda: ‘Kòrsou, un pueblo, un bandera.’ E promé selebrashon di nos bandera riba Plasa Brion no a laga duda di e felisidat di pueblo di Kòrsou. Riba e foto por disfrutá di e momento ku Gezaghebber Ronald A. Casseres na 1984 ta duna man na Diputado Willy Franco pa e trabounan realisá pa yega na un propio bandera den presensia di diferente otro mandatario i dignitario. Tur e trabounan pa yega na nos propio bandera no tabata posibel sin e esfuerso inkansabel di e komishon di bandera bou di presidensia di sr. Pacheco Domacassé. Riba e imágen por apresiá Sr. Domacassé riba 2 di yüli na Áwasa flankeá pa dos representante di beyesa lokal na 1984.

Fuente: Archivo Nashonal Kòrsou

E fecha di 2 di yüli a wòrdu skohé, pa e echo ku riba e mesun dia aki na aña 1951 Konseho Insular di Kòrsou a reuní pa promé biaha bou di e areglo di ERNA. ERNA (Eilandenregeling Nederlandse Antillen) tabata un areglo konstitushonal di 3 di mart 1951 ku a fiha e outonomia di 13

e teritorionan insular den Antia Hulandes, kuater aña promé ku e Areglo di Estado di Antia Hulandes a drenta na vigor i ku a keda vigente te 10 di òktober 2010. Promé ku Kòrsou a optené e Status di Pais den Reino riba 10 di òktober 2010, riba inisiativa di diputado di e.o. Kultura, sra. Marilyn Alcalá-Wallé den konsulta ku e órganonan gobernamental relevante, riba 23 di yüni 2010, e desishon a wòrdu tumá den Kolegio Ehekutivo (Bestuurscollege) ku na momento di optené e status di Pais Outónomo den Reino Hulandes, e mesun bandera ta keda konta pa pais Korsou1. Un pasashi for di e petishon ku Diputado AlcaláWallé a dirigí na Bestuurscollege dia 21 di yüni 2010: “ Op weg naar het nieuwe land Curaçao wil ik het college verzoeken om de beslissing te nemen om onze nationale vlag te handhaven in het nieuwe land Curaçao. Dit betekent dat de vlag van Curaçao één op één overgaat naar het nieuwe land Curaçao, waarbij de blauwe kleur (ultamarine (pantone 280) en de gele kleur (pantone 102) aanghouden wordt.” Kolegio Ehekutivo di Kòrsou unanimamente a bai di akuerdo riba djarason 23 di yüni 2010 pa mantené e mesun bandera di Kòrsou den e Kòrsou outónomo den Reino! Kòrsou ta un pais outónomo den Reino. E tres paisnan Karibense den Reino Hulandes tin un Gobernador ku ta e outoridat máksimo ku ta e.o. representá e Rei. E Gobernador tin su propio bandera di distinshon ku ta wòrdu aprobá pa dekreto di Reino Hulandes. Ántes e bandera tabatin Bandera di distinshon di e símbolo di e bandera di Antias Neerlandes; e ta Gobernador promé ku 101010 representá e bandera di Reino Hulandes i e bandera di e pais konserní. Entrante 101010 esei ta enserá ku pa e futuro gobernador di e.o. Kòrsou tambe a realisá un kambio den su bandera. Tal desishon a wòrdu tumá dor di e Konseho Ehekutivo di Kòrsou di e tempu ei, riba 23 di yuni 20102, pa despues el a wòrdu aprobá dor di Gobièrnu di Bandera di distinshon di Gobernador entrante 101010 Reino Hulandes. 1

BC-besluit 2010/36965 Handhaven van de nationale vlag in het nieuwe land Curacao

BC-besluit 2010/34456 Aanbieding ontwerp onderscheidingsvlag

4. Motivashon i Preparashon pa yega na un korona E kapítulo aki ta elaborá riba e motivashon pa yega na un protekshon rondó di nos bandera i kon e proseso a kana pa realisá e protekshon den un aña di tempu. Un proyekto ku a kana ku e preshon nesesario, i ku a wòrdu realisá segun e tempu indiká. E produkto final ta e presiosidat ‘Nos historia den moveshon! E Korona di Triunfo, Logro i Perseveransia’ ku a wòrdu inougurá riba dia 2 di yüli 2018, riba Plasa Brion na Otrobanda. E ta un obra úniko ku un nifikashon profundo. Nos bandera ta representá nos nashon. Nos nashon konosé un historia for di tempu di Indjan Arowak, di e tribu Caiquetio, te ku awe ku Kòrsou tin e status outónomo den Reino Hulandes. Durante siglonan tabatin diferente momentonan históriko den desaroyo di nos pais i susesonan remarkabel den nos trayekto di emansipashon. Esaki nos ta mira bèk den e eskudonan i símbolonan den e Korona di e bandera. Mas despues den e buki ta duna un deskripshon di e eskudonan. Kua tabata e motivashon pa yega na e Korona menshoná? Nos bandera ta nos semáforo, nos símbolo di union di un pueblo, e símbolo di patriotismo, di dignidat i di nos orguyo komo Kurasoleño. Anualmente riba 1 i 2 di yüli nos ta baha i hisa nos bandera riba Brionplein ku tur rèspèt, i protokòl nesesario pa selebrá e echo ku nos tin nos propio bandera. Durante otro okashonnan sinembargo, pueblo ta nota ku un parti chikitu di pueblo, ta falta e rèspèt nesesario pa e bandera. Asina por ehèmpel, tabata sinta kome riba e pedestal, laga resto di kuminda i diferente tipo di shushi atras, i durante eventonan tabata falta ku reglanan di protokòl pa lokual ta trata nos bandera. Komunidat tabata reakshoná fuertemente riba e susesonan aki. Teniendo kuenta ku nos gobièrnu tabatin e empeño pa sigui uni nos nashon i ku esei ta fundamento pa dignidat di un pueblo ku ta respetá su mes, a bin un lus na horizonte na 2017. Na momento ku Marilyn Alcalá-Wallé a asumí e enkargo di Minister di Enseñansa, Siensia, Kultura i Deporte fin di mei 2017, el a fiha algun prioridat riba kada un di e kuater terenonan ku e tabata responsabel p’e. Riba 15

tereno di Kultura un di e prioridatnan tabata Konstrukshon di nos Nashon: konsientisashon ku ta kontribuí na desaroyo di nos mes balornan, ku rèspèt pa nos herensia kultural. Pa duna balor konkreto na e prioridat aki, e Minister huntu ku su kabinete a kuminsá eksplorá e oportunidatnan. Sra. Herta ParabirsingBalentina a wòrdu apuntá komo esun responsabel pa yuda realisá e proyekto di e protekshon rondó di e bandera. Esei a kuminsá den luna di yüni 2017 despues ku e Minister a definí e produkto i su eksigensianan. Via e number atministrativo 2017/025740, fecha 27 di yüli 2017 a traha riba e petishon bou di e nòmber: “Gouden omheining van de Vlag van Curaçao op het Brionplein”, pa kuminsá duna kontenido na e protekshon ku mester a aparesé rondó di e bandera di Kòrsou, Sra. Parabirsing a kuminsá manda e TOR (Terms of Reference) pa diferente kompania potenshal pa duna un oferta pa asina por a yega na un protekshon rondó di e bandera. E eksigensianan pa e adorno/ protekshon tabata entre otro: mester ta 1,5 meter di haltura, ku puntanan rondó di oro na kada staka, mester ta pegá for di e plataforma di fundeshi di e estandarte di e bandera, mester bini un porta meimei pa okashonnan seremonial pa akseso na e mast di e bandera i e mester ta konstruí di material duradero. E eksigensia mayor tabata ku e instalashon di e protekshon rondó di e bandera mester wòrdu realisá pa 1 di yüli 2018! Pues dentro di un aña! Sra. Parabirsing a sòru pa pidi tres oferta den yüli i ougùstùs 2017. Despues ku algun oferta a drenta i Sra. Alcalá-Wallé a studia nan, a tuma e desishon pa formalisá i kanalisá e trayekto mas grandi via di e Servisio di Enseñansa, Siensia, Kultura i Deporte, kaminda Sra. Rosaria-Wallé huntu ku Sra. Parabirsing for di ougùstùs 2017 a keda monitoriá e trayekto di aserka. Sra. Parabirsing a enkabesá e komishon interno pa guia e proseso i bini ku proposishonnan konkreto pa protehá nos bandera di forma duradero. E komishon mesora a traha un plan di ehekushon pa e proyekto mará na fecha ariba menshoná. Un di e promé akshonnan tabata pa hasi inspekshon di e situashon na e pedestal di e bandera riba Plasa Brion.

Momento di promé inspekshon na e pedestal di e bandera na Plasa Brion. Sr. Elmer Marti, Sra. Jessica Damon, Sr. Gerardo (Dito) Abbad i Sr. Fransisco (Shon Pau) Paulina. Sra. Parabirsing a saka e potrèt.

Sr Dito Abbad, ku ta un arkitekto konosí pa su trabounan pa gobièrnu, a keda aserká pa yuda kana e trayekto for di punto di bista profeshonal di arkitektura. I alabes sr. Paulina (Shon Pau), ku ta nos maestro den servisionan protokolario i di bandera. Na febrüari e promé makèt di protekshon di e bandera a subi mesa. E diseño ta riba e imágen. E ta un obra kuadrá blanku ku den realidat mester a bira marmer pretu ku e bandera den sentro. Pa subi i baha e bandera ta hasi uso di un mekanismo fleksibel ku ta move sali i drenta bèk. Sinembargo, e no a karga aprobashon di e Minister. E komishon interno a sigui buska alternativa i na aprel a aserká e artista multitalentoso Giovanni Abath 7.1. ku e petishon di minister pa yega na un protekshon funshonal pa e bandera di Kòrsou riba Plasa Brion. Giovanni Abath a tuma e oferta na konsiderashon i a buska fórmulanan pa por yega na un protekshon ku tin ademas un nifikashon históriko i di emansipashon pa e komunidat di Kòrsou. Den e siguiente kapítulo ta elaborá riba e eskoho i e trabounan relashoná kuné. 17

5. E eskoho Despues di diferente deliberashon tokante e siguiente stapnan ku mester a tuma pa realisá e proyekto di e protekshon rondó di e bandera, e komishon di Korona pa bandera, na nòmber di minister a duna e artista sr . Giovanni Abath e enkargo pa hasi un diseño pa gobièrnu di Kòrsou konforme e eksigensianan ya anteriormente stipulá. Mirando ku tempu tabata pasando i pèrtando miéntras nos ta yegando otro selebrashon di Dia di Himno i Bandera, e komishon a hasi un proposishon pa yega na un solushon di protekshon temporal wardando riba un proposishon mas duradero. Minister no a bai di akuerdo ku esaki, i kier a mira mesora un solushon duradero. E asuntu di buska solushon temporal pa despues buska unu duradero, ta zona manera ora gai ta bai saka djente. Esta unabes esun temporal wòrdu realisá, pa mil i un motibu nunka mas ta traha riba algu duradero. Ora e komishon a aserká Sr. Abath, el a sinti’é mesora honrá pa duna su kontribushon artístiko pa yega na un protekshon pa nos bandera. E tambe ta kompartí e sentimentu ku mester duna mas rèspèt na nos bandera. Durante di su promé enkuentro ku e komishon presedí pa Sra. Parabirsing, Sr. Abath a eksponé un pintura di e konstrukshon profeshonal pa e protekshon ku e tin den mente pa alsa nos bandera. E komishon a keda bastante enkantá ku e promé diseño pa protehá i embeyesé nos bandera. Minister na su turno tambe a wòrdu informá ku tin un proposishon riba mesa, ku ta kuadra ku e liña di pensamentu di un protekshon digno pa nos bandera. Den e siguiente imágen por haña un idea di e proposishon.

Imágen di e proposishon ku Sr. Abath a presentá durante su promé enkuentro ku komishon.

Den e promé siman di mei, minister huntu ku Konseho di Minister, despues di presentashon di e idea, a bai di akuerdo pa Sr. Abath risibí e enkargo pa traha rápidamente riba un Korona ku 10 eskudo/símbolo pa realisá e protekshon promé ku 1 di yüli 2018. Despues a sigui mas presentashon i deliberashon entre Sr. Abath, e komishon i minister. Huntu ku e komishon a proponé algun ahuste, manera e forma di e korona i tambe kontenido di e eskudonan/símbolonan. Despues a sigui diferente seshon tokante e profundidat i nifikashon di e protekshon pa nos pais i su nifikashon den konteksto di representashon di nos bandera i nos pais. E deliberashonnan a kondusí na mas kambio riba e símbolonan, pa motibu ku tabatin dos koriente presente i partisipashon di ámbos tabata importante pa yega na algu ku huntu nos ta karga. Un koriente kier a pone e enfoke riba e trayekto emansipatorio i e otro koriente kier a duna atenshon na desaroyonan históriko importante ku a influensiá nos komunidat i nos pais. Ehèmpel di desaroyonan históriko ta entre otro kambio demográfiko di nos komunidat pa motibu di influensha di diferente pais ku a kondusí na un miksto di diferente rasa, pero tambe e parti di industrialisashon ku a trese un komodidat ekonómiko impaktante den historia di Kòrsou. E deliberashonnan tokante e kontenido di e 19

eskudonan a kondusí na konsulta ku historiado Charles Do Rego i Profesor Emeritus Valdemar Marcha (Kátedra Koheshon Sosial i Multikulturalidat) pa yega na un konsenso, pa e trabou por kontinuá. Punto di salida mester tabata e desaroyo ku nos komo pais a konosé: Nos historia den moveshon! Historia no solamente den moveshon, pero historia marká!

E imágen ta mustra momento di presentashon di e idea pa e obra artístiko na medionan di komunikashon den sala di Fòrti, Fort Amsterdam, na prinsipio di mei 2018. Presente tabata Sr. G. Abath, Sra. M. Manuel di Plataforma Otrabanda ku tambe a karga e idea, Sra. Marilyn Alcalá-Wallé, Minister di Enseñansa, Siensia, Kultura i Deporte, Sra. S. Larmonie-van Heydoorn di Ministerio di Enseñansa, Siensia, Kultura i Deporte, Sr. C. do Rego konsehero riba e materia di nos historia i Sr. H. Lew-Yen-Tai representando e proyekto e “Bon Yu Kòrsou”, Sra. A. AbathDelgado.

6. Konstrukshon i instalashon E kapítulo anterior a deskribí kon a yega na eskoho pa un protekshon pa nos bandera nashonal. Alabes a menshoná ku Sr. Giovanni Abath, nòmber di artista 7.1, ta e persona ku a risibí e enkargo pa traha e protekshon. Despues di a yega na un konsenso tokante e historia ku e Korona di protekshon tin ku ekspresá i e símbolonan nesesario riba e eskudonan, 7.1 a usa su inspirashon i talento artístiko pa traha e diseñonan ku ta kuadra ku su enkargo. Ku hopi dedikashon 7.1 a traha e Korona i e 10 eskudonan bou di supervishon di arkitekto Sr. Gerardo (Dito) Abbad ku for di prinsipio tabata enbolbí den e trayekto menshoná. Tantu pa e Korona komo e eskudonan Sr. Abath a duna su mes interpretashon pa visualisá esaki nan. E artista a duna e siguiente interpretashon pa e Korona: E Korona ta konsistí di 10 pilá. Kada pilá ta representá un protektor. Kada protektor tin su kabes i tin su alanan habrí. Entre su alanan ku ta tene man di e otro protektor tin e 4 elementonan mas poderoso di naturalesa visualisá: awa, tera, kandela, airu. Parti abou tin krùlnan ku ta simbolisá awa. Siguientemente ta sigui e elemento tera ku ta e liña stret den e ala. Meimei tin e solo ku ta representá kandela. Finalmente tin e elemento aire na superfisie di e alanan visualisá pa e sírkulonan.

Manera menshoná anteriormente, 7.1 a duna su mes interpretashon pa visualisá e Korona i e eskudonan. Pa e eskudonan 7.1 a duna e siguiente interpretashon: 1. Promé nashon: ta mira un palu ku ta simbolisá kresementu i un kanoa. E kanoa ta para pa e vehíkulo ku nos promé nashon a usa pa yega Kòrsou. Detayenan di e rais di e palu ta pasa dor di e kanoa bai abou. Esaki ta nifiká ku nos rais a bin den e kanoa. 2. Resistensia pa libertat i igualdat: e eskudo ta ilustrá e boto riba kua esklabonan a yega Kòrsou. E kadena a wòrdu kibrá pa libertat. Tin 3 forma di silueta di hende ku mannan na laira. E siluetanan ta para pa famia i pa e 3 nivelnan den klase sosial. Kada un ta hisa nan man komo señal di viktoria. No solamente viktoria di libertat pero kada nivel ta logra lo máksimo ku e por. Ariba na man drechi tin solo pa duna lus pa futuro desaroyo. 3. Solidaridat ku pueblonan: Kòrsou semper a koperá ku mundo hinter. Den fondo tin e 6 kontinentenan di mundo i Kòrsou dilanti. Di nos pais ta sali diferente liña konektando nos ku mundu. 4. Papiamentu: a usa 3 palabra den forma di un pùzel pa ilustrá algu di nos mes pa Kòrsou. Ami, Abo, Nos. Ami ta Kòrsou. Abo ta Kòrsou. Nos ta Kòrsou. Ora un persona bisa Nan ta Kòrsou e ta ekskluí su mes. 5. Desaroyo klase di obrero: den sentro si e eskudo tin un mur. Esaki ta simbolisá yegada di refineria. Dia ku industria a drenta Kòrsou. E mur a desaroya tur lokual tin rondó di dje. Entre otro edifisionan, un flecha simbolisando tráfiko, tankeronan, gráfika di ekonomia. Alabes tin un silhueta di un hende ku un bòrchi simbolisando welganan. 6. Diversidat i inklushon: diferente forma, diferente tekstura i struktura tur ta drai den mesun spiral i kaba na mesun punto. 7. Hustisia sosial: e balansa ku nos mester tin entre bon i malu, riku i pober, gordo i flaku. 8. Kibra barera rasial: firkant ku rondó ta meskos ku pretu ku blanku. Dos figura ku kara opuesto pero por nota ku nan a meskla. E forma rondó a drenta den

esun firkant. Tur dos ta den mesun kuadro ora di meskla. Nos ta riba mesun pais. Nos a bira un. 9. Derechi di voto i outodeterminashon: na man drechi tin un kantidat di bala. Tradishonalmente ora nos ta bai vota, nos ta bisa, nos ta bai basha bala. 2 strea ku ta para pa nos bandera. E man di e votadó ku ta tira e papel di vota den e buzon. 10. Kòrsou, un pais: nos ta den nos mes awa i teritorio. E strea chikitu i esun mas grandi na man robes ta simbolisá Kòrsou. E otro streanan ta simbolisá e paisnan ku Kòrsou ta konsultá pa sigui krese. E flecha ta sali abou di e awa subi bai i sali na man drechi simbolisando asina ku Kòrsou ta den desaroyo kontinuo. Banda di e interpretashon artístiko di Sr. Abath tin e splikashon históriko formal di e enkargo di gobièrnu di Kòrsou na Sr. Abath. Den e siguiente kapítulo ta sigui e deskripshon formal di e eskudonan. E imágennan ta duna un impreshon di ehekushon di e enkargo na artista 7.1.

Durante ehekushon tabatin diferente ronda di inspekshon di e trabounan na atalier di Sr. Abath, kaminda Minister mes a bai tuma nota di e trabounan i e avansenan pa por logra instalá e Korona promé ku 1 di yüli 2018. Minister a risibí diferente splikashon di Sr. Abath di entre otro e material duradero ku e ta traha kuné (Stainless steel 3.16), e planifikashon, e kondishonnan i nesesidatnan pa e por finalisá su trabou ku éksito.

Otro momento mas di inspekshon di e Korona i eksposishon di un di e eskudonan. E eskudo riba e imágen ta representá ‘Resistensia pa libertat i igualdat’ ilustrando e époka di sklabitut. Di robes pa drechi sra. Herta Parabirsing, Sr. Giovanni Abath i minister Marilyn Alcalá-Wallé na e atalier di Sr. Abath.

Riba e imágen por nota momento di inspekshon di e protekshon dor di Sr. Abbad serka artista 7.1. Segun e trabounan tabata avansando e obra a bira atraktivo i magnétiko. E dos kabayeronan ta pará dilanti di e porta di e protekshon.

E sensashon i dinamismo pa traha ku mas entusiasmo riba e obra ta momento ku a bira kla ku Rei Willem Alexander i su mahestat Máxima ta hasi akto di presensia durante e selebrashon di nos Dia di Himno i Bandera 2018. E komishon bou di liderasgo di sra. Herta Parabirsing a sigui guia e proseso mientrastantu i servisio di obranan públiko DOW a wòrdu poné na altura di e trabounan ku ta tumando lugá i e komishon a entregá e petishon na e servisio pa por instalá e Korona rondó di e bandera pa fin di yüni 2018. Miéntras ku e petishon na DOW tabata andando diferente trabou a tuma lugá den luna di mei i yüni, e.o. e yamada speshal riba e tim di Bandera (scouts), pa ripití e hisamentu i bahamentu di e bandera grandi, pa por tuma e midinan korekto pa traha e porta korespondiente pa haña akseso na e palu di bandera riba Plasa Brion.

Riba e imágen momento di preparashon pa hisamentu di e bandera pa yega na un fórmula pa un protekshon funshonal ku ta kumpli ku protokòl di bandera. 25

Fin di yüni a instalá e Korona rondó di e bandera, wardando su inougurashon ofisial riba 1 di yüli, e dia di baha bandera di Kòrsou di forma solèm i seremonial. Momento ku 7.1 ta instalando e Korona rondó di e bandera na Plasa Brion den presensia di Sra. Herta Parabirsing i arkitekto di supervishon Sr. Dito Abbad. Durante instalashon di e obra 7.1 tabata duna splikashon di e trabounan ku e tabata realisando kaminda espektativanan tabata haltu. E sírkulonan ku nos ta mira ta simbolisá aire, un di e kuater elementonan di naturalesa. Entretantu ekipo di konstrukshon ta hasi adaptashon i instalashon. Di parti di komunidat tabatin interes grandi pa mira e desaroyo i diferente paseante a apoyá e artista.

E trabou tabata unu intensivo i a tuma tempu pa instalá. Despues di instalashon kompletu di e obra a hasi un inspekshon final. E tim ta satisfecho kon e proyekto a progresá.

7. E korona i e símbolonan riba e korona Fin di yüni 2018 a instalá e korona rondó di e bandera, wardando su inougurashon ofisial riba 2 di yüli, e Dia di Himno i Bandera di Kòrsou. E korona konosé dies (10) eskudo i kada un di nan ta konta un pida historia via di e símbolonan riba nan. Un danki speshal ta bai na Sr. Charles do Rego ku a sòru pa dokumentá e parti aki di e dies eskudonan. Esaki ta nos historia di forma apstrakto. Nos ta nota ku tabatin hopi desaroyo riba nos isla, for di momento ku nos a siña tokante di nos promé habitantenan ku ta e indjanan te kaminda nos ta aworaki ku ta den un pais outónomo den Reino Hulandes.

Riba e imágen por apresiá e obra artístiko sin e montahe di e eskudonan korespondiente.

1. Promé nashon For di 2.800 aña promé ku Kristu, nos promé antepasadonan a bin ta eksplorá i deskubrí kiko nos isla por a ofresé. Nan a laga konosementu importante atras di flora i founa i nan a desaroyá nan bida sin kousa daño grandi na naturalesa, esta nan a perkurá pa biba den balansa ku medio ambiente te ora nan a bin resultá bou di kolonisadó Spañó. Nan tambe a resistí opreshon, koutiverio i deportashon. Tambe nan a laga un herensha pa nos tur ku a bin despues di nan entre otro den palabranan ku nos ta usa den Papiamentu, manera e palabra kunuku i orkan, den uso di yerba i den nòmber di lugánan manera roi indjan.

2. Resistensia pa libertat i igualdat Kòrsou, un sentro komersial ku a konosé negoshi di katibu, pero tambe tur e forma di resistensia di esnan sklabisá pa nan por logra libertat i igualdat, maske por ta formal so. E manera ku e pueblo oprimí akí a logra desaroyá su kualidatnan, e manera kon e.o. el a siña kultivá den sekura i usa laman ta hasi nos kultura riku. E klase kunukero a desaroyá kalidatnan di tantu hende di fishi komo hende ekspresivo den kanto, baile, tambú. E lucha di Tula ta tuma un lugá sentral. Libertat a duna oportunidat pa un grupo (klase) di kunukero i hòmber di fishi desaroyá.

3. Solidaridat ku pueblonan Laman ta separá i laman ta uni. Den siglonan pasá nos, den e sentro komersial akí, tabata bon na altura di moveshon den Karibe i di e.o. ideanan di libertat i igualdat. Nos rebelion grandi a surgi influenshá pa e ideanan akí. Nos héroenan, Brion i Piar a demonstrá solidaridat ku e movementu libertador suramerikano, tambe a base di e mesun ideanan di solidaridat. Despues den siglo 19 i 20 nos a bira refugio pa esnan ku mester a hui; tantu for di Karibe i Sur-Amerika komo for di paisnan lehano di Medio-Oriente i tambe Europa bou di menasa fasista. Nos pueblo tambe a kolektá sèn pa yuda Hulanda; nos matrosnan a muri den laman i obreronan a traha duru pa produsí kombustibel pa forsanan aliado.

4. Papiamentu Desaroyo di un idioma krioyo: nos Papiamentu; surpasando bareranan di klase i etnisidat. Elemento di unidat. Rekonosimentu di e idioma akí, tantu lokal komo internashonal. Elemento ku a i ta uni tur e diferente gruponan sosial i étniko. Forsa grandi di nos identidat.

5. Desaroyo klase di obrero Komo pais industrialisá un klase nobo di obrero por a desaroyá. Un sentro industrial den Karibe. Un posishon úniko den region komo e sentro mas industrialisá den Karibe pa hopi tempu ku a duna nos un modernisashon rápido i di impakto grandi. Labor industrial a stimulá enseñansa avansá i di fishi riba tur nivel. Tambe nos a haña un ekonomia diversifiká i alabes un sindikalismo avansá ku a hasi hopi impakto.

6. Diversidat i inklushon Komo e sentro industrial den Karibe durante hopi aña (1920-1960), un imigrashon intensivo a tuma lugá. Diferente kultura a siña biba banda i hasta huntu ku otro (algu remarkabel) integrando nan kultura i usando idioma Papiamentu komo faktor unifikador. Kòrsou su panorama demográfiko a kambia.

7. Hustisia sosial Inklushon di hende anteriormente sklabisá i fuertemente marginalisá a bin kambia pokopoko den kual akseptashon religioso, mas tereno pa pueblo, trabou den sektornan nobo leu for di e yugo di doño di plantashi i mas skol. Nos a bin konosé formanan nobo di koperashon (sam) i forma di organisashonnan manera “winkel” i “volksbond”. Kòrsou a konosé momentunan emansipatorio den haf, industria i sektornan liber. Hende muhé a eksihí igualdat i partisipashon real. Leinan sosial a bira mas amplio i komun ku atenshon pa esnan marginá por emansipá.

8. Kibra barera rasial Ku e desaroyo menshoná a bin tambe e rekonosimentu di e hende di koló. Bareranan grandi den mente atrasá a bin kibra, lucha sosial i polítiko a aportá grandemente aki meskos ku e lucha polítiko ku a duna e masa grandi di kolo un bos fuerte. Un di e resultádonan di 30 di mei 1969 ta ku esaki a yuda kibra e barera rasial. Despues nos a konosé gobernador, promé minister i gezaghèber di koló. Den arte ekspresivo (entre otro den kanto i tambú) i literatura a sigui lucha pa emansipashon den tur forma.

9. Derecho di Voto i Outodeterminashon Derecho di voto ta na base di lucha polítiko pa disidí riba nos propio rekursonan i nos futuro. Momentunan emansipatorio ta e.o. e lucha di Chumaceiro, Dòktor da Costa Gomez, Interimregeling, Statut, elekshon liber i demokrátiko i posibilidat pa tene referendum konsultativo. Formando su propio partidonan nos pueblo (por) a bira doño di su pais.

10. Kòrsou, un pais Kòrsou outónomo (2010) ta nifiká un paso emansipatorio; nos tin un propio pais riba su mes. Pero den reino Hulandes. Nos Himno i Bandera, nos idioma, nos historia kompartí, nos struktura polítiko basá riba demokrasia, e hecho ku for di 10-10-10 nos ta un país, ta e ingredientenan importante pa nos por saka forsa pa por sigui bai dilanti i por sigui emansipá nos mes komo un país ku balornan haltu, ku struktura di hustisia sosial pa garantisá inklushon di tur hende ku ke biba riba e perla aki den Karibe.

Asina e 10 eskudonan ku a keda deskribí a uni den e obra di arte ariba presentá: “Nos historia den moveshon. E Korona di Triunfo, Logro i Perseveransia”. Den e siguiente kapítulo por apresiá momento di inougurashon i presentashon di e protekshon rondó di nos bandera.

8. Splikashon i presentashon Dia 1 di yüli 2018 e momento supremo a yega pa duna splikashon i presentashon di e protekshon rondó di nos bandera: “Nos historia den moveshon”. Esaki ta tuma lugá durante e selebra-shon solèm, seremonia di baha Bandera riba Plasa Brion riba 1 di yüli 2018. Despues ku gruponan uniformá i e Peletòn di bandera a drenta, e himno di Kòrsou a wòrdu kantá, pa despues sigui e seremonia di baha bandera, dobla i warda e bandera den e vitrina speshal pa e okashon, kaminda e bandera ta wòrdu protehá pa e Guardia di Honor.

E fotonan ta mustra momento di baha bandera ku pa promé biaha ta pasa dor di e porta di e protekshon, momento ku ta prepará pa dobla e bandera i finalmente komandante di peletòn ta entregá e bandera na Sra. Alcalá-Wallé, Minister di Enseñansa, Siensia, Kultura i Deporte. 34

Despues di e akto di baha bandera Gobièrnu a duna honor na baluartenan di bario. Riba e imágen e Ministernan presente ta sperando resepshon di e baluarte- i prospekto baluartenan. Di robes pa drechi Sr. Armin Konket, Sra. Marilyn AlcaláWallé, Sr. Eugene Rhuggenaath, Sra. Suzy Camelia-Römer, Sr. Hensley Koeiman.

E baluartenan a keda eskoltá pa damanan di honor na momento ku nan a subi Plasa Brion, pasa riba un tapeit kòrá, i yega serka Ministernan pa risibí nan rekonosementu. 35

Algun baluarte i prospekto baluarte risibiendo nan rekonosementu serka Ministernan.

Despues ku e peletòn a baha bandera i duna honor na baluartenan i prospektobaluartenan di diferente bario, a yega e momento di splikashon di e nifikashon di e Korona i e diferente komponentenan. A toka turno na artistanan hóben di Excel Arts Academy, un akademia kaminda arte ta un parti integral di un sistema di biba den un hóben su bida, pa hasi un presentashon teatral fabuloso i elokuente dilanti di e públiko presente. Kada un di e dies eskudonan i nan nifikashon a wòrdu dramatisá dor di e elenko bou di supervishon di e Ministerio di Enseñansa, Siensia, Kultura i Deporte. E aktuashon i dramatisashon di kada eskudo tabata den sekuensia di e susesonan signifikante di nos pasado, dunando aklarashon bibu i visual di nos historia i e moveshon for di nos promé nashon di e indjannan Arowak di e tribu Caiquetio te na e aspekto emansipatorio di un Kórsou komo un país den Reino Hulandes. Un historiado a deklamá e diferente pasashinan ku e integrantenan di Excel Academy a presentá. Despues ku kada eskudo di turno a wòrdu deklamá i dramatisá, artista 7.1. tabata pasa pa monta e eskudonan na e Korona poulatinamente. Di e forma aki kada eskudo a wòrdu introdusí i presentá na komunidat di Kòrsou riba 1 di yüli promé ku nan a haña nan sitio seyá riba e Korona di: Triunfo, Logro i Perseveransia!

Riba e siguiente imágennan: Pòtpori di un Magno Evento

E pareha artístiko Sr. Giovanni Abath i Sra. Angelica Abath-Delgado a realisá un inmenso trabou pa sòru pa un protekshon digno i duradero pa nos bandera nashonal. Despues di splikashon i presentashon di e Korona e peletòn di bandera, gruponan uniformá, kompañá pa e mandatarionan konserní, Minister Presidènt i Minister di Enseñansa, Siensia, Kultura i Deporte a krusa brùg i bai hiba e bandera warda na Fòrt Amsterdam.

9. Inougurashon i Konklushon E kapítulo aki ta konkluí ku e selebrashon solèm riba Dia di Himno i Bandera na Plasa Brion riba 2 di yüli 2018. Despues di e reunion solèm di Parlamento, Parlamentarionan a sigui pa Fort Amsterdam pa huntu ku gobernantenan i alto funshonarionan krusa e brùg pa den union selebrá nos Dia di Himno i Bandera. Manera e aña anterior, kaminda pa promé biaha e Bandera grandi di Kòrsou a krusa di Plasa Brion pa Punda, buskando e konekshon i union di nos pueblo, na aña 2018 e proseso a ripití i tabatin mesun impakto emoshonal i patriótiko riba nos komunidat. Despues ku e Bandera a sali Fòrt Amsterdam kargá pa e pelotón di bandera, el a krusa via e brùg di ponton direkshon di Plasa Brion. Na kada lado tabatin gruponan uniformá halsando nos nashon. Pa promé biaha den historia e bandera di Kòrsou a wòrdu hisá den un ambiente masha bunita i solèm embeyesé pa e protekshon rondó di dje “Historia den moveshon”, ku a duna e bandera i e totalidat di e selebrashon un toke i realse úniko. Despues ku Parlamentarionan i gobernantenan a krusa e brùg di Ponton pa bai Otrobanda, a sigui e trayekto di ‘seating’ riba Plasa Brion en espera di yegada di Gobernador di Kòrsou.

Pa e okashon su mahestat, Rei Willem Alexander i Reina Máxima a hasi akto di presensia durante e selebrashon magno aki. Riba e foto athunto nos Rei i Reina ta kompañá pa nos Gobernador i su pareha.

Representantenan di tur pais den Reino a hasi akto di presensia, inkluyendo nos Sektretario di Estado Sr. Raymond Knops di Relashonnan interior i di Reino.

Despues ku e pareha real a tuma asiento, a sigui entrada ofisial di gruponan uniformá. E programa ofisial riba Plasa Brion a kuminsá 08:00 or ku un durashon di dos ora i mei, pa yega na su finalisashon 10:30 or. Deportistanan di aña a yega Plasa Brion, i e kor hubenil bou di enkargo di Dennis Aalse a posishoná su mes riba e podio, wardando e

momento pa nos bandera nashonal yega huntu ku e grupo di marioneta i e peletòn di bandera. Kòrsou ta un pais ku un pueblo kreyente i ku hopi devoshon; den e ambiente religioso tin un diversidat di koriente ku ta duna un palabra e dia magno aki. A toka turno na nos Obispo Mgr. Luis Antonio Secco representando Diosesis di Willemstad, siguí pa Iman Adnan, e Imam di e komunidat Muslim na Kòrsou, i Pandit Bharap Bhojwani, di komunidat Hindu, i Sr. Michael De Sola den representashon di e Rabbi di komunidat Hudiu, siguí pa Pastor Leander Warren, di e Iglesianan Protestant Uní (United Protestant Church). E programa a sigui despues ku e ‘Last Post’, e seremonia di trompèt kaminda ta rekordá esnan ku a bai nos dilanti bou di guia di e maestro Dennis Aalse. Despues komandante di peletòn di Bandera, sr. Derrick James a dirigí su mes na e minister presidènt solisitando pèrmit pa hisa nos bandera nashonal. Despues di e risibí e pèrmit, e komandante huntu ku su peletòn a hasi e akto solèm di hisa nos bandera, ku pa promé biaha a keda rondoná i embeyesé pa nos Korona, di Triunfo, Logro i Perseveransia. E inougurashon di e Korona a tuma lugá na momento di apertura di e porta di e obra artístiko ora di hisa e bandera. Ku hopi emoshon i orguyo a sigui pa kanta nos himno di Kòrsou huntu ku e orkesta hubenil ku a interpretá nos himno musikalmente. E programa a kontinuá ku un diskurso kòrtiku di e Minister di Enseñansa, Siensia, Kultura i Deporte, Sra. Marilyn Alcalá-Wallé i Minister Presidènt, Sr. E. Rhuggenaath. Atletanan di rònt Kòrsou a hasi nan entrada riba Plasa Brion, baluartenan di bario a wòrdu rekonosé i a tuma asiento den e palko di honor i gruponan uniformá a retirá den silensio.

Despues ku e orkesta hubenil bou di guia di Sr. Aalse a deleitá e públiko ku algun kansion, a kontinuá ku e entrega di e Krus di Mérito na e nominadonan pa wòrdu kondekorá durante e seremonia ofisial riba Plasa Brion. A sigui un parada di gruponan hubenil i esunnan uniformá. Finalmente e momento di un presentashon pòtpori di nos rikesa kultural tan spera a yega, konsistiendo di poemanan, presentashon di 500 hóben di enseñansa di fundashon bou di guia di nos maestro di baile sr. Cesario Jean Louis, presentashon di e ganador di e Festival ‘Un Kanto pa Kòrsou ‘, Sra. Surelma Miguel; Ganador di e Festival “Kantadó Mayó” Sr. Furgill Wijngaarde; ganador di Festival ‘Di Tumba’ Sr. Irving Jano. A sigui un koreografia presentá dor di e siguiente gruponan di baile: Futuro Memoria di Kòrsou, Paniweri, D’art pa mucha, D’art i The Cyberclub. Guia musikal tabata na enkargo di dirigente Dennis Aalse, Dennis Aalse Youth Orchestra i Dennis Aalse Big Band. E programa a wòrdu klousura ku retirada di nos gobernadora i e pareha real bou di un aplouso bon meresí di e públiko.

Pòtpori fotográfiko di un digno selebrashon di nos Dia di Himno i Bandera.

Riba e páginanan anterior por a disfrutá di e selebrashon ofisial di nos Dia di Himno i Bandera. Promé ku e selebrashon anual riba Plasa Brion diferente preparashon ta tuma lugá. Un di e preparashonnan ta momento di selektá e nominadonan pa risibí Krus di Mérito riba 2 di yüli. Algun siman promé ku selebrashon di Dia di Himno i Bandera e nominadonan a risibí invitashon di Minister di e.o. Kultura, pa puntra di forma ofisial si kada persona ta aseptá pa wòrdu kondekorá.

E nominadonan ku a wòrdu kondekorá riba 2 di yüli 2018 ta: Di robes pa drechi pará patras: Sr. Rignald Calixto Lak, pa trabou komunitario Sr. Gildo Gustino Brigitha, pa trabou di deporte i kultura Sr. Bentley Ronald Leonora, pa trabou sosial i edukativo Sintá di robes pa drechi: Sra. Myrla Thomasa Rodriguez, pa trabou soshal kutural i edukativo Sr. Juan Broudilio de Palm, pa su trabou kreativo (blekero) Sra. Jeanette Kroes, pa trabou musikal Sra. Isaira Dominga Gomes-Mauricia, pa trabou musikal i edukativo Den presensia di Minister di Enseñansa, Siensia, Kultura i Deporte, Sra. Marilyn Alcalá-Wallé, pará na man drechi di sr. Lak.

Riba e imágennan momento di kondekorashon di e nominadonan ku un Krus di Mérito i e plaka korespondiente komo forma di gratitut pa e trabounan realisá pa komunidat.

Durante e selebrashon ofisial i solèm riba Plasa Brion, gobièrnu di Kòrsou a otorgá e pareha real un regalo na nòmber di pueblo di Kòrsou, kaminda dos hóben tabatin e honor di duna e regalo na e pareha.

Promé ku tur e selebrashon i rekonosimentunan, direktamente despues di kanta nos himno i hisa bandera, a sigui disertashon di e minister di Enseñansa, Siensia, Kultura i Deporte i esun di Minister Presidènt di Kòrsou. Riba e dia grandi aki, gobièrnu di Kòrsou anualmente ta para ketu na diferente suseso importante den desaroyo di pais. Den e kuadro aki e Minister di e.o. Kultura, banda di e Minister Presidènt di pais, tin un ròl importante den su mensahe pa komunidat. Señora Marilyn Alcalá-Wallé, den su kalidat di minister di Enseñansa, Siensia, Kultura i Deporte, durante e periodo di 2017, 2018 i 2019 a haña e oportunidat di realisá diferente trabou pa yuda fortifiká nos nashon. E konmemorashon i selebrashon di ‘Dia di Bandera’ ta un di e eventonan magno ku anualmente nos ta para ketu na dje i ku ta yuda konstruí i fortifiká nos lasonan ku otro! Ta p’esei durante su periodo el a para ketu na diferente tema importante pa komunidat pa huntu nos por reflekshoná.

Na 2017 sra. Alcalá-Wallé a para ketu na e tema di “Union den diversidat”. E aña aki el a realisá un kambio drástiko den e forma di selebrashon di e dia di Bandera. Promé ku 2017 semper ora baha e bandera na Plasa Brion, e Guardia di Honor tabata permanesé na e plasa huntu ku e bandera te su siguiente dia ora ta hisa e bandera 2 di yüli. Na 2017, segun su deseo i vishon, e bandera a krusa Emmabrug pa promé biaha i wòrdu wardá na Fort Amsterdam kaminda e Guardia di Honor a sòru pa kuido di e bandera. E tema di 2017 tabata ‘Union den Diversidat’ pa pone aksento ku nos ta bini di diferente parti di mundu i ku nos tin ku biba den hermandat ku otro. E brùg tantu literalmente komo figurativamente ta uni Banda’riba i Banda’bou, e pueblo pa’riba di brùg i pa’bou di brùg. E esena riba dia di Bandera 2017 tabata sumamente impreshonante kaminda for di porta di Fòrt Amsterdam te na final di Emmabrug gruponan uniformá a forma un kordón na ámbos lado di e ruta, hasiendo e totalidat unu masha pitoresko.

Screenshot for di video youtube Curacao Flag Day 2017 - Dia di Bandera 2017

E 200 hóbennan eskolar bistí kompletamente na blanku ku a laga e blasnan 'eco-friendly' bai laira na Plasa Brion a kousa un sensashon inkreibel despues ku a subi e bandera i kanta e himno di Kòrsou.

Na e mesun aña 2017 minister a proponé Gobièrnu di Kòrsou pa tuma e desishon, pa dekretá e ‘Siman di e Bon Yu di Korsou’ ofisialmente un siman promé ku selebrashon di Dia di Himno i Bandera, esaki riba inisiativa di nos Planta Nashonal di televishon TeleCuraçao. Na 2018, minister Alcalá-Wallé a tene su disertashon na Hulandes, mirando ku nos mahestat Rei i Reina tabata di bishita serka nos. Na e okashon aki a hisa e bandera pa di 35 okashon. Dia di Himno i Bandera 2018 a pone e enfoke riba nos historia huntu i triunfo, logro i perseveransia. Den liña grandi e mensahe tabata konsentrá riba e tema di nos Historia den moveshon: Triunfo, Logro i Perseveransia. E tres palabranan ta simbolisá e korona, e protekshon rondó di e bandera: Nos historia den moveshon. Esei ta enserá ku nos no a para ketu, pero a keda lucha pa bai dilanti den diferente etapa. Den kada etapa e palabra mágiko ta: traha huntu, esta kolaborashon! E sentido di fraternidat ta importante, no solamente entre nos ku ta biba na Kòrsou pero kolaborashon den hinter Reino. I hinter Reino tabata bon representá riba 2 di yüli. E Screenshot for di video youtube Dia di Bandera Curacao royekto di e korona rondó di e 2018 QProductions & Inspire Curacao) bandera tabata un trayekto bastante intensivo, kaminda trabou den tim a mustra masha kla ku huntu nos por logra konstrukshon di nos pais di un forma positivo. E trabounan aki meresé un mérito i danki speshal na tur e integrantenan ku di un òf otro forma a traha inkansabelmente pa por a logra e protekshon rondó di nos bandera. 52

Na 2019 Minister Alcalá-Wallé siendo e Minister di e.o. Kultura, a pone e enfoke riba nos identidat kolektivo. Nos bandera ta simbolisá nos identidat kolektivo. Identidat ta masha difisil pa deskribí. Identidat ta e lokual ta úniko of inherente na un persona, organisashon òf pais. E palabra “identidat” konosé diferente forma: p.e. identidat personal, identidat di organisashon òf identidat kolektivo. Den e kaso aki e identidat kolektivo ta relevante: Kua ta e karakterístikanan di nos identidat? Esei ta e karakterístikanan ku huntu ta laga nos identifiká nos mes komo e Yu di Kòrsou. Huntu nos ta karga un historia ku na diferente momento a pone lus riba algun movementu i suseso impaktante den nos historia ku ta hasi nos e palèt di e Yu di Kòrsou di awe. E Korona riba Plasa Brion ta parti di nos identidat kolektivo! Nos mester por komprondé otro i traha ku otro saliendo for di un meta komun: un Kòrsou próspero kaminda nos por desaroyá na nos máksimo potenshal i biba den harmonia ku otro. Ehèmpelnan di esaki ta den futbòl kaminda Kòrsou a lusi den e “Copa di Oro” di Concacaf den kuart final (na Philadelphia); kaminda nos ekipo di Senior League na Puerto Rico a marka nos komo e “Baseball Powerhouse” di Karibe, defendiendo e título di Kampeon di Karibe pa 2019 i ku despues a sigui pa kompetí pa e kopa mundial. Riba tereno kulinario tambe Kòrsou a hasi estrago ku nos “Curaçao Culinary Team” ku a revelá nan talento na Miami na 2019. Mester keda pone e enfoke riba un meta komun ku nos tur ta kompartí pa huntu nos logra. E palabra mágiko ta: #huntu!!

#Huntu. Artista 7.1 i Sra. Angelica Abath-Delgado huntu ku Kabinete di Minister.

Despues di e parti ofisial a sigui e selebrashon na Parke di Himno i Bandera na Barber i aktividatnan ku komunidat riba Plasa Brion i Molenplein despues den presensia di e pareha real.

10.

Fuentenan

Fuentenan di informashon ta importante pa dokumentashon mas verídiko posibel di susesonan remarkabel di un pais. Pa realisashon di e buki aki a hasi uso prinsipalmente di informashonnan propio optené durante e trayekto di realisashon di e protekshon rondó di nos bandera nashonal. Adishonalmente a risibí kontribushon di historiadó sosial i di geografia MSc MBA Sr. Charles do Rego i di Artista 7.1, e eskulptor, aktor, eskritor i diseñadó Sr. Giovanni Abath i su Sra. Angelica Abath-Delgado. Otro fuente importante ta Sr. Venancio ‘Pacheco’ Domacassé, un profeshonal riba tereno di kultura, presidente di e komishon pa yega na un bandera propio pa Kòrsou i durante e tempu ei Hefe di e Departamentu di Asuntunan Kultural. Sra. Sonia Simon-Franco, ta e fuente pa informashon korekto di nòmber i fechanan importante di su tata Sr. Wilfrido ‘Willy’ Marcolino Franco (24 yanüari 1937- 25 yüni 1987), ku na momento di rekonosimentu di e bandera di Kòrsou tabata okupá e funshon di Diputado di Enseñansa, Kultura i Deporte di Kòrsou. Fuentenan gobernamental di referensia ta:  BC-besluit 2010/36965 ‘Handhaven van de nationale vlag in het nieuwe land Curaçao’  BC-besluit 2010/34456 ‘Aanbieding ontwerp onderscheidingsvlag’  Apostille number 2017/025740, Gouden omheining van de Vlag van Curaçao op het Brionplein. Alabes ta referí na sitionan di internet:  Meetcuracao.com, tokante e proseso pa yega na un propio bandera pa Kòrsou Wikipedia pa informashon tokante historia di nos bandera nashonal;  Nobelprijs voor de literatuur (nobelprijsvoordeliteratuur.nl), pa aksentuá imporantansia di un bandera;

 

United States Flag (https://www.united-states-flag.com) pa aksentuá imporantansia di un bandera propio; You Tube (https://m.youtube.com/watch?v=gZorItOk9Dk), e video di e momento ku Sr. Wilfrido ‘Willy’ Franco ta orador den Konseho Insular di Kòrsou ekspresando e orguyo di introdukashon di nos propio bandera nashonal. E video kòrtiku ta di ‘upload’ dor di Telecuracao: ‘Palabranan di Willy Franco na okashon di introdukshon di NOS bandera’; You Tube (https://youtu.be/U8Dc6tvnggo) Curacao Flag Day 2017 – Dia di Bandera 2017; You Tube (https://youtu.be/7oZQv1RScno) Dia di Bandera Curacao 2018 (QProductions & Inspire Curacao).

Un danki speshal ta bai na:  Plataforma Sklabitut i Herensia di Sklabitut i Ministerio di Enseñansa, Siensia, Kultura i Deporte pa nan aporte den realisashon di e obra artístiko i históriko riba Plasa Brion;  Sr. Gerardo ‘Dito’ Abbad, konsehero profeshonal riba arkitektura i planifikashon;  Sra. Jean Henriquez, Sr. Stanley Quirindongo i Sra. Emly Fransisca pa nan sosten balioso i indispensabel den e deskripshonnan;  Sr. Giovanni Abath i su KARA Productions BV, sostené pa Sr. Dito Abbad, Plan D2, pa diseño di e Eskudonan.

Himno di Kòrsou Lanta nos bos ban kanta Grandesa di Kòrsou; Kòrsou isla chikitu

Nos patria nos ta demonstrá Onor i lealtat Meskos na e bandera

Baranka den laman

Union di nos nashon

Kòrsou nos ta stima bo Ariba tur nashon

Nos bida lo ta poko Pa duna nos pais

Bo gloria nos ta kanta

Luchando uní pa libertat

Di henter nos kurason

Amor i komprenshon

Nos pueblo tin su lucha Ma semper nos tin fe

I ora nos ta leu fo’i kas nos tur ta rekordá

Di logra den tur tempu

Kòrsou su solo i playanan

Viktoria ku trabou

Orguyo di nos tur

Ban duna di nos parti P’e isla prosperá

Laga nos gloria Kreador Tur tempu i sin fin

Laga nos uni forsa

K’El a hasi nos digno

P’asina triunfá

Di ta yu di Kòrsou!

Promé Nashon

Diversidat i inklushon Resistensia pa libertat i igualdat

Hustisia sosial Solidaridat ku pueblonan

Kibra barera rasial Papiamentu

Derecho di voto i outodeterminashon Desaroyo klase di obrero

Kòrsou, un pais 58