9. MINISTERIO DI TRÁFIKO, TRANSPORTE I PLANIFIKASHON URBANO (VVRP) Ministerio di Tráfiko, Transporte i Planifikashon Urbano ta sòru pa desaroyo duradero Tráfiko, Transporte i Planifikashon Urbano, kaminda totalidat, siguridat i bunitesa ta para sentral. E ministerio ta hasi uso di teknologia moderno pa hasi e pais agradabel pa biba i trafiká. Pa kuminsá riba bon pia e Gobièrnu aki lo hasi Ouditoría/Nulmeting den Ministerio di VVRP i tur su NV-nan i fundashonnan. Esaki pa bo sa kiko bo a bin haña i den kua estado i si posiblemente lo por tabatin mal maneho. Tambe lo reorganisá e departamentonan di VVRP dor di drecha i outomatisá e atministrashon mas tantu posibel. Ministerio di Tráfiko, Transporte i Planifikashon Urbano (Verkeer, Vervoer & Ruimtelijke Planning) ta konsistí di dos sektor: Tráfiko i Transporte (Verkeer & Vervoer) i tambe Infrastruktura i Planifikashon Urbano (Infrastructuur & Ruimtelijke Planning). Tarea di e sektor di Tráfiko i Transporte ta konsentrá su mes riba e aksesibilidat di i riba Kòrsou di un manera sigur i efikas, via di tráfiko aéreo, tráfiko marítimo i tráfiko terestre. Duna fasilidat pa un transporte públiko optimal tambe ta un tarea di e sektor aki. Den futuro serkano leinan internashonal relashoná ku transporte via airu i laman lo sigui desaroyá i nos mester por adaptá pa por keda kompetitivo riba merkado internashonal. E sektor aki obligatoriamente mester atendé ku numeroso leinan internashonal. Tambe e sektor aki mester por enfoká riba protekshon di hende kontra forsanan di naturalesa. E sektor di Tráfiko i Transporte ta konsistí di 4 sup- area: Aviashon, Transporte marítimo, Tráfiko na tera i Meteorologia. Tarea di e sektor di Infrastruktura i Planifikashon Urbano ta okupá su mes prinsipalmente ku e aksesibilidat (sigur) di e areanan di bibienda i trabou di Kòrsou, kumplí ku e nesesidat di terenonan pagabel pa konstrukshon i ku e planifikashon di espasionan terenal den distinto destinashonnan , entre otro tambe den ‘areanan bèrde’. E sektor di Infrastruktura i Planifikashon Urbano ta konsistí di 3 sup-area: Domeinbeheer, Planifikashon Urbano i Infrastruktura i Obra Públiko.
I SEKTOR TRÁFIKO I TRANSPORTE 1. TRÁFIKO AÉREO Area di enfoke: Tráfiko Aéreo ta dirigí su mes riba registrashon i sertifikashon di avionnan i ekstendé e pèrmitnan nesesario, protehé e pasaheronan i monitoriá e uso di nos espasio. • Mester finalisá e trabou (Leinan i reorganisashon CCAA) pa por kumplí mas pronto posibel ku e tratadonan di aviashon (ICAO i FAA) pa asina por garantisá un bon nivel di nos transporte aéreo. Ku otro palabra, aselerá e proseso pa Kòrsou alkansá kategoria 1; aeropuerto ku klasifikashon di klase 1 ta nifiká ku e ta sirbí tur tipo di avion, pa operá segun skèdjel ku ta destiná pa transportá mas ku 30 pasahero (avionnan grandi). Esaki ta trese kuné henter e programa di seguridat, manera e ta poné den akuerdonan internashonal. • Eksplorá e posibilidat pa Registrashon di Avion. • Eksplorá posibilidat pa Kòrsou den kolaborashon ku institutonan internashonal, por bira sentro di entrenamentu pa studiante pilotonan Karibense of Sur-Amerikano ku no por studia of yega Estádos Unídos. • Pa hinka Kòrsou bek den kategoria 1 nos mester bini ku leinan nobo di “luchtvaart”
68
