TARGET SA VOTER REGISTRATION SA TANDAG CTIY, KUMPIYANSANG MAKAB-OT SA COMELEC

Ni: Raymond Samson Aplaya

Nagtuo si Florephi Botona, City Election Officer ning siyudad sa Tandag, nga ilang makab-ot ang ilang target sa voter registration alang sa 2022 National and Local Elections.

File Photo Comelec Tandag City Sa pakighinabi sa Radyo Pilipinas – Tandag, gibutyag niini nga taliwala niining COVID-19 pandemic, paspas gihapon ang dagan sa voter registration dinhi sa siyudad gani sa karon aduna pa’y dos mil ka mga aplikante nga posibleng madugang sa una nang gipagawas nga datos sa mga rehistrado ning siyudad nga anaa sa kapin 41 mil.

Apan bisan paman niini, dili matud pa kini kampante sa maong datos tungod kay magpahigayon pa kini og dugang mga satellite registration sa ubang mga barangay dinhi sa siyudad.

Subay sa ilang iskedyul, nakatakdang ipahigayon ang satellite registration sa Brgy. Pangi karong Septembre 4, Barangay Rosario sa Septembre 17, ug Barangay Salvacion sa Septembre 18, ning tuiga.

Gawas sa pagpahigayon sa satellite registration, plano usab ni Botona nga pakig-istoryahan ang mga barangay officials sa mga poblacion barangays ning siyudad aron nga hangyuon alang sa pagkumbinsir pa sa uban nilang mga konstituwente nga dili pa rehistrado nga magparehistro na tungod kay wala na matud pa’y extension sa deadline niini karong Septembre 30, 2021. (RP1-Tandag/PIA-Surigao del Sur)

MINDANAO NEWS