LGU DINAGAT ISLANDS, DOLE NAKIGPULONG SA STA. CRUZ FISHERFOLKS

Nakigpulong kang Gobernador Kaka Bagao ug Department of Labor and Employment (DOLE) Dinagat Islands Senior Labor and Employment Officer Verlan Diaz ang Purok 3 Sta. Cruz Fisherfolks Workers Association nga gipangunahan sa ilang presidente nga si Junie Candinato inubanan sa mga opisyal ug pipila ka membro sa asosasyon niadtong Disyembre 8, 2020 didto sa Barangay Sta. Cruz, San Jose, ning probinsya. Ang Sta. Cruz Fisherfolks Workers Association nagsugod sa gamay nga grocery store og karon aduna na silay bugasan tungod sa ilang pagpaningkamot ug pagtinabangay nga mapalambo kini. Sa kasamtangan, gipadayag sa grupo ang ikatulo nga negosyo nga gusto nilang sudlon nga mao ang usa ka bakery diin mihangyo sila ug pondo sa DOLE alang sa pagsugod niini. Atol sa ilang panaghisgot, gisuta ni Gobernor Bag-ao kung pila ang net income sa ilang asosasyon aron mahibal-an kung namonitor ba kini nila. Gitambagan usab sila ni Gob. Bag-ao nga maghimo og financial report o statement diin plastar ang report sa grocery ug bugasan aron nga dili na sila maglisod kung puhon matuman na ang ilang gi-propose nga bakery isip dugang nila nga negosyo. Gidasig usab sila sa paghatag og tahas sa matag miyenbro aron nga mapadayon ang kooperasyon sa ilang asosasyon. Agig tubag sa ilang plano, gi-imbitahan sila ni Gob. Bag-ao sa iyang opisina alang sa sunod nilang panagpulong aron sila matabangan ug makapasidad dala ang gikinahanglan nga dokumento sa ilang project proposal adisir nila sugdan ang pagbakery kauban ang buhatan sa DOLE, Department of Trade and Industry (DTI), Technical Education and Skills Development Authority (TESDA), Department of Science and Technology (DOST), ug Provincial Community Affairs Office (PCAO) nga mao’y maggiya kanila sa mga angayang buhaton. (Dinagat Islands-PIO/PIADinagat Islands)