PAGBANSAY SA COFFEE PRODUCTION GIPAHIGAYON SA AGUSAN DEL NORTE

Gihimo sa probinsya sa Agusan del Norte pinaagi sa AGUSAN UP! Coordinating Center kaniaadtong Lunes, Nobyembre 29, ang una sa sunod-sunod nga coffee production training sa Sitio San Jose, Durian, Las Nieves.

Ang naay 20 ka miyembro nga asosasyon sa San Jose New Life Farmers Association nga gipangulohan ni Bongato Arnelio ang mitambong sa pagbansay.

Gitudloan ang mga maguuma sa maong pagbansay sa hustong pamaagi pagpananum og kape ug sa pagmentinar niini.

Mahinumduman nga gibansay ang mga sakop sa maong asosasyon sa Good Agricultural Practice (GAP) ug Farm Planning milabayng bulan. pagbansay sa mga maguuma sa pagtanom og kape kabahin sa paninguha nga makatanum og kape sa 3,000 ektarayas pag-abot sa tuig 2027.

Ang maong 3,000 ektaryas nga gipunting tamnan og kape kabahin usab sa gipunting nga 125,000 ektaryas nga matamnan og siyam ka priority high value crops ubos sa Plant! Plant! Plant! sa AGUSAN UP!, ang kampanya sa pagpalambo sa administrasyon ni Gob. Dale Corvera kaabag ang buhatan ni Kong. Angel Amante-Matba.

Pinaagi sa maong mga plantasyon isip tinubdan hilaw nga materyales, gipunting nga motumaw ang mga processing activities.

Usa sa mga processing projects nga gipahiluna karon ubos sa Process! Process! Process! Project sa AGUSAN UP! gamit ang kape mao ang “Coffee Net”, usa proyekto nga mo-proseso og soluble o instant coffee ug mopalambo usab og merkado alang sa liso ug ground coffee sa mga maguuma sa kape sa probinsya.

Himoon ang sunod nga pagbansay ugma Disyembre 2 sa Buenavista, Disyembre 6 sa Santiago, Disyembre 9 sa Jabonga ug Disyembre 15 sa Kitcharao.

Kaabag sa maong pagbansay ang Rural Agro Enterprise Partnership for Inclusive Development (RAPID) and Growth Project sa buhatan sa Department of Trade and Industry (DTI)Agusan del Norte. (Shena Mae Pabia ug Rotchelie Salas/Saralee Diez, LGUAgusan del Norte/PIAAgusan del Norte)