BAG-ONG TRAFFIC REGULATION SA CABADBARAN IPATUMAN

Aduna nay gipagawas nga bag-ong traffic regulation ang lokal nga panggamhanan sa syudad sa Cabadbaran human naaprobahan sa Sangguniang Panlalawigan ang duha ka ordinansa nga nagpatuman niini.

Ubos sa City ordinance No. 2021-029 sa syudad sa Cabadbaran ipatuman ang one-way traffic routes sa mga kadalanan nga naglibot sa Rizal Park sa maong syudad.

Ang mga dalan nga ipatuman ang one-way routes mao ang mosunod: a. Garame street (gikan sa corner Garame street ngadto sa E. Curato Street), b. E. Curato Street (gikan sa corner E. Curato Street ngadto sa funcion Street), c. Funcion Street (gikan sa corner Funcion Street ngadto sa Cabiltes Street), d. Cabiltes Street ( gikan sa corner Cabiltes ngadto sa Garame Street).

Sa laing bahin, ubos sa City Ordinance No. 2021028 gi-regulate usab sa syudad sa Cabadbaran ang exit ug entry sa tanan sakyanan sa Manlapaz Street sa maong syudad.

Matod pa sa maong balaod nga supak sa bisan unsang sakyanan ang paglatas sa exit ug entry sa tanan sakyanan nga molabay sa PanPhillippine Highway nga mosulod sa Manlapaz Street, mga sakyanan nga moagi sa Manlapaz Street aron moliko sa wala paingon sa F.C. Dagani Street, ug sa tanang sakyanan nga motabok sa Manlapaz Street paingon sa Pan-Phillipine Highway (Cabadbaran-Surigao Route).

Dugang pa, nga ang exit ug entry regulation aplikable lamang sa Lunes hangtod Dominggo gikan 7AM paingon 8PM. Ang makasupak sa maong mga balaod adunay ipahamtang nga silot mao ang mosunod: First Offense- PhP300, Second Offense- PhP500, ug Third and Succeeding Offenses- PhP1,000. Tuyo niini nga masiguro ang kahapsay sa dagan sa trapiko ug malikayan ang paghuot sa mga sakyanan ug sa mga posibleng aksidente sa maong kadalanan. Base sa rekomendasyon sa duha ka komitiba sa Committee on Law, Ethics and Good Government ug Committee on Energy and Transportation diin chairperson sila bokal James T. Reserva ug Erwin L. Dano, ang maong mga city ordinance naaprobahan atol sa sesyon regular sa SP niadtong Pebrero 7. (LGUAgusan del Norte/PIAAgusan del Norte)

Grain dryers nga gipadangat sa AgNor dakung tabang sa mga mag-uuma

Duha ka grain dryers nga gi turn-over sa probinsya sa Agusan del Note ngadto sa Maningalao-Lingayao Agriculture Cooperative (MALICO) sa Las Nieves nakita nga nagpataas sa ginansya og kita sa mga mag uuma.

Ang kooperatiba nagdagan sa hapit tulo na ka tuig nga adunay kapin 160 ka miyembro.

Sumala ni Nicamel G. Bajao, ang chairman sa kooperatiba, ning panahon diin nag sige og ulan, daku kaayo og tabang ang duha ka grain drain dryers tungod mas napasayon kanila ang pagpauga sa mga mais ug humay.

Dugang ni Bajao niadtong wala pa ang mga dryers nakasinati og kalisod nga kahimtang ang mga mag uuma sa pag mano-mano sa pag bulad sa mga mais ug humay.

“Sa ako nga experience, sauna nga wala mi dryer, halos ang mga farmer manggihilak tungod daghay reject ug di na dawaton, manglagom,” sumala ni Bajao.

Sumpay ni Bajao nga sa dugay nga panahon nga gipangandoy sa kooperatiba niabot ra gyod ang mga ekwipo ug ila kining ampingan para molahutay ug mo dugay pa kini. Dako pod og kalipay ni Bajao tungod kay sa mga ekwipo nakita niya nga mas nahimong aktibo ang mga miyembro.

Gi planohan sa maong kooperatiba, human nilang nakita nga dako ang kahimoan sa maong mga himan, sunod nilang lakang ang ‘buy and sell’ aron mas mo angat pa ilang ginansya ug pundo.

Gipaabot usab ni Bajao iyang pagpasalamat sa probinsya nga napilian sila sa paghatag sa mga ekwipo.

“Dako kaayo ko og pasalamat sa probinsya sa Agusan del Norte labina kay Gov. Dale B. Corvera, nga iyang gitugot ang paghatag diri sa amoa kining duha ka grains dryer nga sa pagka karon grabe ka gamit kaayo sa amoa, grabe ka useful labina sa panahon nga ting ulan.”

Mahinumdoman nga gi turn over sa probinsya ang maong mga ekwipo miaging sa nobyembre.

Ang pagpadangat og mga ekwipo ngadto sa mga mag uuma sa probinsya isip suporta kalabot sa programang Food Security Enhancement sa AGUSAN UP!, ang kampanya sa pagpalambo sa admnistrasyon ni Gob. Corvera kaabag ang buhatan ni Kongresista Angel Amante-Matba. (Shena Mae Pabia/Miguelito Velasco, LGU-Agusan del Norte/PIAAgusan del Norte)