DA CARAGA GITURN-OVER ANG MGA LISO SA GULAY ISIP TAMPO SA FOOD BASKET PROJECT SA AGUSAN DEL NORTE

Gi-turn over sa Department of Agriculture – Caraga kon DA Caraga sa probinsya sa Agusan del Norte pinaagi sa Agusan Up Coordinating Center ang nagakalainlaing liso sa gulay nga magsilbing tampo niini sa “Food Basket” project nga hiniusang gipahiluna sa probinsya, sa munisipyo sa Kitcharao ug sa mga maguuma sa gulay sa lungsod mismo.

Ang maong mga liso gitagana alang sa pito sa napulo ka ektaryang mga luna sa Kitcharao ug uban pang mga lungsod sa probinsya, ang inisyal nga gidak-on sa gulayan nga inisyal nga ipalambo ubos sa proyekto.

Ang “Food Basket” mao ang Core Processing Project sa lungsod sa Kitcharao. Kabahin kini sa Process! Process! Process! Project ubos sa AGUSAN UP!, ang kampanya sa pagpalambo sa administrasyon ni Gob. Corvera kaabag ang buhatan ni Kongresista Angel Amante-Matba.

Kabahin sa proyektong “Food Basket” ang pagpalambo og 500 ektaryas nga gulayan sa tibuok probinysa hangtud sa tuig 2027, pagmontar og vegetable processing facilities nga mogama og vegetable powder, juices, nutrition packs ug uban pang preparasyon sa gulay ingon man ang pagpahiluna og mga marketing facilities and networks sa probinsya, sa Caraga ug sa gawas sa rehiyon”.

Gawas sa DA, sa probinsya, sa munisipyo ug mga maguuma sa gulay, motabang usab ang Department of Trade and Industry – Agusan del Norte, ang Technical Education and Skills Development Authority – Agusan del Norte ug uban pang mga ahensya pagpahiluna sa maong proyekto.

Apil sa nagsugod na og tanum og gulay karon mao ang mga sakop sa Small Coconut Farmers Beneficiaries Multipurpose Cooperative, Zapanta Valley Bisaya Organization, Zapanta Valley Farmers Association, Zapanta Mamanwa Manobo Association, San Isidro Farmers Association ug mga mag-uuma sa Hinim Bangan ug Mahayahay. (Shena Mae Pabia, LGU Agusan del Norte/PIA Agusan del Norte)