MOKABAT 995 BUNDLE SA ‘TIGER GRASS PANICLE’ GITUNOL NGADTO SA MGA MAG-UUMA SA LIBJO

Agig tubag sa panginahanglanon ug panginabuhian sa mga lumulupyo sa Barangay Rosita, Libjo, pormal nga gi-turnover sa provincial government ngadto sa MacArthur Farmer Entrepreneur Association (MAFEA) ang 995 bundle nga tiger grass panicle nga gamitong materyales sa paghimo og soft broom o silhig nga lanot.

Kini nga mga materyales gikan pa usab sa mga Sumilao farmers sa Bukidnon nga nikabat sa kantidad nga P121,500.00 diin gipondohan sa provincial government para sa dugang panginabuhian sa mga myembro sa MAFEA nga niabot niadtong May 31, 2021 sa Sitio General McArthur.

Dako ang kalipay sa miyembro sa MAFEA diin nahatagan sila og suporta gikan sa gobyerno ilabi na sa inisyatibo ni Gobernador Kaka Bag-ao sa paghatag sa ila og kahigayonan nga makigbahin sa pagpalambo sa ilang asosasyon pinaagi sa paghimo og silhig nga dakong tabang sa ilang panginabuhian ilabi na nga padayon giatubang ang krisis sa COVID-19. Lakip nga gipasalig niini nga ilang paningkamutan nga mapalambo ug mapahimuslan kini sa kinatibuk-ang miyembro sa ilang grupo og makahatag sa ila og mas tawhay ug luwasnon nga panginabuhian nga dili supak sa balaod ug dili makadaot sa kinaiyahan.

Usa lamang kini sa mga padayong lakang sa provincial government sa paghatag og igong pagtagad sa mga People’s Organization (PO) ilabi na sa mga mag-uuma ug mangingisda nga usa sa mga sektor nga nagsiguro nga adunay

seguridad sa suplay sa pagkaon ang katilingban ilabi na sa panahong adunay gisagubang nga pandemya.

Hugot usab kining gisuportahan sa buhatan sa Department of Environment and Natural Resources (DENR) pinaagi kang OIC PENRO Agapito T. Patubo diin gihatag usab niini ang 100 ektarya nga luna nga nahisakop sa National Greening Program (NGP) aron mas mapahalapdan ang area pagpananom sa tiger grass nga ilang ugmadon alang sa mas daghan nga produktong pang-agrikultura nga maoy tinubdan sa ilang pang adlaw-adlaw nga panginahanglanon.

Tumong ug katuyoan usab niini ang pagpangilabot sa mga katawhan sa pag-amuma sa mga kakahuyan ug magsiguro nga mapanalidpan ang mga watershed area sa naasoy nga lugar samtang hugot nga giimplementar ang projekto nga magpalambo sa ilang panginabuhian.

Lakip usab niini ang dugang pang tabang gikan sa provincial government pinaagi sa mga buhatan sa Provincial Cooperative Development Office (PCDO), Provincial Community Affairs Office (PCAO), ug ang Office of the Provincial Agriculturist (OPAG) nga nagsiguro alang sa mas hapsay nga kadumalahan sa ilang asosasyon pinaagi sa paghimo sa haom ug plastar nga operation manual ug business policy, ug maghatag sa ila og igong kaalam ilabi na sa pagdala sa ilang financial statement ug dugang kapasidad sa pagpanindot sa kalidad sa ilang proyekto, magtudlo sa insaktong marketing strategy ug product development. Sa dugang bahin nakadawat usab ang mga miyembro sa MAFEA og foliar fertilizer ug pipila ka mga seedlings sa petchay, kangkong, okra ug sweet corn.

Gitudlo-an usab sila sa insaktong pamaagi sa pagtanom sa 30-day seeds og paggamit sa abono alang sa mas abundang harvest sa ilang mga tanom.

Kahinumduman, si Gob. Bag-ao ang abugado sa kaniadto sa Sumilao farmers sa ilang pakigbatok alang sa agrarian reform. (Dinagat Islands-PIO/PIA-Dinagat Islands)