DUGANG BAKUNA SA COVID-19, NADAWAT SA SURIGAO DEL SUR

Montesclaros

Nakadawat na usab ang probinsya sa Surigao del Sur og dugang bakuna sa coronavirus disease 2019 (COVID–19). Kini ang gikumpirma ni Dr. Eric Montesclaros, ang hepe sa Provincial Health Office sa probinsya.

Sa iyang pakighinabi, gibutyag niini nga miabot ang dugang mga bakuna gikan sa rehiyunal nga buhatan sa Department of Health (DOH) dili pa lang dugay.

Sumala pa nga mukabot sa 5, 500 ka mga doses sa Sinovac vaccine ang nadawat sa probinsya. Gikabutyag nga prayoridad sa mga nadawat nga bakuna ang dakbayan sa Bislig, tungod sa taas nga kaso sa COVID- 9 ang natala sa maong lugar.

Dugang pa ni Dr. Montesclaros, nga sunod semana, gilauman nga mukabat sa 11 – million doses sa bakuna ang muabot dinhi sa nasud. Tungod niini, nanghinaot nalang kini nga sa maong gidaghanon sa mga bakuna, ma–alokaran ang Surigao del Sur og 50–mil ka mga doses.

Una niini, mahinumduman nga gihangyo ni Dr. Montesclaros ang DOH nga mag–alokar og mas daghan pang bakuna dinhi sa probinsya tungod sa nagkataas nga kaso sa COVID–19 labi na didto sa Bislig. (Raymond Samson Aplaya - RP1 Tandag/ PIA-Surigao del Sur)