PARTISIPASYON SA CSOS SA AGNOR, GIHISGUTAN SA FORUM

By Shena Mae Pabia

Bag-uhay pa lamang gihimo sa probinsya sa Agusan del Norte sa kapitolyo niini sa Butuan ang Civil Society Organization [CSO] Forum.

Gihimo kini sa pagpanguna ni Francisco Y. Chan, Jr. isip Chairperson sa Komitiba sa Kooperatiba ug mga Kapunongan sa Komunidad aron magkabayloay og hunahuna kalabot sa papel sa mga organisasyon sa mga kalihukang pangkalambuan sa probinsya, ilabina sa AGUSAN UP!, ang kampanya sa pagpalambo sa administrasyon ni Gob. Dale B Corvera kaabag ang buhatan ni Kong. Angel Amante-Matba.

Apil sa gihisgutan sa forum ang pagmugna og CSO Council ingon man ang mahimong mga oportunidad ilabina sa pagahimo pang aktibo sa mga CSOs pagpatuman na unya sa gitawag nga Mandanas Ruling o ang balaud nga magpadaku sa bahin sa lokal nga panggamhanan gikan sa kita nga mosulod sa nasudnong panudlanan.

“Tinguha ani niya nga ma klaro ug ma plastar ang ilang partisipasyon sa atong pang gobyerno,” sumala ni Eric Phully personahe sa Sangguniang Panlalawigan nga maoy nagpahiluna sa maong kalihukan. Aron maseguro gyod ang partisipasyon sa CSOs, gi gipadayag ni Provincial Administrator Gerry Joey Laurito ang nahisgutan na nila ni Gob. Corvera nga posibleng pagpamugna og CSO Desk sa usa sa mga operating units sa probinsya.

Gipasabot usab sa mga CSOs sa maong forum unsa gyod ang AGUSAN UP! ug unsa ang posibleng mahimo nilang papel. (LGU Agusan del Norte/ PIA Agusan del Norte)