Proyektong “Country Wood” isip flagship project sa Agusan Norte, padayong gihisgutan sa probinsya, mga ahensya ug buhatan ni Kongresista Corvera

Laing panaghisgut ang gipahiluna sa buhatan ni Kongresista Dale B. Corvera karon, Oktubre 13, kalabot “Country Wood” isip usa sa mga convergence economic development projects aron moangat ang kahimtang sa pagpuyo sa mga residente sa distrito.

Kauban na sa panaghisgut ang mga buhatan sa Department of Environment and Natural Resources (DENR), Department of Science and Technology (DOST) ug sa Provincial Planning and Development Office (PPDO).

Una na nga nakatambong sa mga panaghisgut ang Department of Trade and Industry (DTI) Technical Education and Development Authority (TESDA) ug ang Department of Labor and Employment (DOLE).

Nakita nga daku kaayo ang potensyal sa industriya sa kahoy nga makamugna og daghang trabaho ug dakung bahandi nga mahimong tinubdan sa pagangat sa kita sa mga tawo aron mokunhod ang kapobrehon sa probinsya.

Kab-oton kini pinaagi sa pagpursige sa proyektong “Country Wood”, usa sa mga proyekto ubos sa programang Process! Process! Processs! ug pagpananum sa gamitong hilaw nga materyales sa 100,000 ektaryas sa productive forest zone ubos sa

programang Plant! Plant! Plant!, tanan ubos sa kampanyang Agusan Up!

Gisugdan ni Kongresista Corvera ang kampanya sa Agusan Up! sa gobernador pa siya ug padayong niya kining gipahiluna katambayayong ang administrasyon ni Gob. Angel Amante-Matba.

Sa panaghisgut karon, gisuportahan sa tanan ang pagpursige sa proyekto. Giako sa DENR ang pahimo sa inbentaryo sa mga nagbarug nga kahoy karon, ang mga luna nga tamnanan pa ingon man. Giako usab sa DTI ang pagtuon sa merkado sa nauyonan ug makita pang mga value-adding products ug sa DOST, ang pagtuon sa haum nga teknolohiya ug makinarya.

Daan na nga mikometer ang TESDA nga maoy mopahiluna sa gikinahanglang pagbansay, ug ang DOLE, alang sa mga trabaho sa tree farmers nga pwedeng suooortahan ubos sa cash-for-work progran niini.

Apan pipila ka sugyot ang milutaw apil na ang gipadangat ni Regional Director Noel Ajoc sa DOST nga himoon sa mosunod nga mga adlaw pipila pa ka pagduki-duki kalabot sa pagtanum ug value adding products aron maseguro nga magmalampuson kini.

Naay usab nakita nga angay ipahaum nga mga nasudnong polisiya ug nakita nga matubag kini sa plano ni Kongresista Corvera nga mopasaka og “Timber Corridor Development Bill” Padayon ang project development ug corporate set-up development sa maong proyekto sa koordinasyon sa PPDO ug sa buhatan ni Kongresista Corvera. (hulagway ni Nibika Calixtro ug John Henry Balansag, LGU Agusan del Norte/PIA Agusan del Norte)