DOLE SEC. BELO NANGUNA PAGPADANGAT OG SUPORTA SA MGA PROYEKTO NGA PAGPAHILUNA SA AGNOR

Nanguna si Secretary Silvestre H. Bello sa Department of Labor and Employment (DOLE) sa pagpadangat sa Cabadbaran City Gymnasium sa Financial Assistance ug payout salary sa mga benepisyaryo sa Tulong Panghanapbuhay sa Ating Displaced Workers (TUPAD), usa ka programa diin katambayong ang probinsya sa Agusan del Norte sa pagpatuman. Niini, mapasalamaton kaayo sila si Gobernador Dale B. Corvera, Kongw. Angel Amante-Matba ug Mayor Judy Chin Amante nga mitambong sa maong okasyon isip hosts sa mibisitang sekretaryo sa nasudnong ahensya. “Ako lang ipaabot niya (Secretary Bello) ang dakong pasalamat, nia karon ang programa sa TUPAD ug uban pang programa sa Department of Labor and Employment, dli lang ordinaryo nga pagbisista, dala pgyud siya ug daghan ayuda para kanatong tanan dinhi sa atong probinsya,” sumala ni Gob. Corvera.

Dugang ni Kongw. Amante-Matba nga “Dako kaayo og tabang aning programa sa TUPAD… ang tabang nga gikan sa atong nasyonal nga gobyerno under kang President (Rodrigo) Duterte. Ubayubay nga taga Agusan del Norte gyod ang natabangan ani.” Ang mga organisasyon nga nakadawat og suporta sa ilang mga livelihood projects mao ang mosunod: P702,990.00 alang sa

proyektong ‘Organic Fertilizer Production’ sa Jaliobong Masipag Farmers Association sa Kitcharao; P995,320.00 alang sa ‘Bangayan Sustainable Livelihood Project’ alang sa tulo ka organisasyon sa Sitio Zapanta Valley nga mao ang Zapanta Mamanwa Manobo Asoocitaion (ZAMMA), Zapanta Valley Bisaya Organization [ZABIOR] ug Zapanta Valley Farmers Association (ZAVAFA). Mokabat usab sa 170 ka benepisyaryo ang nahatagan og sweldo, 96 kanila gikan sa syudad sa Cabadbaran, 50 sa Brgy. Cabayawa sa Tubay ug 24 sa Brgy. San Isidro sa Santiago. Ubos sa TUPAD Program nga gipundohan sa DOLE, mo-trabaho ang mga benepisyaryo sulod sa 15 ka adlaw ug sweldohan kini sila og P320 matag adlaw. Mapasalamaton ang mga benepisyaryo sa nadawat nga sweldo tungod kay sumala pa kanila daku kini og tabang tungod kay nagsilbi kining usa sa nahimong tinubdan sa ilang kita. Mapasalamaton usab ang mga organisasyon nga nagahinan og pundo alang sa ilang mga proyketo sa panginabuhian. “Dako kaayo og kalipay namo nga nahatagan mi ani nga benepisyo, gihatagan mi ani nga kantidad para maabot namo ang makinaryas nga among ginahambin, nga maabot namo,” sumala pa ni Brgy. Captain Edwin Montante sa Jaliobong, Kitcharao kalabot sa financial assistance alang sa proyektong Organic Fertilizer Production. “Makahatag kini kanila og dugang kita o income sa ilang pagpuyo sa zapanta valley ug mo kita og maayo nga mabuhi sila,” matud ni Dr. Raul M. Del Agua Municipal Administrator ug Municipal Environment and Natural Resource Officer sa Kitcharao.

Mitambong usab sa maong okasyon sila Hans Leo J. Cacdac, OWWA Administrator, DOLE Undersecretary Atty. Benjo Santos M. Benavidez, DOLE Undersecretary Renato S. Ebarle, BWSC Director Atty. Ma. Karina PeridaTrayvilla, DOLE-Caraga Regional Director Joffrey M. Suyao, Assistant Regional Director Naomi Lyn Abellana, Provincial Planning Coordinator ug Provincial PESO Manager Tomas O. Tener, Cabadbaran City PESO Manager Estelito De Vera, ug uban pang Provincial/City/ Municipal/Barangay Officials ug mga kapulisan. (Shena Mae Pabia ug Reymar Reyes, LGU Agusan del Norte/ PIA Agusan del Norte)