100 migradwar sa mga pagbansay sa TESDA, Kongresista Corvera gipaniguro ang makanunayong suporta

Gipaneguro ni Kongresista Dale B. Corvera sa Agusan del Norte 2nd District atol sa graduation sa 100 ka lumulupyo sa Syudad sa Cabadbaran sa mga pagbansay pangpanginabuhian kaniadtong Oktubre 11, nga makanunayon ang mahimong suporta sa iyang buhatan aron moangat gyod ang kahimtang sa pagpuyo sa daghan sa mga Agusanon.

Niini, giaghat sa kongresista ang mga migradwar nga gamiton gyod nila ang ilang natun-an aron mahimong produktibo ug moangat ang ilang tagsa-tagsa ka kita, sumala pa sa mensahe nga nga gipadayag sa representante sa iyang Congressional District Office.

Ang mga migradwar sa mosunod nga mga kurso nga modawat usab sa ilang tagsatagsa ka toolkit mao ang mosunod: Bread Making Leading to Bread and Pastry Production II, 25 gikan sa Barangay Puting Bato ug 25 usab sa Barangay Mahaba; Service Motorcycle/Small Engine System (Leading to Motorcycle for Small Engine Servicing NC II, 25 sa Puting Bato ug 25 sa Mahaba.

Ubay-ubay pa ang giplastar sa buhatan ni Kongresista Corvera nga mga pagbansay, daghan niini katambayong ang TESDA. Sentro sa maong mga pagbansay mao kadtong makahatag og kahanas lambigit sa pagpalambo sa processing sa mga commodities nga mopalambo sa industriya sa kahoy, kape, cacao, lubi, saging, bulanghoy, rubber, mangga ug ubang prutas. (hulagway kuha ni Oliver Guardion/ Agusan del Norte 2nd Congressional Office/PIA Agusan del Norte)