Baliskad

Nico Greg Gaitano

Gagaragitnit ang katre ko nga human sa kawayan sang ginhaplak ko ang akon mabug-at nga likod sa hiligdaan. Nakahanda na tani ang akon panumduman magsulod sa kalibutan sang mga damgo apang daw matabog man ang akon espirito sang may ara ako nabatian nga ga hagikgik halin sa pader. Gin tung-tong ko ang akon mga tiil sa salog, gin suksok ang akon tsinelas kag nag nag gwa sa akon kwarto samtang ang akon mga mata indi pa syado maka muklat. Gin sundan ko ang mga “Ahahaha!”, “Ahihihihi!” kag mga “Ahuhuhuhu!” pakadto sa pihak nga kwarto.

Ginbuksan ko ang pwertahan, ginwahig ang kurtina nga gatabon kag nakita ko ang isa ka lalake nga gakurinot ang panit nga gapangarumbot samtang may plaslayt sa iya tuo nga kamot. Nabatian niya ang pagkaluskos sang akon gasangyod nga mga tikang, nag tulok siya sa kung diin ako ga tindog kag nag siling, “Day? Nakibot ka? Palapit di bala may ipakita ako sa imo.” Ga tuon ang iya suga sa idalom sang iya madamol nga habol, kag wala ang tigulang untat sang pag harukhok.

Wala ko gin sapak ang iya pag-imbita, nagbalik ako sa akon gina tulugan kag gin panumdom ang rason sang iya kalipay sa pag tan-aw sa idalom sang iya habol. Wala ko nanutaran ang pag piyong sang akon mga mata kag aga na sa akon pag muklat.

Gin balikan ko ang kwarto sang akon Lolo, hamu-ok siya nga gapahuway kag kasami niya mag igham sang iya tutunlan kada pila ka huragok. Gin angkon ko ang opurtunidad samtang wala pa siya sang animo, gin pudyot ko ang punta sang iya habol gamit sang duwa ko ka tudlo kag sang akon ini gin hakwat sa makadali, gulpi nag siga ang mata sang tigulang. “Gaano ka di?! Palayo! Palayo! Napiyongan na ko! Budlayan naman ko ni liwat mag tulog!” Katingil sang iya tingog kung na-irita. “DAY! Kung gakatulog bala ang Lolo mo, pabay-i!” singgit sang akon Iloy halin sa kusina. “Kwaa di siya gani, Rosita! Kung wala ko siya gin saway, nakuha niya na tani ang akon nga habol!” sabat sang akon Lolo. “Day, bugtaw ka naman gali tani diri ka nag diretso sakon kay maluto ta sang pamahaw.”

Pa-atras ako nga nag lakat pagwa sa sira kay daw indi makakas ang akon panulok sa habol sang

akon Lolo. Gin tahi ini kano sang amon Lola sa iya bag-o siya nag una taliwan pero nga-a biskan espesyal ang akon Lolo sa iya, gin bilinan niya ini sang isa ka trapo? Ang disenyo sang ini nga madamol nga tela daw puro lang mga hilo nga gin pang burambod, may gamay nga puti, itom, pula kag may mga kurit sang yilo kag berde. Biskan ano mo ka dugay himutaran ang habol ni Lolo, indi mo mabal an kung ano ang iya buot silingon.

Dasig lang nga nag labay ang mga inoras, kag nagbalik nanaman ang kadulom. Gin plastar ko ang akon ulunan, gin humlad ang akon nga habol kag gin buksan ang akon bintana agod ang kabugnaw sang hangin makasulod. Sang mga tungang gab-i may ara ko nabatian nga salakyan nga nag pundo sa tubangan sang amon balay, kadungan sang pag abri sang pwertahan namon sa sala ang pag lagatik sang stretcher sa kada salapay ini sa mga aparador kag pader. Wala na ko nag muklat sang akon mata kag wala na ko nagbangon tungod nagbalik man ang kalinong pagkatapos sang pila ka minuto.

Sunod nga adlaw, nakita ko ang akon iloy sa kusina nga gina pahidan ang iya gaparamula nga mata samtang gapang kihad sang mga sibuyas. Gin paypay niya ako para mag palapit, kag gin hakos niya ako sang tudo-tudo. Daw may gin hutik siya sa akon dalunggan samtang gaungol sa iya pag ginhawa.

Nakakawala ako sa iya pag gapos, ga binalansuli ang akon mga paa samtang pakadto sa gina higdaan sang akon Lolo. Wala na didto ang tigulang apang ang damol niya nga habol nagpabilin kag gasangyod sa salog. Gin kuha ko ang daw trapo nga gina tabon niya sa iya lawas, kag sa akon pag paspas sang ining yab-ukon nga tela, nagsungaw ang isa ka baho nga gin simpon nga ihi kag sinuka.

Gin dala ko ang habol sa bumba kag gin huluman ini sa labador nga gin simpunan ko sang habon nga labada. Nag kuha ako sang isa ka lata kag gin himo nga pulungkuan, gabika-ka ako samtang gina bras ang mga mantsa sa habol ni Lolo.

Sang akon na ini pagahalayon, may ara ako nanutaran. Isa ka hardin nga madamo sang prutas, may babaye kag lalake diri kag isa ka man-og, may dako nga barko nga galutaw sa tunga lawod samtang gabagyo, may ara pagid ako nakita nga mag-asawa nga tigulang nga ga kapyot sang isa ka lapsag, may buranguson nga lalake nga gakapyot duwa ka bato kag diri nakasulat pulo ka kasuguan. May mga hari, mga pari kag mga gyera. May mga dagat nga nag tunga, may gakalayo nga tanom pero wala gakasunog, may mga pagpangilat kag mga anghel. Pero sa tunga-tunga sini tana may ara sang isa ka dugu-an nga lalake nga naka bitay sa mga kahoy nga korte krus. May mga bulag nga nakakita, mga pi-ang nga nakalakat, mga aro-on nga nag alalayo, ang mga patay nabuhi liwat kag may ara pagid ko nakita isa ka lulubngan nga wala unod. May mga mensahero nga nag kadto sa lain-lain nga parte sang kalibutan nga gasige kalipay biskan gina hingabot sila sang ila mga kaaway. May nakita ako nga mga tawo nga ginahaboy sa isa ka madalom nga buho nga kung diin may gadaba-daba nga kalayo nga wala gaka upos. Kag may ara man ako nakita nga lugar nga bulawan ang salog, krystal ang tubi kag puno ang mga pader sang mga diamante, sa pinaka ibabaw sini may Hari nga gapungko sa gabana-ag nga trono. Ang tanan nga tawo ga dayaw sa Hari kag gina tawag Siya nga Karnero sang Diyos.

Nadula ang pwersa sa akon mga tuhod, ang akon hitsura ara na sa lutakan, gatulo akon mga luha samtang kusog-kusog ang akon paghalak-hak. “Baliskad! Hahahaha. Tingala man ko indi ko maintindihan kay ang pag tan aw ko gali suli! Hahahahahaha!”