2 minute read
Column Vivianne Rijnders
Advertisement
Vastelaovend same!
RIJNDERSVivianne
COLUMN
Mie es die drei daog
Ze haange weer bove alle deure: de roed-geelgreun veendels! Mestreech is oonderweeg nao Vastelaovend. De kaw in m’n kneuk smèlt weg, iech krijg confetti in mie blood. De stad is z’ch aon’t pripperere!
Veureg jaor zaote v’r nog in oonzekerheid; maag ’t wel, maag ’t neet? ’t Vollek vaan Mestreech zaot veur d’n tèllevisie um te zien wee us veur zouw goon in de Vastelaovend, in plaots vaan ’t benkelek momint op ’ne bomvolle Merret te beleve. Dao waor gei Prinsebal, gei kinderfies, geinen traditionele machseuverdrach. Meh toen … De vriedag veur Vastelaovend mochte v’r inins toch! Iech vergeet ’t noets; dao stoonte v’r daan, gans oonweneg mèt e pèlske in de hand tösse versjrikkelek väöl lui. Zoe väöl lui. Zoonder waffellepke. Zoonder anderhave meter aofstand. Vreemp en e bitteke benkelek meh zoe fijn! Vastelaovendsmeziek späölde en toen Henri vaan de Struys mèt e straolend geziech oet ’n vinster bove z’ne kaffee hóng, stoonte v’r mèt traone in de ouge en sjevraoje lepe langs euze straank. ’t Waor éch veurbij, v’r móchte weer! En v’r voolte tot v’r leefde.
FOTO'S Jean Pierre Geusens
Eus tradities weure weer opgepak. Esof ’t noets aanders is gewees. Gigantius en d’n Ingel hele e groet oug in ’t Vastelaovendszeil bij ’t oetrope vaan euzen Hoegen Hoeglöstegheid. De ganse Merret sjitterde en glitterde. ’t Maske waor nog op meh Mestreech zaog ’t al: v’r kriege ’ne gooje! Zoe wie eder jaor. Zate Hermeniekes späölde de stare vaan d’n hiemel. En v’r höbbe weer e Prinsebal, De Zeuten Inval en ’t Kinderfies. De Vastelaovendspripperatie is aon de geng!
Vastelaovend is väöl mie es allein die drei daog. Nao Drei Keuninge begint ’t al. De keersboum is koelek droet of d’n tied vaan haldaldaldei is begonne. Hermeniekes rippetere en ’t leedsje weurt geoefend. Mien kleuters vertèlle miech wie ze z’ch goon verkleie en de kinderkes die veur ’t ierste jaor in eus stad woene, perbere v’r te verdutse wat Vastelaovend is. Meh dat is lesteg. De mós ’t mètmake, de mós ’t zien, veule en beleve.
En daan geiste die kis oethole. Die vastelaovendskis vol historie en memorie. Este ze ope deis … Dee reuk! Versjaold beer, e vaag rouklöchske, get mufs. Alles is gewasse of heet daog boete gehaange en toch, die loch. Heerlek. Lekker drin sjravele en wie ’t kint snapste neet meh in ’n mum vaan tied ligk euveral confetti. En dao is de reiperok, ’t boontjeske. ’nen Hoege zije en boa’s in alle kleure. Wat zouw iech dit jaor ’ns aon doen? Goon v’r mèt in de cortège of goon v’r loere? Iech maak alvas mie Vastelaovends-kemissielieske. Spek mèt ei, alles um zoervleis te make, kies en weurs veur in de wagel op ’t plein. En ’n nui sjminkdoes.
.Jao, Vastelaovend is väöl mie es die drei daog. Die ganse pripperatie, die ganse traditie. Dat verheuge drop. Deen tied vaan hermeniekes in de stad, vaan prinse en plezeer, vaan ’t leve viere. Geef ’t door, haw de Mestreechter Vastelaovend in iere, haw de Mestreechter Geis levend. Laot ’t neet verlore goon meh laot uuch en eur kinder betouvere. Daan kint g’r allemaol weer e gans jaor laank de tege.
