E piki ki piki mai rawea - Nā Tonga Karena

E huaina ana te taupānga a PKW ki te ingoa a Piki Mai Rawea me te whakaaro iho kia rite te mahi o tēnei taupānga ki tā Māui-mua, arā, he tuku i tana aho, ko te Rangitukutuku kia mau ai i a ia te ika roa, te ika whenua nei - ki tana matau a Piki Mai Rawea. Ka ara ake ko te ika whenua e noho nei tātou ko te kāhui tāngata. Nō muri mai i te aranga ake o te ika nei, ka rokohina ake ko te ika i whakaraua kutikuti pekapeka, ā, ka takoto whārōrō, ka kōkōiawa, ka pukepuke, ka mania iti, ka mania roa, ka papa kōhukehuke, ka reporepo, ka pīnekineki, ka tītohea. Ka rite te ika nei hei noninga kumu mā te tāngata, hei tauranga tūahu mā te kāhui tohunga, hei urupā i te pō, hei ūkaipō i te ao. Ka tongikuratia ai e te kāhui Māui, ka tongikuratia ai e te kāhui tāngata. I konā rā, ka awhiawhi iho i te mouri o tēnei ika whenua i tāirihia ai ki ngā whare tūranga kōrero o Taranaki, i tērā i ōhākītia mai ai e Jamie Tuuta, ā, ka kitea te hāngaitanga, ka mutu, ka amohia ake tēnei kura hei kura tukutuku, hei kura whakaipuipu i te mahara a te tāngata.

Ka karapīpiti te noho ki a Kiwa i te marama o Poutūterangi i te tau 2022 kia upa ai te mahi tahi, ka tītoko ake te whakaaro kia hīmata ake i te whakawhiti haere o īmera atu o īmera mai, ka tau i reira he aha te momo nene e mōmona ai te tāmure, ā hea rawa e whati ai te tai kia pao ai te torea, kei hea kē hoki te pāua ki roto i te pitorua. Ka ākirikiri i a hāngaikore, ka murumurua i a takoto-hē, ka pai māriretia atu ki a whakaihoiho-te-hua, ka pūtētia mai ko mārewawhakanikoniko. Ka ea i kona kāpā iana he parawai tōna rite. He pounga waihoe ki te moana o te kimi whakaaro, he rāhirihiri i a Tāne-te-waiata, he rūmenemene i a Hine-teīereere, he oha ki te patu o manawaroa, he taurima i ngā whare kōrero i aitū kia kotahi ai ki roto i te pūnanga tapu o te whakatonu.

Nō te tautanga ki a Paraukau ki Waiōkura ki roto i a Ngāti Tū ki te hui-ā-tau, ka māunu te taniwha i te rua kōhā, ka rarapa i reira ko te ahitūrama kia taumauritia ai te taupānga nei a Piki Mai Rawea. Ka takapou whārikitia ko tana kaupapa, ka aurere te taimihimihi ki tēnā, ki tēnā, ka whātoro te ringa tāngata ki te pūkoro kia whāwhāria ai te taonga tapu nei o te waea pūkoro. Ka whāia ngā tohutohu kia pai ai te onokia atu te taupānga nei ki te waea, taro kau iho, kua rāwekeweke, kua korikori, kua kopikopi i te whakaminenga ngā kōrero e whata ana ki runga i te taupānga o Piki Mai Rawea. Kua mau te ika, kua hī ake rā te ika tāngata i a Piki Mai Rawea. Ko tā rātou ināianei he kutikuti, he pekapeka, he whakaraua. Ko tā PKW, he whakapoapoa, he whakawaiwai kia mārō tonu ai tēnei momo taura kukume i te wairua tāngata kia piri mai ai ki ngā toi huarewa o Piki Mai Rawea. E rarau e te iwi ki te taonga nei o Piki Mai Rawea!