SOGN NÆRING 2007 - 2022
Strategiprosessar - og nesten eit namnebyte Sogn Næring hadde strategiplanar som gjekk i treårsbolkar. Då planperioden 20142017 var avslutta, vart det i 2018 sett i gang ein prosess for ein ny handlingsplan. Administrasjonen la opp til ein relativt omfattande planprosess, der både kommunar og næringsliv skulle bli involverte. Dei ynskte også at nytt strategidokument skulle ta omsyn til at selskapet kunne få ei anna rolle ved etablering av nye Sogndal kommune, og at den nye strategien skulle reflektera dette, sjølv om det enno ikkje var klart korleis kommunen ville organisera næringsarbeidet. Styret gav aksept for å hyra inn ekstern, profesjonell hjelp til dette arbeidet. Den vart likevel ikkje meir ekstern enn at det vart gjort avtale med konsulentselskapet Grow, ved ein av initiativtakarane til Sogn Næring og første styreleiaren, Atle Stalheim. Opphavleg var det tanken at strategiarbeidet skulle gå føre seg og bli avslutta i 2018, men på grunn av arbeidet å etablera den nye Sogndal kommune, og enn så lenge eit uavklara spørsmål om kva rolle Sogn Næring skulle ha i den nye kommunen, vart det arbeidd med strategien gjennom heile 2019. Ikkje før 1. april 2020 vart den nye strategien for perioden 2020 – 25 vedteken. I startfasen av arbeidet vart det gjort framlegg om å endra namnet på selskapet til «Brui», noko som vart applaudert av dei lokale kommunikasjonsbyråa Gasta og Dropla. I følgje dei kunne samhandlinga mellom offentleg og privat sektor bli betre om ein gjekk vekk frå namnet «næring», og i tillegg meinte dei det ville vera smart å gå vekk frå eit geografisk namn med ein ny kommunestruktur på trappene. Det ville lettare «gje folk i alle tre kommunar eit eigarskap til prosjekta». Det er ikkje utan vidare lett å skjøna grunngjevinga for desse konklusjonane, men i alle fall gjorde styret for Sogn Næring hausten 2018 vedtak om å føreslå for generalforsamlinga i 2019 å gjennomføre namnebyte i selskapet. Noko slikt framlegg kom likevel ikkje, det vart stilt kring namnebytet. Torgeir Skålid var ikkje tilhengar av å kalla selskapet for «Brui», og – som vi veit – Sogn Næring heiter stadig Sogn Næring. Strategiarbeidet i selskapet vart nøye kopla saman med nye Sogndal kommune sitt strategiarbeid for samfunns- og næringsutvikling. Den nye kommunelova som kom i 2018 gjorde kommunane si rolle som samfunnsutviklarar tydlegare enn før. Lova slo fast at ei av kommunane sine hovudfunksjonar skulle vera å «drive samfunnsutvikling til beste for innbyggerne». I mars 2019 vedtok fellesnemnda for den nye kommunen om at kommunen skulle driva «eit heilskapleg samfunns- og næringsutviklingsarbeid forankra i kommunen sitt planverk, og særskilt i ein strategisk plan for samfunns- og næringsutvikling». Fellesnemnda vedtok at hovudprinsippet i nye Sogndal kommune skulle vera at samfunnsutviklingsarbeidet vart etablert i den kommunale organisasjonen, og det næringsretta utviklingsarbeidet i Sogn Næring. I vedtaket heitte det vidare: • Sogn Næring og nye Sogndal kommune skal etablere eit tett samarbeid, med faste møtepunkt og god informasjonsflyt mellom organisasjonane • Sogn Næring sitt arbeid skal vere tydeleg forankra i definerte handlingsplanar og mandat som føl bestillinga frå nye Sogndal kommune
48
