– Vi treng fleire som Even

Even Snapa er Årets lærling i landbruksmaskinmekanikar-faget i Felleskjøpet. Han er snart ferdig med fyrste året i læra på Felleskjøpet si avdeling på Kongsvinger og er oppteken av traktorar store delar av døgeret, då han driv med traktorpulling på fritida. – Til å byrje med var eg noko bekymra for at Felleskjøpet skulle vere stort og upersonleg, men eg trivs veldig godt, fortel Even.

Inominasjonen står det blant anna at Even har stor interesse for landbruk, og ei særs god teknisk interesse og forståing, og jobbar uvanleg sjølvstendig. Han er ivrig når det gjeld å lære, og flink til å dele sin kunnskap med andre.

– I tillegg til å vere dyktig og proaktiv i faget, viser Even særs gode haldningar til HMS, med godt fokus på en trygg arbeidskvardag, fortel Morten Morken, verkstadleiar på Kongsvinger. Det neste året skal Even representere Felleskjøpet ved ulike høve og fremje mogelegheitene som finnast i selskapet, blant anna på Agrisjå i Trøndelag i august.

Eigne opplæringskontor – Vi treng fleire som Even, fortel Steinar Kristoffersen, direktør Ettermarked. Det er vorte vanskelegare å rekruttere tilstrekkeleg mekanikarar i mange bransjar i Noreg, også i landbruket. Felleskjøpet har i mange år samarbeida med Traktorbransjens opplæringskontor, og dette samarbeidet vil fortsette.

– For å støtte våre verkstadleiarar, og sikre at vi er til stades på dei rette rekrutteringsarenaene og frontar Felleskjøpet, våre maskiner og mogelegheitene som finnast i selskapet, opprettar vi no i tillegg opplæringskontor i fylka. Så langt har vi fått godkjenning i Viken, Innlandet og Trøndelag. Saman tek vi vare på lærlingane våre og sikrar rekruttering av viktige ressursar til våre verkstader, forklarer Kristoffersen.

Kvart år tek Felleskjøpet inn om lag 40 lærlingar ved våre verkstader, med gode høve for arbeid og vidare utvikling. Lærlingane får opplæring i høgteknologiske maskiner og reiskap, og har varierte arbeidsdagar.

— Felleskjøpet er til stades i heile landet og tilbyr gode vilkår og fagleg sterkt arbeidsmiljø, med eit omfattande kurs­ og opplæringssenter i FK­skolen, i tillegg til lokal oppfølging, avsluttar Kristoffersen.