Gschichte aus dr Scholzeit, Hermann Schütz

Gschichte aus dr Scholzeit

Hermann Schütz

Bevor ich anfang zu schreiwe, hoff ich, dass die ehemaliche Klassekumraade mer nett bees sen, wann ich ehre Naame nenn. Ich hätt se gäre um ehre Erlaubnis gfrot, awer leider sen se nimmi uner uns.

De braavschte aus dr Klass: Waaret de Hans odr de Hermann? Weil ich e schlemme Schiller waar, obwohl recht groß, musst ich ab dr 5. Klass immer vore setze, dass die Lehrerinne un Lehre mich besser beowachte kenne, was ich so treib.

Beim Deitschunerricht hatte mr de Herr Wolz. E aarich gude Lehre, wie aach all unser anre Lehrerinne un Lehre. Er hat aarich laut on betont gerett un aach vorgeles. In dr 5. Klass hat de Weimer Hans hinner mer gsetzt, (wahrscheinlich waar ne dann doch braaver wie ich).

Ich wääs nimmi genau, wie et war: Han ich net ofgepasst odr wollt de Herr Wolz mich priefe, ob ich mei Hausaufgabe gemach han - of jede Fall hat ne mich ofgeruf. De Hans hat et irgendwie fertichgebrong, mich an dr Lehn von dr Bank fescht zu benne, so dass ich nett han kenne ofstehn. Weil mer das net gelung is, hat de Hans schon herzhaftich gelacht. Nohdem de Herr Wolz mich nochmol ofgeruf hat un ich emmer noch nett ofgstan sen, wollt ne sich die Gschicht anschaue, vor was de Hans - un mittlerweil aa noch paar anre - das so luschtich fenne, dass ich net ofstehn. Ich han jo proweert, haat jo schon de Fuß newer dr Bank, awer läder es et mr net gelung. Do hat de Herr Wolz mr of de Fuß getreet, das hat recht weh geton, er waar jo kä Leichtgwicht. Nateerlich han vill et luschtich gfon, was‘m Hans do gelung es. Welch Strof mr kritt han, wääs ich nimmi genau, awer ich denk, e paar Kopfniss waare bestimmt drbei. Bei dr nächscht Gschicht waar ich mol net drbei, awer han se noch recht gut in Erinnerung. Et waar zufällich aa in dr 5. Klass un in dr Deitschston vom Herrn Wolz. De Maurer Adam un de Matto Fery han hine in dr letscht Bank gsetzt un hann, wie mer Billeder gsaat han, Fickmill (Mühle) gspillt. Äne von dene Zwaa hat als Figure Bohne katt. De Herr Wolz muss gemerkt han, dass die Zwo sich met was beschäftiche, hat sich ganz vorsichtich bes an die Bank gschlich, wo die Zwo gsetzt on gspilt han. Wahrscheinlich waar die Partie aarich spannend, dass se net gemerkt han, dass se beowacht gen. Wie de Herr Wolz drvor gstan un gsiehn hat, was die treiwe, es et ausm rausgfahr: „In meiner Stunde spielt ihr Bohnen?“ Was die Zwaa vorch Strof kritt han, wäs ich nimmi, awer ohne es et bestimmt nett gewehn.

Bei dr nächscht Aktion waar ich aa beteilicht, et waar kä enzl Aktion, ich wäs awer net, von wem die Idee gstammt hat, die hat sich in dr 6. odr 7. Klass zugetraa.

An dr Kerweih hat mr so kläne Balle kaafe kenne, wo met Sähmehl gfillt un an Milichgummi gebonn waare for se werfe un selwer fange odr mr hat of jemand anre geworf, gewehnlich of Mädcher. Ewich han die Balle jo net kal, no han mr de Gummi for Puschka ingsetzt: Än Enn hat mr um de Daume, das anre Enn um de Zeigefinger gebunn, un schon hat mr e Puschka kat. Als Munition hat mr die Stille von de Kaschtanierblätter benutzt, on Zielscheib waare oft die Mädcher, wann se aus dr Mai-

Die Jahrgänge 1945-46 im Schuljahr1958-1959. Aus dem Bilderalbum von Elvira Slavik.

andacht komm sen. Das hat ganz scheen weh geton on aa bloe Flecke genn, derfor well ich mich noch entschuldiche.

In der Zeit es mr in der Schol nett of Waffen kontrolleert gen, un so haat ich mei Puschka meischt im Hossesack. An dr Mauer iwer die Gass von der Schol han in dere Zeit die Biller vom Marx, Engels, Lenin on vom Stalin khonk. Am e schene Taach hat äne von uns die Vier als Zielscheib ausgsucht, awer well mr kä Stillä von Kastanierblätter haade, hann mr aus Papierknedle Munition gemach - un schon es de erfolgreiche Kampf losgang. In korzer Zeit waare die vier Herrschafte dorchlechert wie e grob Sipp.

Die Frau Slavik hat das wahrscheinlich in dr Erdkunde-Ston gsiehn. Ich menn nett, dass se uns gfrot hat, wer das waar, hat glei de Scholdiener, de Vedr Fery, beauftragt, die Biller abzuhänge un nei inzurahme, awer mit Glas drvor. Dasmoll sen mr gaarnet gstroft gen, vielleicht aa ausm gewisse Grund... PS E Schriftstellerin hat mol behaupt: „Die Farbe der Erinnerung trügt“. Kann schon sen!