Shona - Second and Third John

Johane wechipiri CHITSAUKO 1 1 Mukuru kuna mai vakasanangurwa nevana vavo vandinoda muchokwadi; kwete ini ndoga, asi nevose vakaziva chokwadi; 2 nekuda kwechokwadi, chinogara matiri, chichava nesu nokusingaperi.

3 Nyasha, tsitsi, nerugare zvinobva kuna Mwari Baba nokuna Ishe Jesu Kristu, Mwanakomana waBaba ngazvive nemwi, muchokwadi nerudo.

4 Ndinofara zvikuru kuti ndakawana pavana venyu vachifamba muchokwadi, sezvatakagamuchira murairo kuna Baba.

5 Ikozvino ndinokukumbirisai, amai, kwete sezvivonzi ndinokunyorerai murairo mutsva, asi uyo watakanga tinawo kubva pakutanga, kuti tidanane.

6 Urwu ndirwo rudo, kuti tifambe nemirairo yake. Uyu ndiwo murairo, kuti sezvamakanzwa kubva pakutanga, mufambe mauri.

7 Nekuti vanyepedzeri vazhinji vakapinda munyika, vasingapupuri kuti Jesu Kristu wakauya panyama. Uyu ndiye munyengeri naantikristu.

8 Zvichenjererei imi, kuti tirege kurashikirwa nezvinhu zvatakabatira, asi kuti tipiwe mubairo wakakwana.

9 Umwe neumwe, unodarika, asingarambiri mudzidziso yaKristu, haana Mwari; ani naani anorambira mudzidziso yaKristu ndiye ana Baba noMwanakomana.

10 Kana mumwe akauya kwamuri, asingauyi nedzidziso iyi, musamugamuchira mumba menyu, kana kumukwazisa; 11 Nokuti uyo anomukwazisa anogovana naye pamabasa ake akaipa.

12 Kunyange ndine zvinhu zvizhinji zvekunyora kwamuri, handina kuda kukunyorerai pabepa neingi; asi ndinovimba kuuya kwamuri, tigotaurirana muromo nomuromo, kuti mufaro wedu uzadziswe.

13 Vana vomunin'ina wenyu wakasanangurwa vanokukwazisai. Ameni.

Johane wechitatu CHITSAUKO 1 1 Mukuru, kuna Gayo unodikamwa zvikuru, wandinoda ini nechokwadi.

2 Mudiwa, ndinoshuva pamusoro pezvinhu zvose, kuti ubudirire, uve wakasimba, somweya wako uchibudirira.

3 Nekuti ndakafara zvikuru hama padzakasvika dzikapupura chokwadi chiri mauri kunyange uchifamba muchokwadi.

4 Handina mufaro unopfuura kunzwa kuti vana vangu vanofamba muchokwadi.

5 Mudiwa, unoita nokutendeka zvose zvaunoita kuhama nekuvatorwa; 6 vakapupurira rudo rwako pamberi pekereke; 7 Nekuti nekuda kwezita rake vakabuda, vasingatori chinhu kuvahedheni.

8 Naizvozvo isu tinofanira kugamuchira vakadaro, kuti tibatsirane pachokwadi.

9 Ndakanyorera kereke; asi Dhiotirefe, unoda kuva wepamberi pakati pavo, haatigamuchiri.

10 Naizvozvo kana ndichiuya, ndicharangarira mabasa ake aanoita, achitiitira makuhwa namashoko akaipa; uye asingagutsikani naizvozvo, kana iye amene haagamuchiri hama, uye unovadzivisa avo vanoda, nokuvadzinga mukereke.

11 Mudiwa, usatevera chakaipa, asi chakanaka. Uyo, unoita zvakanaka, unobva kuna Mwari; asi unoita zvakaipa, haana kuona Mwari.

12 Dhemetrio unopupurirwa zvakanaka navose, uye nechokwadi pachacho; nesuwo tinopupura; uye munoziva kuti kupupura kwedu ndokwechokwadi.

13 Ndakanga ndine zvinhu zvizhinji zvekunyora, asi handidi kukunyorera neingi nepeni; 14 asi ndinovimba ndichakurumidza kukuona, tigotaurirana chiso nechiso. Rugare kwamuri. Shamwari dzedu dzinokukwazisai. Kwazisai shamwari nemazita.