DOP “Sidra de Asturias”
ISABEL IGLESIAS CUEVA
ACTU I (NA PUMARADA D’UN PUEBLU CUALQUIER –NESTI CASU PUE SER LA CAIZUELA– SIETE MAZANES XUEGUEN A LA SOGA; UNA D’ELLES –LA DURONA DE TRESALI– TA ENSIN COLOR, ATRISTAYADA Y AL MARXEN DEL XUEGU DE LES SOS COLLACIES). (MÚSICA) CLARA Y PEREZOSA (Canten dando a la soga; les otres faen el coru): Al montón que poques son, Qu’entre Xuanina. Al montón que poques son, Qu’entre la Prieta Al montón que poques son, Que salga Xuanina. Al montón que poques son, qu’entre Colorada. Al montón que poques son, que salga Prieta. Al montón que poques son, qu’entre Ernestina.
Al montón que poques son, que salga Colorada. Al montón que poques son, qu’entre Durona.
(Durona, que yá taba separtada’l grupu, fai señal de nun dir a entrar, enfurruñada; les otres siguen col cantar y repiten:
Al montón que poques son, qu’entre Durona. (Durona nun entra, sigue sola Ernestina, blincando, y cantando les otres) ERNESTINA (Parándose):
¡Nun blinco más! ¡Toi afogada, sudada y esfelpeyada! ¡Mira p’acá qué pintes!
CLARA (Soltando la soga con rabia): ¡Yá faló la marquesa del rau curtiu! Una que nun quier entrar, otra que suda muncho.¡Asina nun se pue xugar! ERNESTINA: A mi nun m’eches les culpes, la que nun quixo xugar foi Durona. Si ella nun entra yo nun pueo salir y sudo, sudo y sudo. CLARA: (Faciéndo-y xirigoncia) ¡sudo, sudo y sudo! Cada añu yes mas repolluda. ERNESTINA: ¡Val más ser una repolluda qu’una amargosa como tu! CLARA: ¿Que soi qué? ¿A qué nun lo repites? (desafiantes, una frente la otra).
COLORADONA:¡Quietes! ¡Quietes les dos! Tais siempre como’l perru y el gatu! (averándose seliquino) ¿Qué te pasa Durona? Lleves tol día enfurruñada. ¿Por qué nun t’axuntes pa xugar? DURONA: Nun me pasa nada, son coses míes. Vosotres siguir. ¡Dexáime `n paz! (Entama a llorar y a quitar les llárimes cola mano). XUANINA: (Averándose a Durona y cariciándola) ¡Durona! ¿Tas llorando? ¡Eh,eh,eh…! Tu que yes tan fuerte, tan valiente y tan peleona. ¿Pue sabese qué te pasa? PEREZOSA: (Averándose tamién) Duronina, tas poniéndome murnia a mi tamién. ¡Tas dándome tanta pena! (Entama a berrar).
COLORADONA: Agora sí que tamos guapes ¿Pue sabese por qué llores, Perezosa? PEREZOSA: Nun lo sé, púnxime triste al ver asina a Durona, ella siempre tan dispuesta, tan trabayadora, tan…y agora…(llora).
PRIETA: ¡Agora! ¡Agora!...¿Qué ye lo que pasa agora? (Mírense unes a otres y faen señal de nun enterase de nada).
(Nel intre óyese una corneta, al poco la corneta suena más cerca; son los pregoneros qu’apaecen na escena. Mira pal públicu, fai sonar la corneta y entama’l pregón; les mazanes arródienlu, toes menos Durona, que sigue sentada y pensatible).
PREGONERU: Por orde de la Señora Alcaldesa faigo saber:
Que nesti mes de Payares, nel colexu del Vallín va celebrase un amagüestu perimportante. Aconceyaránse neños y neñes de tola comarca pa mayar y pisar les meyores mazanes de les nuestres pumaraes. Faese avisu públicu pa que toles mazanes qu’a bien lo tuvieren se presenten na plaza del nuestru Ayuntamientu’l próximu xueves 15 de Payares y asina probar les que pol so tastu, color y frescura son afayadices pa entrar nel duernu. Nomaráse tamién la mazana del añu, premiando asina la más prestosa y galana de la temporada. En Piedras Blancas a 15 de Payares del 2018. La Señora Alcaldesa.
ACTU II (Música. Mentanto, los pregoneros vanse y siéntese lloñe sonar la corneta. Durona, d’un blincu, avérase a les sos collacies). DURONA: ¿Oístislo? ¿Oístislo? ¡Ye’l tiempu de pisar, el tiempu de facer la sidra! Y yo d’estes traces, ensin maurecer. ¿Daisvos cuenta del mio problema? ¿Entendéisme agora? COLORADONA: ¡Acabáramos! ¡Asina que yera eso! XUANINA: Esti añu foi pergafu, Durona, mira pa mi, yo tampoco toi tan fresca y galana como lo tuvieran antaño les mios parientes. Dicen les mios vecines que toi menos ácida, menos sabrosona. DURONA: Yá, guapina, yá sé que nun foi un bon añu; pero tu tas madura, vales pa entrar nel duernu. Agora…Mirái pa mi, camentáis que daquién va quereme.Voi ser la risión, nun pienso salir d’esta pumarada. ¡Nun salgo, nun salgo y nun salgo!
PEREZOSA: ¡Yá vas entrando en razones! Si tu nun sales d’equí, yo tampoco, collacia. ¡Cola galbana que m’entra a mi na seronda! Pañame, meteme ´n sacu, voltiar y voltiar dientro’l duernu…¡Quita p’allá! (Garrándola) ¡Nun t’esmolezas, Durona! Nun vas quedate sola nesta pumarada; equí ta Perezosa pa descansar, folgar y vivir tranquila. PRIETA: ¿Serás folganzana? ¡Folganzana y tocha! ¿Paezte futuru pa unes mazanes asturianes, buenes y sabrosones, quedase de folgueta y apodrecer nesta pumarada? ¡Calla, calla, fala en baldre! (A Durona) Mira p’acá, p’acá ¿Visti lo puerca que toi yo? DURONA: ¡Va,va,va! Les de la to triba sois asina. ¿O crees que vos llamen Prietes porque trabayais na mina? PRIETA: ¡Prietes si, pero non puerques! Que lo mio ye de nacimientu, non d’emporcame y nun llavame. Pero esti añu con tanta nublina, tantu calor y la seca’l branu, quedéme fecha una llaceria y…¡ensin ácidu! Casi que soi tan dulzona como la nuestra Ernestina.
ERNESTINA: ¡Nun te creas guapina, esti añu nun toi pa llambiotaes. Menos mal qu’una ye apañadina y con estos llacinos y estes puntiellines voi saliendo’l pasu. (Nel intre, Clara fai un xestu de chifladura y arrequéxase pa enredar nún caxón; mete y saca papelinos, pintures, pinceles… Les otres siguen aldericando). COLORADONA: (Averándose a Durona y con vergoña ) Perdonái, nun sabía qu’esti yera un mal añu. ¡Colo contenta que yo taba! Coloradina, redondina y con un tastu amargu que nun ye fácil d’algamar na mio familia.
Yo pa reina nun voi ¡Qué vergoña! Pero… naguo por dir a la fiesta. ¡Colar pal duernu, sentir eses cosquiellines tan riques y llueu… llueu falar y falar coles mios collacies… ERNESTINA: ¡Nel tonel!¡ Eso si que ye prestoso! Tol iviernu ellí, abellugaes… XUANINA: Y na primavera pa les botelles, cola nuestra etiqueta que diz: SIDRA D’ASTURIES, SIDRA ASTURIANA…
CLARA: (Dando un respingu dende’l requexu) ¿Sidra asturiana? ¡Nin lo sueñes! Si nun vamos toes xuntes pal duernu, axúntennos coles foriates. XUANINA: ¿ Les fo…qué?
CLARA: Les fo-ria-tes. Van llegando seliquino, amatagaes embaxo’l toldu los camiones. Entren ensin enterate ¡Menudes son les gallegues! COLORADONA: ¡Ai qué mieu! ¿Por qué cuentes eses coses?
XUANINA: (Dándo-y la mano a Coloradona) A lo meyor elles, les… les…gallegues tamién tuvieren mal añu. CLARA: ¡Imposible! Elles nagüen por colase nel duernu, pasar pal llagar y dormise nel tonel. Con elles nun hai sidra asturiana. PRIETA: Nin etiqueta. DURONA: Nin denominación d´orixen. PEREZOSA: Nin folgar nel tonel. ERNESTINA: Vamos ser una sidra ordinaria, ensin nengún glamour.
PRIETA: Nin etiqueta. DURONA: Nin denominación d´orixen. PEREZOSA: Nin folgar nel tonel. ERNESTINA: Vamos ser una sidra ordinaria, ensin nengún glamour.
COLORADONA: ¿Y qué podemos facer? XUANINA: ¿Vamos quedanos asina, plasmaes? CLARA: ¡O toes xuntes o nada¡ DURONA: ¿Y yo? ¿Qué faigo yo? CLARA: ¡Tranquila! (Arrastra’l caxón pal mediu la escena). ¡Equí ta la solución! Ven p’acá, Durona.Veníi tamién vosotres. Vamos iguar a esta probe mazana. Garrái lo que vos pete del caxón, vamos facer una mazana de diseñu. ¡Xuntái los rabos y repetir conmigo: ¡TOES XUNTES TRABAYAR, TOES XUNTES PAL LLAGAR ¡ (BIS)
CLARA: ¡Adelantre¡ (MÚSICA)
ACTU III
(Les mazanes van garrando adornos del caxón: corazones, florines, camparines, un cascoxu…; y apegándolos a Durona. Otres dan-y unes pincelaes de color. Trabayen ensin aparar hasta que lo ven fecho). ERNESTINA: ¡Esperái! Fálta-y una cosina. Esti llazu coloradín pa la mio amiga Durona (Besín).
DURONA: (Glayando) ¡Ay! ¿Qué ficisteis? ¡Qué pinta tengo!¡Pusísteisme como un árbol de Navidá! ¡Non! ¡Non! Así nun voi a la fiesta. ¡Non! Esto ye una vergoña! ¡Quédome,eh! ¡Yo asina nun voi!
ERNESTINA: La verdá ye que tas un poco…un poco… (Riéndose) Un poco fachendosa. (Ríense toes y Durona va enoxándose muncho)
PRIETA: ¡Callai! ¡Esperai una migaya! (Falando colos neños) ¿Qué necesita una mazana pa maurecer?............................. ……………………….. ¡Calor! Lo que necesita Durona ye munchu calor; munchu,munchu calor. (Falando coles otres) Venií p´acá, acoceyaívos, vamos facer un corru. (Meten a Durona nel mediu. Bailen con ella nel centru una música sele y amorosiega.) (Mentantu ígüenla con un vestíu mariellu,mui prestosu)
DURONA: (Mírase percontenta) ¡Agora sí! ¡Agora si toi pa dir a la fiesta! (Entrugando a los neños) ¿Paezvos que toi guapa? ¿Paezvos que van quereme nel duernu?
ERNESTINA: (Manda callar) (Silenciu) DURONA, MÁS QUE REINA...YES REINONA. (Rinse toes) ¡Garrái la soga! ¡Durona al mediu!
(Clara y Perezosa, como nel entamu, pónense a dar, a lo baxo, faciendo la barca. Durona salta y les otres canten : SOI LA REINA LES MAZANES QUE PAL DUERNU VOI CAYER, TOES XUNTES FACER SIDRA PA METELA NEL TONEL. (BIS)
Van garrando una soga caúna y con ella na mano baillen y canten esti estribillu.Ún de los pregoneros entama a tocar la gaita, l’otru acompaña col panderu. Les mazanes van garrando cola soga a tolos neños y neñes del so grupu, faciendo trenes; garren una mazana del cestu y colen pal duernu. Crúciense cantando y baillando hasta llegar al sitiu del llagar).
FIN