Formáli

Þessi skýrsla tekur saman niðurstöður rannsóknar sem hafði það að markmiði að meta vaxtargetu íslenskra nauta í kjötframleiðslu. Lýst er stöðu þekkingar ásamt ályktunum sem má draga af niðurstöðum. Einnig er fjallað almennt um nautaeldi þar sem m.a. eiginleikar íslenska kúakynsins til kjötframleiðslu eru bornir sama við önnur kúakyn. Rannsóknin fór að mestu fram á starfsstöð LbhÍ á Möðruvöllum í Hörgárdal en slátrun og kjötvinnsla var unnin á Akureyri hjá Norðlenska matborðinu ehf. Verkefnisstjórn og fagleg ábyrgð var í höndum LbhÍ en samstarfs‐ og stuðningsaðilar voru Bústólpi ehf., Norðlenska matborðið ehf., Stóri Dunhagi ehf. og Matvælastofnun (MAST).

Verkefnið var sérstaklega styrkt af Þróunarsjóði nautgriparæktarinnar og unnið fyrir Landssamband kúabænda.

Þóroddur Sveinsson verkefnisstjóri