Saluto in ladino Ceres ladines y cers ladins, le Plan dla mobilité por les rodes é da ciafé sides te na versciun todëscia co te na versciun taliana. Impó oressun pité na picia introduziun generala ince por ladin. Le fin dl Plan dla mobilité por les rodes te Südtirol é chël de renforzé l’anuzamënt dla roda tla vita da vigni de. Le plan contëgn sis poscibilités de aziun che oress arjunje n aumënt dla zircolaziun dles rodes dl 20% anter le 2030. Por che le transiamënt dles rodes aumentëies y le trafich a motor vais zoruch, vara debojëgn de na „Alliance of the willing“ – na colaboraziun de aturs desvalis dl ciamp dla politica, dl’aministraziun y di privac, che se toles a cör y laores adöm por arjunje chësc travert. La partezipaziun ativa dles zitadines y di zitadins resta sambëgn zentrala. Le plan contëgn la reorganisaziun dla mobilité por les rodes sura döt le raiun dla Provinzia. N ofize aposta por le laur de coordinaziun, metü adöm dala repartiziun por les Infrastrotöres y la Mobilité Sostenibla dla Provinzia y dal setur “Green Mobility” dla STA (Südtiroler Transportstrukturen AG), se tolará sö le laur de coordinaziun por proieté i proscims vari tl svilup dla mobilité por les rodes. Implü gnarál porté ite de nöies unités de proietaziun, denominades “Radfunktionale Einheiten” (RFE) – unités funzionales por les rodes. Chiló lapró toca i comuns cun le maiú potenzial por ci che reverda la mobilité da vigni de. Sides l’Alta Badia co la Val Gherdëna rapresentëia na unité funzionala por les rodes. Tl dagní dess na comisciun de esperc valuté i proiec nüs di trus dles rodes suracomunai. Le finanziamënt vëgn surantut dal ofize por les infrastrotöres y la mobilité sostenibla dla Provinzia. Aper les infrastrotöres y la organisaziun, soga la comunicaziun y la cultura dla roda na pert zentrala. La promoziun dla mobilité cun la roda mëss gní odüda sciöche n prozes cultural. La sensibilisaziun dla popolaziun toca porchël lapró: an dess tematisé la mobilité cun la roda tolon ite la popolaziun te na manira ativa, y fajon nasce la pasciun por la roda tres esperiënzes positives y scomenciadies che dëides da se identifiché cun chësta sort de mobilité. Tratan le prozess partezipatif che á acompagné la creaziun de chësc plan él gnü fat na inrescida da pert dla STA, dal titul “Zukunft Mobilität Südtirol”. Giulan a chësta inrescida eson stá bogn de ciafé fora y analisé cinch tipologies de anuzamënt dla roda. Les mosöres laorades fora tla cornisc de chësc proiet (injunta nr. 1) mëss sambëgn gní adatades ales tipologies desvalies de utilisaziun dla roda y ai debojëgns di ziclis . Deache la roda ne dess nia rapresenté n fin a se instës, mo plütosc n meso por mioré la cualité de vita de vignun de nos. I tolun sö cun ligrëza l’aumënt dl entusiasm por la roda tles valades ladines, y nosta speranza é che la jënt toles ca la roda tres plü gonot.
8 / 108
