Fago go “TO MAI MO A’U LAU FA’AMANUIAGA” (Vaega 2)
UPU TOMUA
O le tala lenei, ua manatu le tusitala ina ia tusia ona o le to’atele o nisi o le mamalu o le atunu’u ua fa’asea mai ina ua aveeseina i se finagalo o le Fa’atonu se tasi o polokalama sa fiafia i ai, o le Ta’utinoga. Ae o le tala fa’asolo lenei, ua fa’avaeina mai ai lagona ma mafaufauga o le tusitala, ona o mea sa tutupu i nisi o le atunu’u ua fai i lagi a latou folauga, ae e taua tele mo lo tatou soifuaga ua i ai nei. O igoa ua fa’aaogaina i lenei tala fa’asolo, ua le o igoa moni ia o tagata, ma nu’u sa tula’i mai ai nei vaega lelei, e lu’itauina ai taua i nei talutalu fou. Talosia o le a avea lea ma fa’amalosiau i nisi, ma avea fo’i ma fu’a taualuga i soifuaga o nisi. Ia manuia tele lau faitau”
U
a sauni nei le taligamalo a le afioaga o Tofamalama, ma ua logoina fo’i itutino uma o le nu’u e tusa ai o le tofa ma le moe ua tasi nei i ai le ali’i Sa’o ma le alalafaga. Ua fa’ailo fo’i le afiafi i le manu ua alagaina nei i totonu o le nu’u, tulafono ma ona aulape uma, ina ia nofosilafia uma e tagata o le afioaga. I aga masani lava o taligamalo fa’apenei i nu’u ma alalafaga, ua pei ai o ni ufi tutupu le aumaga, aua o le a maua ai fo’i lo latou avanoa e fetaia’i ai ma tama’ita’i po’o tausala fo’i ma aualuma o isi nu’u, ae ua le fa’atusalia ai lagona ua mageso i totoga o tama’ita’i talavou o le afioaga o Tofamalama, aua o nai aso ia o le a fa’ama’ai ai le pupula a le tama’ita’i ia e mata sana manamea mo lea aso o le taligamalo ma le talagamalae a le aumaga. Ua mautu nei le fa’amoemoe o le afioaga, ma o le a ta’atia ai la le taligamalo ma lona fa’amoemoe, ae se’i o tatou tilofia po’o ai lava se tina o le tama’ita’i lenei o Fogasina. Ua manino le tama o le tama’ita’i ma lona tupuaga, ae o le a se’i aga’i le tala i le tina o le teine ma lona tupuaga. O le nu’u i Atua e igoa o Lupeolomalu, sa nonofo ai se toeaina e po le va’ai ma lona faletua i gauta o le tuasivi e fa’afeagai ma atumauga o le Anoama’a, o lona igoa o Toalogomua ma lona faletua Se’eigalumua, ma lo laua alo teine e igoa ia Laoletuasivi, o le tina la lea o le tama’ita’i o Fogasina. O le toeaina o Lupeolomalu, o se tagata sa pei o se aitu vavalo i na ona po. E masani ona to’a i ai savali a le tele o ali’i sili o nu’u ma itumalo, i sana valoaga i se taunu’uga latou te maua, pe a fuafua se si’itau atu i se isi nu’u ma seisi fo’i itumalo. O le alafo’i lea o lona nofoia o atumauga maualuluga o Atua, e faigofie ai ona ia valoia i le momoli atu ia te ia e aitu o le savili, o fa’alogomaga o mea o le a tutupu, ae maise ai fo’i o ni moligamana’o e foufou atu ia te ia. O ia o se tagata e gafa mai ia Leiite, o se atua vavalo o Samoa i na ona po. O le ala fo’i lena o le nonofo o lona afafine o Laoletuasivi ma le toa lenei o Aoogafa, ona o la laua feagaiga ma le toa lenei i le taua na ia tauina e lavea’iina ai lona motu o Salafai, ai le saua ma le mata’utia o le Tui Fiti. O lea ua manino le mata o le vai i le tama ma le tina o le teine o Fogasina, ae se’i o tatou soso atu e saili po’o ai le ulugali’i lenei o Tema ma Tamatoa. O Teme ma Tamatoa, o le ulugali’i o le aiga o le faletua o le toeaina o Toalogomua mai Manu’a. Ina ua fanau le teine lenei o Laoletuasivi, ona alu ai lea o le faletua ia Se’eigalumua i lona tama
L E 14th October 2014 . 20
i Ta’u e aumai nisi e tausia si ana tama, ona e faigata lona aiga ona ua po le va’ai a Toalogomua lona to’alua. O le auala lea o le o’o mai o Tema ma Tamatoa i Upolu ma nonofo ai lava i Atua ma avea ai lava ma tagata o le aiga o Toalogomua ma Se’eigalumua. Ina ua mae’a le taua e lavea’ina ai Salafai, ona toe sau ai lea o Aoogafa i Atua, e logo mai Toalogomua ua manuia le taua ma ua fa’asaoina Salafai, ma fa’amanatu i le toeaina la laua tu’uga ma le mavaega. E le’i tali ese lava le toeaina vavalo i le tama o Aoogafa, i lona tu’uina atu lea o lona afafine o Laoletuasivi e fai ma ana ava. Ona fa’apea atu ai lea o le toeaina ia Aoogafa, “O le a le na’o Laoletuasivi o le a e aveesea ma maua, ae o le a ou tu’uina atu fo’i ma lo’u aiga fa’apelepele o Tema ma Tamatoa, tou te malaga fa’atasi i Salafai, e fa’aauau ai le gafa o lo’u aiga i lo oulua aiga ma lo’u afafine”. Na talia lelei e Aoogafa le fanoga o le toeaina o Toalogomua, ona tagi ai lea o le tama ma fa’apea atu ana upu i le toeaina vavalo, “Toalogomua, ua malie lau fa’aaloalo, o lou alofa fo’i o le a le mafai ona galo. Ae o la’u mavaega lea ia te oe si o’u tama. O aupega ia sa ou tau ai i Salafai, o le a tatanu lea i tumutumumauga o Atua, o le a avea lea ma afuaga o ni tagata totoa e ola a’e i ou eleele. Ae a sina galu o le taeao i ou gataifale, ona iloa ai lea, ua ola Laotuasivi i se tausala, ae a lafo puao o le tauafiafi i ou tumutumu mauga, o le fa’ailo lena ua ola Laotuasivi i se tamatane”. Ua tapena le malaga o le a fo’i i Salafai, ona tagi lea o le tina o Se’eigalumua ma fa’apea ana upu. “Aue mauga e o Atua o le a tu’ufua. Amuia oe Salafai o le a e tiu ai. Laoletuasivi o le fatu mai Manu’a, o le sinapi na tupu a’e i Ta’u ma Fitiuta. Salafai e, si a’u tama lena o le a sulugia ai ou atumauga. Ne’i e agaleagaina ona toe momoli lea i Manu’a”. E tu lava le tina o Se’eigalumua ma lagi lana pese i le matafaga, ma va’ava’ai atu lava i le alia o Aoogafa ma si ana tama o Laoletuasivi ma le ulugali’i o Tema ma Tamatoa ua mou malie atu lava i le vasa. O lea la ua manino ma ua malamalama fo’i i le ali’i Sa’o o le nu’u o Tofamalama, lona faletua ma le ulugali’i o Tema ma Tamatoa. O lea fo’i ua manino i matua o le faletua o le ali’i Sa’o ma le afioaga e o mai ai. O le a toe fo’i la le tala i le nu’u o Tofamalama. Aua o lea ua manino nei fo’i sa I ai le mavaega i le va o le ali’i Sa’o ma matua o lona faletua, e pei ona i ai nei le tama’ita’i lalelei lenei o Fogasina, o ia fo’i o le augafa’apae a le afioaga.
M I T A M I T A G A
O
S A M O A
O
Ua mavae fo’i le soifua o matua o Laoletuasivi, ae o le a tatou tulimata’ia pea le gasologa o le soifuaga o le ali’i Sa’o ma lona faletua ma le tama’ita’i o Fogasina le lalalei o Salafai. O le teine o Fogasina, e pei ona ta’ua i le vaega muamua o le tatou tala, o se tama’ita’i lalelei tele ma o ona uiga fo’i e tausa’afia tele e le nu’u ma avea lea ma auala o le matua alofagia ai lava o le teine e so’o se tagata lava o le nu’u. O uiga fo’i nei o le tama’ita’i, na manatu ai nisi e ao lava ona i ai se puipuiga malu i lenei teine. Aua ua tatou iloa uma lava, o so’o se tama’ita’i lalelei lava ma o se alo fo’i o se ali’i taua, e i ai lava fo’i le lamatiaina o lona ola fa’atama’ita’i mai nisi o tamatane o nisi o nu’u ma alalafaga. a manatu nei nisi o tula o le ali’i Sa’o, o le a aumaia o latou afafine, e avea ma auva’a o le tama’ita’i o Fogasina, ina ia faigata ai ona osofia o o ia e le fili ma le tiapolo. Ua fausia nei e le nu’u se maota i tafatafa o le vaitaele o le ali’i Sa’o, e avea lea ma apisaga o le tama’ita’i ma lona auva’a po’o lona galu tama’ita’i. Ua mae’a ona fauasia lo latou maota, ona matua fiafia ai lava lea o le loto o Laoletuasivi. Ua ia manatuaina ai le fa’amavaega ma le pese a si ona tina ina o le a malaga mai i Salafai. Ona ia lagiina ai fo’i lea o lana pese e fa’apea. “Se’egalumua e lo’u tina ae, na e popole ina ua taumavae. O Salafai lele ua e fai mea sili, la’u Fogasina lea ua e fa’avi’i. O le fatu lava lena mai Manu’a, sa tupuga a’e i Ta’u ma Fitiuta. Ua puaina nei mai ou atumauga, le matagofie o lona Faleula. O oe lava Salafai o lo’u gafa mai mauga”. Ua avea nei le maota o le tama’ita’i ma lona aualuma, ma Maota Sa i le afioaga o Tofamalama. Ua avea fo’I lea maota ma puipuiga tele a le aumaga ma le afioaga. Ua faia fo’i i ai ona tapu ma ona sa o le fa’amalumaluga fo’i o le maota o le tama’ita’i, ua a’afia lava lea upu fa’alupe o le nu’u. O le a fa’agata ai le tele, ae o lona soso’oga, o le a fa’asolosolo ai lava le va’aiga i le tama’ita’i ma lona soifuaga aga’i i luma se ia o’o lava i lona tagata matua ma lona fo’i tula’i mai. Ae fa’amalo lava le faitau.“E toe fa’amanatu pea i le mamalu o le au faitau, ina ne’i faoa i le ta se finagalo ona o le leai o ni igoa fa’apea o itumalo ma motu o lo’o taua i le tala. A ia manino lava ua na o ni igoa lava o lo’o momoli atu ai le tala aua la outou fa’afofogaaga”. Fa’afetai…. E faia pea……..
A U S E T A L I A Le Foafoa o Samoa Australia