Sosopo le Manuvale i le Fogatia
Tusia: Vui Seigafolava Sione Masinamua
“O lenei tusitusiga ua faia ma fa’avaeina mai lea i nisi o mataupu ua mae’a ona folasia ma asaina i ni finagalo o Ta’ita’i o Malo, Ekalesia, Fa’alapotopotoga ma fa’apea fo’i i tagata lautele. Ae ua manatu pea le Polokalama, e ao lava ona fa’asoa i ai. Aua e eseese lava fo’i taofi ma finagalo i mataupu eseese, o lo’o fesouaina ai pea lou soifua ma so’u fo’i ola vaivai. E le mafai fo’i ona ioeina uma e tagata se manatu ma se mataupu, aua e pule lava le tagata ia i lona finagalo, ae maise fo’i o le fa’auigaina a le tagata lava ia o so’o se mataupu ma manatu. O le upu lava a nai tu’aa ua lagomau mai nei i Tiasa, “O le mea suamalie i le isi, ae o’ona i le isi”. Aua afai fo’i ua e manatu e sa’o se manatu, ae o lo’o ese fo’i le maitau i ai a nisi. Ia ao pea ona manatua, “Afai e Sa’o, e Sa’o lava ae le A’o”.
F
a’amalo le soifua laulelei ma le lagi matafi i le paia maualuga o le atunu’u i ona tulaga fa’alupe, ae maise lava i le au faitau o lenei fo’i itulau o le tatou nusipepa. E manatu lava o lo’o maualuga pea le aoina o le masina i lo outou soifua ma le ola, aua le fa’atinoina o a tatou auaunaga ma tautua i so’o se matata o lo’o punoua’i ai. Fa’afetai fo’i i le aufaigaluega totofi a le Atua, aua la outou pitola’au o lo’o talosia ai pea Samoa o le atunu’u pele ma o tatou tagata. Ae alo maia se’i fa’asoa atu fo’i le ta polokalama, i se motuga manatu ma se mataupu e avea ma fa’atupu manatu i lenei fo’i vaiaso.
“E SA’O AE LE A’O” Ua manatu o le a se’i talanoa ma avatu se vaivaiga o le polokalama i le mataupu, e pei ona fefaloa’i ai nei finagalo o sui mamalu o le palemene o Samoa, e tusa ai o le fa’ai’uga a le Komisi lea na latou tofiaina e toe lauliliuina le tulaga o le Tulafono o Faigapalota a Samoa. O se mataupu fo’i ua le fou ona ave i ai se lagona o le ta polokalama i nisi fo’i o ana fa’asoa ma ana tusitusiga i tausaga ua alu, ae maiese ai fo’i o ona lagona i luga o uaealesi fa’asalalau. Aua sa matua faitioina lava e tusitusiga a le polokalama, le leiloa po’o fea tonu o taoto ai lagona ma finagalo o le ta’ita’i o le faigamalo a le atunu’u ma lana vaega fa’aupufai. Pe a tatou manatu i le tula’i mai o le HRPP, na amata ai lava iina ona latou ta sui vaega o le Fa’avae, ae maise ai lava o le Tulafono o Faigapalota, lea ua toeitiiti lava o le paeaiga lava ma toe sui. O nisi lava fo’i o suiga o ia tulafono, na toe suia lava fo’i i le finagalo lava o le faigamalo, ae le’i fa’aaogaina suiga fou na o latou faia. O nisi la o ia suiga, lea na latou suia ai le tulaga sa’oloto sa i ai i so’o se tagata Samoa lava ua matai ae o lo’o alaala i atunu’u i fafo, ona toe malaga atu ma fa’auluina loa lona suafa e fia tauva ai i faiga palota lautele e pei ona sa sau a’i. Ae fa’atulafonoina loa i le tatau lea ona 12 masina e nofo ai i Samoa, fa’ato’a mafai lea ona tauva i le faiga palota lautele. O le upu moni lava e le’i o’o lea tulafono na fausiaina ma pasia i le faiga palota na soso’o ai o le 1996, ae na toe fa’auluina ma pasia ai le isi tulafono fou e toe talepe ma fa’aleaogaina ai lea tulafono, ae le’i faia sona fa’atinoga
L E 14th Oct 2014 . 26
ma sona fa’ataunu’uina. Ona toe pasia ai lea o le teuteuga fou e tatau ai i so’o se matai Samoa o alala i fafo mai o Samoa, ona nofo i Samoa mo le umi e 3 tausaga ona fa’ato’a alafia lea ona mafai ona tauva i le faiga palota lautele po’o se palota la’ititi a se itumalo fa’apalota. Na pau le tagata na manuia ai, ae sa nofo i fafo mai o Samoa, o le afioga lea ia Faumuina Tiatia Liuga, ona ua faia i ai togafiti leaga a le faigamalo, e fa’aupuina ai, o Faumuina Tiatia Liuga, na ala ona malaga i fafo ona o se tofiga a le Malo Aufa’atasi i lalo lea o le fautuaga a le malo o Samoa. O se togafiti oute fa’aigoaina o auala pi’opi’o ma le eleelea. Aua fo’i o Faumuina Liuga, e le’i afio i fafo ona o se aiaiga fa’apea. Ae ona o ia sa faigaluega ai i le ofisa o Malo Aufa’atasi i Samoa i ia vaitaimi, ma o le o ese atu la o le ofisa ma Samoa, na malaga ese atu ai lava fo’i ma Liuga ona o ia o le tagata faigaluega a lea ofisa. O le taimi atoa fo’i sa galue ai i lea ofisa o Malo Aufa’atasi, e leai ma se so’otaga ma le malo o Samoa. Oute manatua i lea vaitaimi o le faigapalota o le 1996, o le to’atele o tamali’i ma failauga na malaga atu i Samoa e fia tauva mo tofi o latou itumalo, sa fuli uma lava i le vaega fa’aupufai a le SNDP i lalo lea o le ta’ita’iga a Tui-Atua Tupua Tamasese Efi ma Va’ai Kolone. O le vaega e sili ona ofo ai, ona o nei uma tamali’i ma failauga, na malaga atu lava i Samoa ma alala ai mo le silia ma le 12 masina. O nisi lava fo’i o latou na malaga i Samoa i le 2 tausaga, ina ia fa’amalieina le tulafono o faiga palota e pei ona pasiaina. Paga lea, e le’i amiotonu le fuafuaga na faia e le ta’ita’i ma le faigamalo i lea vaitaimi, ae toe fa’auluina loa leisi pili fou ma pasiaina e talepe ai le tulafono ua malaga atu nei i latou e fa’ataunu’uina, ae se’i vagana ai le afioga ia Faumuina Liuga na tauva mo le HRPP, o le ala lea o le faia o teuteuga o le tulafono o faigapalota, ina ia alafia ai Liuga ona tauva i le faiga palota 1996. E le’i malolo ai le faigamalo i le saga fesuia’ia fa’afia o le tulafono o faigapalota, i isi paeaiga uma i luma mai e o’o mai lava fo’i i le paeaiga lenei. Lea fo’i na latou toe pasiaina ai le isi pili ina ia faia ai se komisi su’esu’e latou te toe lauliliuina ma toe iloiloina le tulafono o faigapalota. I auiliiliga la a lea komisi, lea na latou
M I T A M I T A G A
O
fautuaina ai le tulaga o nofoa o palota ta’ito’atasi, ae maise o le tatau ai lea ona vaevaeina nisi o itumalo tetele, ina ia mautinoa ai e aia tutusa tagata palota uma o le atunu’u i le tasi o lana palota e fa’atinoina. O lona uiga, o sailiiliga ma su’esu’ega a le komisi, e le amiotonu ma e solitulafono le tasi o le palota e faia e isi ae lua palota e faia e isi. I le ma le isi, o se solitulafono ma e le tatau ona fa’aaogaina le palota a le tagata na tu’uina i ai le avanoa e palota ai i sui e to’alua, ae nonofo sui tauva ma fa’atonuina e palota poloka, pe na o le tasi le sui e faia i ai lana palota, ae tia’i le isi palota. A fua nei la Samoa i ai i le tele o tupe a le atunu’u e alu i le totogiina o nei mau komiti ma komisi su’esu’e e sailiili i auala tatau ma talafeagai e fa’atinoina ai le faigapalota, ae o’o ane ina tu’uina atu la latou fautuaga ma mafuaaga tatau i le palemene e fa’afoeina ma pasiaina, ae mumusu ona e va’ai atu i suiga o le tulafono o faigapalota o fautua mai ai le komisi, e matua tele lo latou a’afiaga e o’o i ai. O le tali la ua aumai, o le le talia o le galuega fita ma le mae’ae’a a le komisi, ona o le manatu fa’apito o faipule ia i latou lava, ae leai ma se popole i le atunu’u ma le fautuaga a ia komisi. Ua moni ai le upu a le isi vale fa’ata’ita’i lale e fealua’i i le taulaga i Apia. “Afai lava e amata ma e fiafia i le fa’api’opi’o, e te i’u lava i le lou a le tuapi’o”. Silasila fo’i i fevesia’iga ua i ai nei le ta’ita’i o le malo ma nisi o sui o lana vaega fa’aupufai. O le upu moni lava, e toe fia lelei fua nisi e pei o Tu’u’u Anasi’i ma Papali’i Niko Li Hang, ae ua tuai ua ilo ve’a. O’i a toe tusitusi lima nei o le a ia Tuilaepa ma Liuga ma isi, ae o mea lava nei na latou taupulepuleina ma ioe i ai i le taimi o avea ma minisita. O le ala fo’i lena e pei ai o tamaiti i le va’ai a le latou ta’ita’i, aua e le o ni mea fou ia ua latou toe lalaga atu. O mea lava nei na latou faia uma ma fa’aufiufi ma tatanu i lalo, ae ua toe lalaga mai la o le a i luga ina ua le toe tofia i ni tofiga fa’aminisita? Ae ua ala ona fa’afofoga Samoa i nei mau tu’uaiga ma nei mau fa’aletonu, ona o amio ia a le I’a lavea, o le tafiti solo ma pisi solo i le fia maua o se lavea’i. Aua o le upu moni lava, se e le o toe fa’avaleaina e se isi le atunu’u. O le va’ai a Samoa i so’o se vaega lava o a outou fa’afinauga o fai nei, ua pei
S A M O A
O
lava o le Pi Tautau a tamaiti. O le fesili la, “E mafai ona lagona fa’apea ni a outou faitioga pe ana fa’apea o lea lava o lo’o se’e lelei pea i tofiga fa’aminisita?Ia ua le o se tali e tau taliina e se tagata o se univesite, aua e tali lava e tamaiti aoga tulagalua. O le a tatou toe se’e mai la i le afioga ia Faumuina Liuga. Ua a nei le sui na sau lava agava’a i le palota ona o auala eleelea? Na ia silafia lelei lava e le’i galue i le Malo Aufa’atasi ona o se tofiga na fautuaina e le malo o Samoa, ae na fai lava ina ia agava’a ai mo le faiga palota. Ae o le a sona manatu i nai isi ona uso a Samoa, ia ua le agava’a ona o la latou mau, ma lo latou talitonuga na le fia tauva ai i le fu’a a le HRPP? O le upu moni, o le to’atele o latou ia na matua gaugau lava i le tele o a latou tupe ma le malosi na fa’aaluina mo a latou fa’atosina, ae manu a’e ua toe aluatu le tulafono e toe fa’asaina ai lo latou agava’a sa i ai. O fea nei ua fai i ai le agva’a na faia i togafiti? A lea ua moni ai le fasa a le vale fa’ata’ita’i i le atunu’u. “Aua o le mea lava na amata mai i auala le sa’o ma le fa’api’opi’o, o lona taunu’uga lava fo’i o le lou a le Tuapi’o”. Ua tele ma anoanoa’i tulaga fa’aletonu ma le le sa’o ua fa’amaoniaina i le sui faipule lenei. Ae o lea lava e le o mafai ai ona manatu ifo e tatau loa ona fa’amavae, pe a alofa moni i lona itumalo. Ae o le fesili taligata, o le a ea le misitelio lilo i le va o le ali’i faipule ma le ali’i palemia ua le mafai ai ona ia faia loa se fa’ai’uga tonu, ae o lo’o ia saga tofia pea Liuga i tiute aloa’ia? Samoa oute le vavalo, ae e le o mamao lava fo’i ae toe alia’e mai nisi tu’uaiga i le ali’i faipule. Aua afai ua leai lava se minisita na ia saofa’i ai, e le tula’i mai ma ni fa’aletonu i ia matagaluega, o lona uiga la, e moni a le vale fa’ata’ita’i ma lana fasafasa. “Ioe afai e Sa’o, a ia e silafia, e le mafai ai lava ona A’o”. I le isi lomiga, o le a tatou tilofia ai, pe o fa’apefea mai le vaega fa’aupufai a le Tautua Samoa ma lona lotoifale. Ae fa’afetai lava mo le avanoa ua fa’asoa atu ai le tatou polokalama. Ia manuia tele lau faitau Samoa Soifua.
A U S E T A L I A Le Foafoa o Samoa Australia