Le Foafoa o Samoa
email: lefoafoaosamoa@gmail.com
Aso Lua 08 Aperila 2014
FA’ASILASILAGA
Mo Matai uma o le Suafa MASINAMUA o FOGAMATAIVA o Leulumoega, i Niu Sila ma Ausetalia.
U
a le faapopo ni aso ua, a’o aso folau fo’i o le a le tu’ua. Aua e faigata ona ou asaina le ogasami loloto ma le alititai, aua o lo’o epa ai le taotoga o I’asa, i le au puputoa ma le au fueloloa o Samoa. Ui i lea e ao lava ona ou fa’atulouina ma le fa’aeteete le loloto lea, nei le saofia lo’u va’a i le papa’u.
Oute fa’apoipoi ai ma le lili’a e pei o le o Saveasi’uleo i le gataifale. Aua e faigata ia te a’u oe Samoa, o le Ao mamala i le faasouga o Ao ma le Atufolasa. Oute faatulou ai i Aiga ma Tama, o Tama foi ma Aiga. Tulou la oulua Usoga iaTumua ma Pule, o Ituau foi ma le Alataua, Aiga i le Tai ma le Va’ao Fonoti. Oute fa’atulou foi ia Sua ma le Vaifanua, Saole ma Saleaumua. Fatui ma Auvaa o To’oto’o ma Tama a le Manu’atele ma oe le Matusa, tulolu tulouna lava. Ae ao ona ou faamalulu atu, ne’i o’u seu tapisi ona satia lea o lou laei. Pe oute faatalutaluo foi, ona ou le migao lea i lau faasausauga. Pe la’avale fo’i sa’u gagana, ona avea lea ma o’u lape i lau fa’afofogaaga. Ae ona fia faaaogina lea o sootaga i luga o nusipepa, o le ala lea. E manatu lava o le a le afaina lea i lou finagalo.
Ae o lenei faaaliga e fitoitonu lea i e uma o umia ma ua fa’asuafaina i le suafa MASINAMUA o FOGAMATAIVA o le afioaga o Leulumoega e pei ona taua i luga e fa’apea; Ua tonu nei ia te a’u ma Tama o lo’o tausia lo tatou aiga i Samoa, ina ua mae’a ai nisi o Fa’amasinoga tetele sa matou feagai ai i Samoa, o lea ua talo atu ai ia i latou uma o lo’o ua suafa matai i suafa o lo tatou aiga i Foamataiva i Leulumoega e fa’apea. O le a tatou feiloai uma i Aukilani i Niu Sila i le aso To’ona’i aso 19 o Aperila 2014 i le 10 i le taeao. Se’i outou fa’afofoga ai ma le manino i nisi o vaega taua ua tasi i ai la matou feiloaiga ma Tama o le aiga i Samoa. O lou le auai mai, o le a le taofia ai fuafuaga ma fa’aiuga o lea aso. O lea fo’i aso o le a outou fofoga ai i aulape ua taoto i ai la matou feiloaiga ma le talanoaga i lo ta Maota i Fogamataiva i lo tatou nu’u.
Tuatusi: 3 CHELFONT CRESENT, MANGERE. Tel: (09) 275 8245 (Auck) Talosia le alofa o le Atua, o le a momoli atu i ai lo outou soifua ma so’u ola vaivai i lea aso ua tu’upoina tatou te feiloa’i fiafia uma ai. Faafetai, Faafetai Tele. Faia ma le agaga faaaloalo lava,
Masinamua Paleava MASINAMUA (Aukilani Niu Sila) L E
M I T A M I T A G A
O
S A M O A
O
A U S E T A L I A
2 5