Le Foafoa o Samoa
email: lefoafoaosamoa@gmail.com
Aso Lua 08 Aperila 2014
Sosospo le Manuvale i le Fogatia Tusia e: Vui Seigafolava Masinamua
Faamalo le soifua, ma faamalo foi le tauata’i Samoa, ai tiute ma faiva sa feagai ai i lena vaiaso, ae maise foi o lenei vaiaso.Ou te fa’amalo foi i le aumatutua aemaise lava nai o tatou matua tausi, ona o lo latou foi faiva o tapuai, ma tui pea le mulipapaga ma po pea le fala, aua se manuia lautele i le atunuu ma ona tagata. Ae usi maia o le silafa’afofoga,o lenei foi o le a soso’o atu la ta polokalama masani, sei tilofia ai le soifua tautua o au tamafanau. Aua po o le a lava lona lelei, ae le mafai ai lava ona fa’amalieina uma ai le mana’o lautele o tagata. E ui foi ina manaia i le fa’alogo, ae le tau ai lava le loto, e moni foi e Sa’o ae le mafai ai lava ona A’o. “O lenei tusitusiga, ua faia ma fa’avaeina mai lea i nisi o mataupu ua mae’a ona folasia ma asaina i ni finagalo o ta’ita’i o malo, ta’ita’i o ekalesia, ta’ita’i o fa’alapotopotoga ma tagata lautele. Ae ua manatu pea le ta polokalama, e ao lava ona fa’asoa i ai, aua e le feta’ita’ia ni agaga, ma e eseese lava fo’i tagata ma o latou fa’auigaina o so’o se manatupu. E pei lava o le manatu autu o le ta polokalama lenei”,
“E SA’O AE LE A’O”. I lenei la vaiaso, o le a se’i tatai ai se lagona ma se vaivaiga o le polokalama i le mataupu e pei foi ona talanoa mai ai se tasi o tamafanau i le Tusi i le Fa’atonu e uiga i le “Tapuaiga Samoa” Ae lei taunuu mai le tusi a le susuga ia Samasoni, na muamua ona fa’afeiloai a’u e se tasi o Tama matua i le nofoaga o Vai Fa’anatura i Riverwood, ma ia fa’amatalaina ai le tulaga lea i le “Tapuaiga Samoa” Na saunoa le tama ma lona ita tele, ma ia fesiligia ai au i so’u taofi i le tulaga ua aumaia ai e se tasi sa avea ma faifeau EFKS le mataupu ma ia teena ai le Atua.o loo talitonu nei i ai Samoa, ma is fa’amtalaina ai le loto tiga tle o tagata ona o ia lagona ma se talitonuga fou. Na ou fesili i le tama e fa’apea, e le mafai ona ou talanoa i le mataupu ona ou te le’i fa’alogo i ai. O le finagalo o le tama e fa’apea, na fia lana tala i lana fanau, e na te fia maua la’u telefoni e feso’ota’ai mai ai ona e talitonu o ia o a’u tonu lava e tatau ona fai sa’u tusiusiga i le mataupu pei ona taua. Na fua so’u lagona i le fa’amatala mai o le Tama e uiga i le tiga o finagalo o le atunu’u ona ua a’a i tui le Taitai o le Tapuaiga Samoa i le Atua o lo’o tapuai i ai Samoa. I so’u taofi fa’avavevave i lea lava taimi na ou fa’apea atu ai i le Tama, afai o se tualga lena i le ita o tagata i le talitonuga ua i ai le Tapuaiga Samoa, o lona uiga e le kerisiano ia lagona ma o lo’o ta’u mai ai fo’i ua na ona talitonu i a’oa’oga a Iesu Keriso ae latou te le iloa ma talitonu moni ia Iesu Keriso. Aua so’o se tagata lava ua taua o le kerisiano, e ao ona ia malamalama muamua ia Iesu le Keriso ona ia talitonu ai lea i ana a’oa’oga. Aua fo’i o le tagata na me iloa Iesu ma talitonu i ana a’oa’oga, e le tatau ona te’i ma te’eva ona manatu ma lagona i ia mea. Ae tatau ona ia iloa o mea ia na apoapoa’i ma fautuaina ai i tatou e Iesu. Ae o lana fa’atonuga mo i tatou, “ E ao ona tatou fa’alogo i agaga uma lava pe mai le Atua pe leai”. Ona ia fa’apea mai lea, “E taofi i le agaga lelei ae lafoa’i i agaga leaga”. E le’i fa’atonuina i tatou e Iesu ina ia taofi i agaga lelei ae ita i agaga le lelei. O le tatou ita la i le faifeau po’o le Ta’ia’i o le Tapuaiga Samoa, ua le o le fa’atonuga lea a Iesu ma ua avea ai fo’i i tatou ma nisi ua a’aitui ia Iesu le Keriso. O lona uiga o taua fo’i la isi tagata e le talitonu ma mulimulitaia le a’oa’oga a Iesu. O se tualga na ou va’aia ai le to’a ma foliga ioeina ai e le Tama matua o so’u lagona na fa’anatinati atu i ai i lea taimi. O le ma upu taumavae ma le Tama na ia toe fa’apea mai ai, se aua ne’i galo ona e fa’alogologo i ai i le taimi o le polokalama a Ioane Lafoa’i i le po o le aso Sa. Na ou ioe lelei i le Tama ma ou tu’ua loa le nofoaga i Riverwood. O le po la o le aso Sa na ou nofo fa’atali ai loa se’i o’u fa’alogo i le fa’atalanoaina ma fesili a le atunu’u mo le Ta’ita’i o le Tapua’iga Samoa, le susuga lea ia Falefatu Enari ua le mafai ona ou maua lona suafa matai. Ou te lagona le loto fa’afetai i le Ta’ita’i o le Tapua’iga Samoa, ona o le fa’atamali’i o lona finagalo ae maise o le matagofie fo’i o lana fa’asoa mai. E fa’afetai fo’i ia Ioane Lafoa’i ona o lona tapasaina o finagalo o nisi o le atunu’u. O le taua lea ia te a’u ua ou fa’ataunu’uina la’u upu sa fai i le Tama matua o le a ou fa’alogologo i le polokalama. Ae o le sili ona taua, ona o lea ua sa’o lelei la’u mau na ave i le Tama matua, ona i la’u fa’avasegaina, ua sili atu ona tamali’i ma kerisiano le fingalo o le Ta’ita’i o le Tapua’iga Samoa nai lo finagalo o le to’atele o tagata fai mai
L E
M I T A M I T A G A
O
e talitonu i le Atua ae le fa’aleatua o latou lagona na aumai ma fa’asoa mai ai i lea po. O le tele o finagalo fa’asoa mai o le atunu’u, ua tau fa’aaliali mai ai lo latou atamai i le Tusi Paia, aemaise o nisi ua tauau lava ina fa’asoa e tala’i mai ai lona talitonuga fa’alanalava ekalesia. Ae ua galo i le to’atele o lo’o fa’asoa i le faifeau ua loa ona su’esu’e ma maua fo’i ona fa’ailoga i Mataupu Silisili o le Tusi Paia. Samoa e le atunu’u pele, ua tele ina laualuga finagalo fa’asoa o tagata i le ita ma le to’atama’i fua i le talitonuga o le Ta’ita’i o le Tapua’iga Samoa, a ua galo ai le ute ma le anofale o le mataupu sa ao ona tatala i ai le tofa ma le fa’autautaga. Aua o le anofale o le finagalo o le susuga ia Falefatu Enari, o le toe Sasa’a lea o le Fafao ma toe lauliliu finagalo e toe mata’itu ai tala fa’asolopito o lo’o tusia ma fa’amaumauina i le Tusi Paia ma fa’atusatusa ai fo’i e lona talitonuga ma ana sailiiliga i tala tu’u ma tala fa’asolopito o Samoa lava ia. Ia ao lava ona silafia ma iloa o finagalo ma manatu o le ali’i faifeau po’o le Ta’ita’i fo’i o le Tapuai’ga Samoa, o ona lava ia manatu ma lagona, ae o le a le avea lea ma auala e tatou te ita ai fua i lea uso a tagata. Ae ao ona tatou fa’aaogaina lelei lona tau lagalaga e avea ma auala tatou te toe saga sailiili atili ai i le tele o tala ma fa’amaumauga a le Tusi Paia aemaise fo’i o nisi fa’amaumauga i le tala fa’asolopito o le A’oa’oga Kerisiano ua le o mafai ona fa’amaopoopoina, fa’amauina ma tusiaina i le Tusi Paia Kerisiano e pei ona tatou a’oa’oina ai,. A tatou manatu fo’i i le Tapuai’ga Iutaia po’o le a’oa’oga fo’i na aumaia e Mose i le Feagaiga Tuai, o lo’o o’o mai lava i le taimi nei e le o mafai lava ona latou talitonu ma taliaina o Iesu o le fa’ataunu’uga o valoaga e pei ona fa’amauina i le Feagiga Tuai ma o lo’o latou laulauvivilu ai pea lava ma pepese ai i aso uma o a latou faiga tapuai’ga. Afai lava la o taua o tagata kerisiano moni, ma e moni fo’i lo taua talitonu ia Iesu ma ana a’oa’oga, e le tatau fo’i la ia i taua ona ta fai fili i lo ta uso a tagata e pei la o le Ta’ta’i o le Tapuai’ga Samoa, ae ao ona ta fa’alogologo pea i ai ma le toto’a pe i ai se atau ma se mea lelei e tula’i mai ai i si ana fo’i fa’apolopolo ma si ana fa’asoa. Ia te a’u lava la Samoa ma la’u fa’alogologo i lea po o le fefa’asoaaiga, ou te manatu lava a’u ia, o le tele ia o vaega anoa na aumai e Falefatu Enari i lea po, o ni vaega e saga fa’atupu ai pea lagona ma maua ai nisi manatu lelei. Aua a tatou o lava i le finaglo o le Atua o lo’o fa’amauina i le Tusi Paia, ma tatou fua i mea o lo’o faia nei e so’o se ekalesia kerisiano lava, ona tatou iloa ia lea ma le maumaututu, ua matua tele lava le fete’ena’i ma toe fetuia’i ai le finaglo o le Atua i le Tusi Paia ma le fa’atinoga o faia e tapuai’ga lotu. O vaega la ia e taua ai fo’i le lu’itau ua aumaia nei e le Ta’ita’i o le Tapua’iga Samoa le Susuga ia Falefatu Enari, e toe feala ma toe fagufagu ai fo’i taua po’o sa’o a taua auaunaga o faia nei pe leai. Ne’i o ta faia a ta auaunaga i le Atua ina ia manaia i le vaaiga fa’aletagata, ae le manogi lea i lo ta Atua ma Lana Silafaga. E le tatau fo’i ona avea le eseese o o tatou lagona ma talitonuga e fai ma auala mai o le tiapolo e lepetia ai lo tatou nonofo lelei ma le va fealoaloa’i pe lepetia ai fo’i lo tatou nofo fealofani fa’aleuso ma fa’aletuafafine Samoa lava ia. Ia ao fo’i Samoa ona tatou manatua e le feta’ita’i a ia ni agaga ae tatou tau fai sailiili ma su’esu’e pea i le mea moni e pei fo’i o le fa’avasegaina po’o fea o i ai le lelei a’o fea foi o taoto ai le leaga. E pei lava ona fa’atonuina i taua e Iesu ina ia ta su’esu’e ma fa’alogologo i agaga uma lava pe mai le Atua pe leai fo’i, ona ta taofi lea i le agaga lelei ae lafoaia ma tia’i i agaga le lelei. E pei lava o le autu o le ta polokalama lenei, e ui lava ina fa’amata e malie nisi talaiga ma nisi fo’i o mau i le fa’alogo ma le vaai ae le anoa ma moni pe manogi fo’i i le silafa’afofoga a le Atua Silisili Ese, ona moni loa lea o le mau o le ta polokalama, aua e “Sa’o ae le A’o.”. Ia manuia tele lau faitau ma ou faiva alofilima Samoa i lenei fo’i vaiaso. Tatou toe maua fo’i se isi fa’atasiga i le isi fo’i a tatou lomiga.
Soifua
E faia pea..............................
S A M O A
O
A U S E T A L I A
2 6