PENI A LE FAATONU Vui Seigafolava Sione Masinamua
O si ota Lima lava e Toe pa’ia ai si ota Mata
Ona o lo’o toesea le Fa’atonu Sili o le tatou nusipepa, le tofa ia Asiata Faumuina Faleao Sa’olotoga Tavu’i-Leota i tuatuagia i le atunu’u, o le ala lea ua ou tauaveina ai lana pitola’au i lenei itulau.
O
ute fa’ataloga atu ai i le paia tele o le aufaitau, ae maise fo’i o nai tama ma tina matutua, ma le paia o le aufaigaluega totofi a le Atua, i so’o se vaega lava o lo’o mafai ona o’o atu i ai le auaunaga a le Foafoa o Samoa. E fa’amalo atu fo’i i la outou tapuaiga a’o alo faiva ai ta’ita’i o lo tatou atunu’u ma le atunu’u atoa, i taligamalo e pei ona ua mou malie atu. O le upu moni lava ua tele lava upu i manu, a ua itiiti upu i mala e pei o lea muagagan fa’aleatunu’u. O upu lava a le atunu’u i le au Fuesina ma le au Fueloloa, “O lele ua fa’aifo nei le tuamafafilimalae, ua fa’aifo fo’i le segaali’i, ma ua silimea fo’i le seuga ma ua siliofe fo’i le tautai matapalapala mai lana fa’atautaiga”. Samoa, ua malie o ma ua malie malo. Aua sa siva Lesanalala, ae ua talanoa ai le aualuma. Ua lologo le lalolagi atoa i lau puleto ma lau pulefa’aaloalo, le palemia ma le malo, ua outou si’i le fale o Asomua i le mauga, aua le igoa fa’apelepele o Samoa. Aua Tuilaepa Lupesoliai Sailele Malielegaoi sa e fa’atalau’ula, e pei o Meto na tagivale, i sona maota. A lele ua tali atu lou atunu’u atoa e fau lo tatou maota e pei o le fale nai le Amoa. Se ua se togi le lagatila ma ua outou fa’apulou i le tualima Samoa, ua malo le fai o le faiva. Ua tuana’i la ia fatia ae paga lava lea, ua le o gatasi lava le futia ma le umele e pei o lea upu. Aua ua le asa lava ma nai to’atuga e tula’i mai, ua toe samua ai le taele o lou sa Samoa. E pei o le fa’aulutalina o le ta mataupu, “O si ota lima lava e toe pa’ia ai si ota mata”. Ua le o po se lilo i le fa’afofogaaga a Samoa, nisi o fa’aletonu e pei ona tula’i mai ai le safia ai o meatotino a nai uso o le aiga folau o le Pasefika mai Hawaii, ona o le le mafaufau ma le lima tagoese o se tasi o ali’i talavou o le atunu’u. Ua moni ai le saunoaga a le Ta’ita’i o le atunu’u, se o oe lena, sa sili ai ona e le fanau mai. Aua ua le gata ina e toe fa’alumaina le igoa pele o Samoa, ae ua e tu’u fo’i le maka leaga i le igoa o ou matua ma lou afioaga, tulou.
I le ma le isi, o to’atuga ua faoa ai i le ta finagalo o le to’atele o le atunu’u, ona o amioga a le komiti ua latou fa’afoeina nei le Teuila ma le Tausala o Samoa (Miss Samoa). O le eseesega lea o le poto aoga ma le atamai i le tofa ma le utaga masani fa’asamoa. Aua a fua i finagalo fa’aalia o le atunu’u, o lo’o manino mai ai le leai o se tofa ma se moe fa’aleatunu’u, a ua na o le poto fa’apapalagi lava o lo’o si’omia ai lenei komiti. O le leaga fo’i lea o le fa’asoa e le penitala ma le fa’alue nofo i ofisa o fuafuaga fa’aleatunu’u, aua e aumai ai ua ave le ulu i le e ave i ai le si’usi’u, ae ave le tuala i le e tatau i ai le vae o le manu. Afai o lea na atofa luma maota o le malo e fa’atinoina ai ina ia mafai ona maimoaina e le atunu’u le taualuga o faigamea o le Teuila ma Taligamalo, ae aisea la ua toe totogi ai le ulu o tagata ina ua ave i le Maota o Tupulaga Talavou a le EFKS? Ua sa’o ai le tamali’i Samoa lea ua leva ona ia fa’afoeina le tulaga tau Miss Samoa, ua sili ila outou komiti tupe nai lo le fa’atauaina ma tauavemamalu le igoa o le Tausala Samoa. Ua leai ni Ta’avale Teuteuina, ae toe fa’ati’eti’e atu le Tausala Samoa i le Uilaafi, oka oka. Ua galo ia outou o le Tausala Samoa o le I’oimata lea o le atunu’u? Ae ua galo ia te outou le tautiga o le atunu’u i le taligamalo sa fai nei? Aua e le o outou ua avelelei ai e malo o le lalolagi sa i le SIDS, le igoa o Samoa, ae o tagata. O tagata tonu ia sa tatau ona outou fa’atauaina, ae le o le toe fa’aaoga e su’e ai a outou tupe. Ia o le fautuaga, ia toe sasa’a le fafao ma toe timata le upega mo a taeao. O upu a le atunu’u e fa’amanatu pea, “Afai ua sala uta, ia tonu tai.” Aua o a lava mea tatou te fai, e fa’amasino mai pea le atunu’u. ia ao fo’i ona silafia, “E le Tu mati’a tagata i se atunu’u, ae Tu mati’a le atunu’u ona o Tagata”. Ia manu teleina ou faiva ma lau tapuaiga Samoa i lenei fo’i vaiaso, ma ia puipui le Atua i lou soifua ma le ola. Soifua...........
“Fa’asilasilaga Taua”
O se tasi o Agaiotupu iloga o le Malofie, Su’a Tiatia Tafili o le a malaga mai i Sini nei i le masina o Oketopa, ina ua mae’a ai nisi o ana galuega tetele i Amerika, ona o nisi o le atunu’u o le a fa’apa’uina i ai le Lagimalofie, o lea e fa’asilasila atu ai i so’o se tasi lava e mo’omia lea galuega, ona fa’feo’ota’i ane lea i le Telefoni feavea’i: Fa’afetai
TAU: Tatau: $2,500 - Malu: $1000
Le Si’ufofoga na Mua-i-Malae (2NBC 90.1 FM) Po Aso Faraile Ta’itasi - 9pm - 11pm Ki lau leitio ma e fa’afofoga ia Lemalu F Pe’upu’emai ma le Vaega
Tala Fou o Samoa / Ausetalia. Tala o Vaifanua o Sini. Tala o Ta’aloga. Fa’aaliga. Fa’amanuiaga. Musika Malie ma Polokalama Fa’apitoa.
Le Auaunaga na Mua-i-Malae i Fa’asalalauga i Luga o le Ea Studio: 02 9534 2777
L E Le Foafoa o Samoa Australia
M I T A M I T A G A
O
S A M O A
O
A U S E T A L I A 16th September 2014 . 3