Motugaafa a le Matua Faitama O leniei polokalama, ua fa’aopoopoina ai le tautua a lau nusipepa mo Oe le tagata faitau. O se polokalama ua tapenaina ina ia avea ma fa’alagolagomaga o le tagata ua fia maua sona to’omaga i nisi o mataupu o lo’o a’afia ai le soifuaga. O nisi nei o tusitusiga e faipa’aga ai le auaunaga a lau nusipepa, fa’apea fo’i ma le mamalu lautele o le atunu’u ia latou fo’i tusitusiga.
“Matua! silasila i fanau ma aua ne’i tu’ua le galuega taulogologo”
O
se feau molimoli lenei na tu’uina mai o se fautuaga mo tatou matua, mai le matagaluega o leoleo a NSW, lea ua molimoli atu e la tatou nusipepa, i le silafa’afofoga a le paia o le atunu’u. Ona o se fa’alavelave tau ta’avale na a’afia ma maumau ai le ola o ni fanau talavou i le amataga o lenei masina, lea la ua auina mai i le tatou nusipepa, e le matagaluega o leoleo ina ia lapata’ia ai o tatou tagata i le matuia o fa’alavelave tutupu mai pea, ona o alo ma fanau talavou. O le upu moni lava matua, e leai lava se tasi o tatou e fia alafa’i mai i ni tala fa’anoanoa e uiga i alo ma fanau ua fano ma maumau lo latou soifua ma le ola, ona ua so’ona fai ma leai ai se fa’autauta lelei. Pe o le feoaiga i ta’avale, po’o ni tafaoga fo’i i falekalapu, o le agaga momo’o o so’o se matua, o le fa’atofa atu i fanau i le fiafia ma toe fa’afeiloa’i atu fo’i ia i latou i le manuia.
Ioe Samoa e, ua faigata nei aso, aua ua tupu le poto ma ua televave fo’i le una’i mai o tulafono i le aia tatau ma le aia sa’oloto, ua tau le mafai ai ona fa’atino o tatou tiute fa’amatua i fanau. Aua ua ese fo’i nei talutalu fou, ma ua tatou fesiligia ai la tatou aia fa’amatua, pe ua avea ea lea ma afuaga o le pa’u atu o le tele o fanau i a’afiaga o le ava malosi ma fuala’au fa’asaina? Ae pe ua avea ea ia suiga ma le fa’atinoga o le Tulafono e taomia ma taofia ai lou titi faitama ma lou tiute fa’amatua Samoa? O ni fesili taligata lava ia i lo outou soifua ma so matou ola vaivai, aua e le mafai ona tatou alo ese ai, ma e le mafai fo’i ona avea lea ma o tatou si’omaga ma tatou lafitaga pe o se talipupuni fo’i. Aua o taua na fa’avae mai i le olaga putiputi i aiga, le nu’u ae maise o le galuega taulogologo a ekalesia ma le aufailotu.
L E 16th September 2014 22
M I T A M I T A G A
O
O lea lava o lo’o tatou malaga mai ma lena soifuaga, ma o lo’o fa’atinoina lava e o’o mai i le aso. Pau o lona, o lo tatou fesili pea, po’o tonu ma sa’o lo tatou fa’atinoina o ia tiute? O lo’o ia te oe le tali. O lo’o i le tatou fa’alapotopotoga le tali. O lo’o i le aufailotu ma ekalesia le tali. Ae o le fesili, pe fa’apefea ona fo’ia? E faigofie lava lona tali. E mafai ona fo’ia ia fa’afitauli i alo ma fanau, pe a mafai ona tu’uese lo tatou fa’avalea fa’asamoa. E tatou te mumusu ai e fai atu o se tala, ne’i ita fanau ia tatou, ne’i ita tagata ia tatou, ne’i ita le lotu ma le faifeau ia tatou. Ma ia aveese le manatu fa’amatua fai tama fa’avi’ivi’i. Afai lava tatou te iloa o lo’o i ai fa’aletonu ia tatou fanau, e lelei le pese mai i fafo. Fa’ailoa i le isi ou uso a tagata. Fa’ailoa i lau faifeau. Fa’ailoa i lau ekalesia, ina ia mafai ona maua ai se fesoasoani mo tatou ma o tatou aiga. Aua e te fefe ma e matamuli ne’i faito mai tagata, lau faifeau ma lau ekalesia, ma fa’asinosinomiaina ai oe ma a’u o ni matua le lelei. Ae ia sili ona maualuga ia te oe le to’atuga o lo’o alia’e a’e i lou aiga ma lo’u aiga. Faitalia le tagata tautala ma le faitala, aua o se tagata e fa’apena lona lagona, o lona uiga e le se tagata lelei ma o se tagat e le fia fesoasoani, ae o tagata tonu na ua leai se alofa o le Atua o i ai. Ae aua ne’i tu’una ai lou saili i se fofo o fa’afitauli, aua e mama’e le tava’e i ona fulu, e auau fo’i le matua faitama i
lana fanau. O le tula’i mai la o le fa’alavelave tau ta’avale lea ua fano ai nisi o fanau talavou se to’afa, e leai se isi o tatou matua e momo’o i ai. O le a’oa’oga sili ona taua ua maua mai ai, o le tatou le fiu lea e fa’atonu ma tautatala ia tatou fanau. O upu masani lava o outou alo ma fanau, o se lumana’i lea o aiga, nu’u, ekalesia ma le atunu’u. Ae o lenei fa’alavelave, ua leai ai se lumana’i o aiga, nu’u, ekalesia ma le atunu’u o toe fa’amoemoe ia i latou nei, ona ua sese lo latou la’asaga. Fa’afetai i le Atua ua leai se tasi o alo ma fanau a lo tatou atunu’u o a’afia ai. Ae o le taunu’uga o lenei fa’alavelave ma lona va’aiga, e matua lagona uma ai e so’o se matua le loto nuti momoia ona o nei fa’alavelave tutupu pea i fanau talavou. O le feau molimoli atu mai le tatou nusipepa, “Matua silasila toto’a i fanau ma aua ne’i tu’ua le galuega taulogologo”. Ia i ai pea le manuia ma le filemu o le Atua i luga o alo ma fanau a Samoa i lenei vaiaso. Ia e fesili i lou atali’i po’o lou afafine i aso uma i le fesili lea.
Are You Ok? Soifua...............
S A M O A
O
A U S E T A L I A Le Foafoa o Samoa Australia