Dentro deste programa Comenius, nunha das visitas preparatorias que tivo lugar no IES Luís Seoane naceu e deseñouse unha pequena proposta de traballo entre a escola portuguesa e o noso instituto que ten que ver coa irmandade das linguas galega e portuguesa. Tratábase de analizar polo miúdo a historia común dos dous idiomas e a produción literaria en galego-portugués.
O traballo desenvolveuse do seguinte xeito: 1.Presentación do alumnado das escolas Aquilino Ribeiro de Oeiras (3ª Turma Turismo) e Luís Seoane de Pontevedra (3º PDC) que ían colaborar.
2.Procura de información: o contexto histórico, os textos, os autores; a actualidade. 3.Elaboración de paneis: Literatura medieval galego-portuguesa; Trobadoras e trovadores de hoxe.
4.Elaboración de libro: A lingua galega: de corazón a coração
5.Envío de materias para a escola portuguesa; recepción e estudo dos materiais entregados desde a Aquilino Ribeiro, incluídas dúas exposicións cedida polo Instituto Camões baixo os títulos de A Língua Portuguesa: Um Océano de Culturas e O Tempo da Língua.
Todos os materiais foron enviados coincidindo coas celebracións emblemáticas das dúas literaturas analizadas: o 17 de maio de 2014, Día das Letras Galegas; e o 10 de xuño, Día de Portugal, de Camões e das Comunidades Portuguesas.
As fontes consultadas foron variadas: enciclopedias, libros de texto, libros de lectura e páxinas web. A análise da documentación concretouse nos autores e xéneros líricos de cantiga de amigo, amor e escarnio- maldizer: Afonso Eanes do Cotom, Bernal de Bonaval, Meendinho, Afonso X O Sabio, Martin Codax e Paio Gomes Charinho. As composicións creadas polo alumnado foron totalmente orixinais e gardando as normas propias da poética medieval adaptadas á lingua actual: paralelismos, leixapréns, refráns, métrica, ritmo e rima,…O libro baseuse, fundamentalmente, no homónimo de Pepe Carreiro tanto nas ilustracións coma no contido. A chegada dos paneis portugueses e a exposición pública de todos os materiais nos respectivos institutos trouxo consigo un coñecemento profundo das raíces comúns de Galiza e Portugal polo que a avaliación do método de traballo escollido, do proceso e dos resultados non pode ser máis elevada.