Coñece as escolas de Fútbol Fundación Celta 2014-2015 Publicado por Fundación Celta de Vigo Actualizado: septiembre 6, 2014
Coa chegada do novo curso escolar, a Fundación Celta de Vigo ofrece como cada ano aos celtistas e afeccionados ao deporte a posibilidade de formar parte das escolas de fútbol que darán comezo o próximo 1 de outubro. Tras o record de asistencia nos campus de verán 2014, a Fundación Celta presenta un amplo catálogo de posibilidades para que os afeccionados celestes poidan gozar e aprender da man dos profesionais que traballan coa canteira do Real Club Celta de Vigo. Este ano preséntanse numerosas novidades, novas sedes e novos horarios, que amplían considerablemente a oferta para que todos aqueles que queiran gozar da experiencia poidan facelo con maior comodidade. Para o curso 2014-2015, ademais da Madroa e o colexio Ou Castro, estarán dispoñibles tres sedes máis; a do colexio Os Sauces en Pontevedra, a do Concello de Pereiro de Aguiar e a do colexio Montecastelo, tamén en Vigo.
Tamén este ano se estrea unha nova sede, no Concello ourensán de Pereiro de Aguiar cun aforo máximo de 30 rapaces, e horario de 17:30 a 18:30 no campo de fútbol de Loñoá. Os rapaces e rapazas poderán apuntarse entre 1 e 4 días a escoller de luns a xoves. Ademais, calquera interesado en coñecer o funcionamento das escolas, terá a oportunidade de gozar dunha sesión de adestramento totalmente gratuíto na Madroa, o luns 15 e martes 16 de setembro en horario de tarde (de 17:15 a 18:45) para o que será imprescindible contactar coa Fundación Celta antes do próximo xoves 11 de setembro. Para iso é imprescindible enviar un correo electrónico á dirección info@fundacioncelta.com co nome e apelidos do participante, a ano de nacemento, un teléfono de contacto, e o día que vai asistir. Calquera participante que non envíe esta información poderá quedar excluído do adestramento. AMPLIACIÓN: o próximo luns 22 de setembro será posible asistir a un novo adestramento gratuito en A Madroa, exclusivamente para aqueles rapaces e rapazas que non puideron asistir ós adestramentos previos. O prazo de inscrición estará aberto ata o sábado 20 de setembro. Durante o curso escolar, as escolas celebraranse dous días por semana, en períodos dunha hora e media diaria. Durante as sesións, os mozos e mozas traballarán seguindo a fórmula que se emprega nas categorías inferiores do Real Club Celta e combínase ademais coa formación e o entretemento xa que a filosofía da Fundación Celta de Vigo é a de contribuír á formación dos máis pequenos, e transmitir os valores positivos do deporte que poden ser aplicados na vida diaria como son o respecto, o traballo en equipo, a humildade e a capacidade de superación.
Ademáis, este ano estará tamén dispñible o curso anual de tecnificación deportiva destinada a rapaces e rapaces de entre 8 e 19 anos que desexen perfeccionar as súa técnica futbolística.