DOMENICO MARCHESINI (Mènego Pìcolo)
“ De cô se và a Barbana “
“ De cô se và a Barbana” Cô ze in prima domenega de Lugio ogni ano in pruçission se va a Barbana a rassegnahçe a Santa Lisa Beta co la Madona nostra. Più solana che ze, più co de cuor e contentisia, là a rengraziah se va la so bontae per la liberazion de i nostri veci da pestilenzia de morturitae.
Sì, a dì vignuo de questo voto santo da l’alba sin le oto, duti in pie se sta prontando barchi e spetah ‘l toco da ‘l campanil, digando avemarie. Dà ‘l son. Fora de ciesa vien portagia la nostra Beata Vergine a la riva soto ‘l so baldachin fra arzini e palme int’un batelo grando e duto in riva, e in questo va anche i preti e i cantauri.
In oltra barca a pope ben ligagia va drento ‘l podestae e quii de l’Ufissio co garghe oltra persona respetagia. Za tre reburci o quatro ben sestai da prova ‘i speta, tra un furmigoleo de le aneme e batele, torçi e crose che ‘mbrata ‘l porto e duti int’un pregheo.
Cô ben ze lesto i mola e co Ela insieme ’i va ‘mbrivai cofà le s-ciopetae e le oltre barche intorno che in milanta ’le ze carghe de zente e imbandierae, cantando le letanie; che de scorta da prova, in fianco e drio, de sta Gran Mare, puo le più svelte j fa in canal la volta col dah vogae no mole e gnanche rare.
Qua le campane intanto liegre sona; sinchè sta Pruçission in luogo riva co tanta zente che fa dih doboto: no resta qua in paese anema viva. Rivagia che ‘la ze, se sa, a Barbana in quela ciesa i preti canta messa e può, co ‘l fah de nanzi de remando ’i vien co sodisfagia la promessa.
Crature, veci, zuvini e mariai poviri, siuri e de ogni porta e scala de i pochi remagnui qua ‘ncora a Gravo, cô ben la ‘riva in porto ‘i va a ‘ncontrahla. Per devozion de tal solenitae, gnanche a Rialto no ze tanta zente comò che in ‘sta zornâ ze a Porta-nova, che a duti cu che veghe j resta in mente. *
*
*