Giosse setenbrine by Aldo Tognon

“ Giosse setenbrine “

poesie di

Stefano Dovier “Tèti”

“ 21 de marso, zé primavera “ ‘L odór de erba fresca cònsa la marina, bonòra un rusignolo ‘l canta la matina. Repari bianchi e sichi de colpo i se pitùra, e in aqua un bogoléo de pesse che hà primùra. Anche ‘l cuor dii zuvini scuminsia a bàte forte, ‘l sol li bàsa in cavo e puo i fâ la corte. Le bele fantuline ‘l bossolo le vêrze, e aval de fresche riòse al nio le coverze.

“Al capitolo de la vita “ Se scuminsia a scrive ‘l libro de la vita, co’l color de le preghiere de la mama, le parole le zè piene de oni bràma, ma lostesso la paura zè onbrìa sìta; e i travagi i zè più grandi pe’ un pare che no’l sènte la creatura cresse drento, che oni sigo de dolor zè un tormento, e ‘l darave al cuor…per esse èlo mare. Quanti sogni e speranse che s’hè intressa ‘ntè le noti che i sussiai i zè sparii e tu pinsi solo ai atimi valii, pe’ la picola mansiòn che par stranessa. Finalmente piturao s’hà ‘desso ‘l sielo e quel sigo l’hà levao la gno speransa, la semensa la zè nata in quela stansa… ‘desso ‘l libro ‘l hà ‘l capitolo più belo.

“ Amor casòn “ Bava freda de maistro, la me porta odòr de mùstio, i recordi i và int'un vìstio ‘npicào in t'un logo perso. Gera ani de travagi, al pagiòn no se veghéva, fora in barca a calà i màgi... pien de sono se sussièva. Quii do travi carolài che i tigniva su de duto, agio,cove e bacalài e al vìstio ...ormai suto. Gera la nostra capana, leto-fogo se viveva, de l'amor gera la tana, comò un glîsine cresseva.

“ Aria, vento o bavisela fina “ Cò bona l’aria de matina, fresca, neta, odor de pase, anche i oseli carghi de zogia, no i tase, pàr squasi sia ‘nà medisina; e me la ciapo a boca piena, che sia buora o mistral, che sia garbin o sirocal, zè bava che la me còre in vena. Zè linfa che me neta ‘l sernelo, ogni odor un fior novo, ogni refolo un baso tovo, … e vêrze i vogi vardando ‘l sielo. Fora ‘ntel mar grando, ‘ntii cavìli la sbusineva, la gno anema la sboleva e co’ ela ‘l gno pinsier a savariando. Aria, vento o bavisela fina, zè binzina che me ‘npigia drento, me brusa via ogni lamento, dandome morbin, zà a la matina.

“ Giosse setenbrine “ Le cage zò frede le giosse setenbrine, le hà 'l savór de mosto... de vigne, quà, vissìne. I brividi te ciapa, i core pe' la schèna, e zà tu pinsi al fogo che'l stiopa pe' la sèna. De qua un poco ‘l quarnerasso al portarà sussiài, e a lài al pàra via i zurni solesài; e drento le guìne se cassaremo 'ncora, spetando zurni coldi e zogia che devora.

“ Autuno graizan “ Ninbi niri pe’ levante che i coverze i vogi ‘l sielo, liegri ciapi de storneli che i saluda ‘l tenpo belo; i se ghèta in furlania pe’ fâ l’ultima magnada e passùi de “San Martina” in Gopiòn i puza l’ala.

Le zornade le se scurta, le silize le zè ‘ndae, e la buora la despugia spiaze ‘pena ‘ndormensàe. Zè l’autuno graizan Co’l savòr de antigo in boca, co’ recordi che s’ingropa, …storie vece pe’l doman.

“ Bragossi desmentegai “ Do bragossi puzai là inte la séca in Panpagnola, gera barche de sabiòn che le 'ndeva fin a Pola. ‘Desso le vegheno scarne le ordenade le vien fora e la chilia ormai tabaco la se disfa con la buòra. Marinèri duti fieri sù de ele i navigheva cò burasche e tenporàl al salmastro in boca i vèva. Quanti mari navegài quanti porti zà salpài quante storie che i hà drento quei fassuni carolài. Me le vardo in riva ‘l molo e me par che le me ciama perchè forse le vol dime che son un'anema graizana.

“ Brusa ‘l cason “ Ze tinpi duri e mundi crui solo al fogher te dà la pase, sufia al maistro refuli fridi e sul palù par duto tase. Drento ‘l cason 'nà maravegia, 'ntela caìna ze al cugiaron, stiopussa al fogo e ‘l stiarisse la sera e ‘ntela napa ze duto un splendor. Sbola per aria un mier de falische che par lunserne sora ‘l cason, e le se pusa co' siera triste, proprio sul colmo de là costrussiòn. Vanpa de colpo duta la mota, comò mitralia canta la cana, al sielo ‘l stiarisse comò lanpo de ton e la sinisa dà color a la dosana.

Pùo co' le lagreme al vanpa de più, al se riflete al fogo ‘ntei vogi, ormai i stissuni....restai.... i fuma mogi e la gnò casa ‘ntel tapo, no hè più. 'Desso al maistro al porta via quela sinisa che gera un cason, i và a sigonda l'anema mia e duti i recordi passai in quel pagiòn.

“ I culuri de’l cuor “ Inte’l reparo hè visto un pitòr, i son 'ndao vissìn per veghe ‘l lavòr, ma inte la tela no gera culuri, la gera bianca comò che zè i muri. Duto nervoso stevo a spetà che gargossa al se meta fà, co’ vogi azùrini che i pareva nuóli al se zira e al me dise: -Tu vighi i culuri? Restao comò un mona, me i digo de no! La tela zè bianca...ma....zè gargossa però. Gera un picolo punto che rosso al pareva: -Alora tu vighi che gargossa gera! Quel zè al tovo cuor ...e per veghe i culuri và intel palù e crii in quii loghi.

De verde pitùra i tamarisi le mote marón co riflessi grisi al fondao blù e al sielo azurìn e missia i culuri per fà ‘l mazurìn. De rosso al tramonto comò zè l'amór che t’hà per stò logo drento al to cuor. Cô catào tu varà duti i culuri vien quà de me e là de duti i pitùri, che al quadro bianco mai più resterà perchè tu col cuor tu lo ‘npinirà.

“ Madonina mia “ …e me te vardo ‘ncantào, cô ‘l dosso ‘l sgrisola, vissin de tu nâsse un’oltra isola, che’l Creator no hà ‘ncora piturào. Dolse anema mia, cô i corcài in bandiera i te corona, in quel barco, fato pre tu, Madona, i gno pinsieri, co’ ili i sbola via. No zè tignùe pre la gno comossiòn, te vardo ‘ncantesemao, e sbasso i vogi…emossionao, vignindo a rente, co’ tu in processiòn. Oravo basate e ciacolà co’ tu, ma son un’ anema picola, e la gno fede la zè massa ridicola, che oltri, tanti oltri i hà più bisogno de Tu. Ma son contento ‘desse graizan, anche, solo pre dì…Madonina mia! Perché a lefè te sento mia, sensa sintìme un rufiàn.

“ Nina nana “ Fà la nana fantulina la to' mama zè vissìna, i to' vogi s'hà serào comò un fior nassuo inte’l prào. Fà la nana ruòsa bela che le ole de’l mar grando le te cùna comò stela, quela che tu stà sognando. Fà la nana figia mia che to' pare ‘l stà vogando e fra i schissi a prova via al to' viso ‘l stà vardando. Tu son 'ncora un vaninelo e ‘l mar zè massa grando, fà la nana fantulina che'l doman stà zà rivando.

“ Oràvo “ Oravo, comò un nenbo fàme cunà, fàme sburtà de’l vento fin che no’l me sfà. Oravo esse un àve, sbolà ‘nte’l sielo biavo, in elo catà ‘l gno favo pre dormensame in pase. Oravo esse àve o esse nenbo, pre ‘vè ‘l cavo liziero, sbolà via de ogni pinsiero e pùo sparì a remengo; ma no comò fàina ladrona, ma comò silisa de mar, che la conbate ‘nte’l sirocàl ‘ssiochè la se fà l’ala bona. Sinò, oravo esse solo fiama, che la profuma de assensio, pre dà luze e odòr al silensio int’un cuor che no là brama.

“ Ortensia “ Al corso l’ha cunào un fior de furlanìa, che co’ la corentìa, ‘nte’l dosso ‘l s’ha puzào. L’ha lassào la sèsa e dute le so’ radize, pe’ sercà in ‘ste are grize ‘na granda cesa; Zè un fior de speransa, un fior pien de fede, che’l pelegrìn la beve e a l’anema i dà sostansa. No zè un fior de mete in credensa, assiò che’l fàssa aria bona, zè ‘l fior pre la Madona, co’ un nome senplisse……ortensia.

“ Re solo de note “ ...e solo in mezo ‘l vial vàgo burdizando, co' l'astio comò un sial int'un silensio grando. I vogi i veghe torgolo e stago savariando, gno frà sul canpanil vilio 'l me stà vardando: - Tu son figio de Gravo, al nio zè al paradiso, perchè tu gheti via l'orgoglio inte’l saliso?Cô bevo do biceri, sento la bava grassa che la me fà svolà più inalto de 'nà agassa; e cô sòn in mezo al sielo, in quel silensio biavo, me par de 'vè un castelo e zò no tornaravo;

e pe' stà 'ncora suzo ingiutisso ‘ncora vin, ...la bava la sparisse, me cato int'un scalin. Me vien manincunia, hè perso al gnò castelo e puo anche l'orgoglio svanio a lai co' elo. Cussì me cato qua a favelà co' tu, tu, anzolo de Gravo, me re che no son più.

“ Rii “ Rii, pìni de aqua fresca de mansiùni lôve, in boca le côve de cugùli in festa. Rii, che i se ghèta inte’l canàl comò piova inte le rôge ma zè aqua sensa dôge che la spèta ‘l sirocàl. Rii, nùi co’ la dosàna pàr bisse ‘nte’l palùo che i segna ‘l fango nùo, cunào in tramontàna. Rii, le vene de’l fondào che no’ le cata zôgia, le hà perso anche la vôgia del grando mar salào.

“ Solo vela “ Comò podè desmentegate se sènto ‘ncora ‘l tovo dolse odòr, se strenzo tra le mane ‘nà promessa comò che fà la bava ‘ntorno ‘l fior. Tu sòn al miel de la gnò vita, la bava fresca che me basa ‘l viso la luse inte la rogia del narciso che dà luzòr a ‘nà figura sìta. E pur zè zurni che tu và lontana, sabiòn che no se riva tignì in man, rapìa de vogi persi in tramontana, che i veghe la so pase più lontàn. Voravo esse co’ tu in quii muminti pe’ esse finalmente ‘nà roba sola, me, pala del timon ‘ntè le curinti, tu, man che strenze forte la rigola; ma me contento d’esse solo vela, che tu la issi o cala a to’ piasser, pronta pe’ portate senpre in tera, cô tu và via, de ela, co’l pinsier.

“ Vòga figio “ Siia figio mio, che la barca hà massa ‘nbriva, voga pian sensa fadiga, che lontàn zè ‘ncora ‘l nio. Siia figio mio, che la note la zè bela, duto int’un co’ la batela in ‘sto nostro grando lio. Ferma ‘l remo figio mio, sinti ‘l mar comò che’l ragia e le ole inte la spiagia, le favela co’l cuor mio. Voga ‘desso figio mio, che’l Creator ‘l zè che’l me ciama e speciào in quela lama, vego duto ‘l passào mio. Zè rivào al gno ponente, ma per tu zè un’alba nova, sburta forte, issa la prova, scugnùo ‘ndà contro corente.