«Jeu giavischass in tec dapli hotellaria»
Per l’avertura dalla stagiun d’unviern 2024/25 ha l’organisaziun Surselva Turissem SA envidau la populaziun ad ina sera d’informaziun. Il tschunavel onn meina Kevin Brunold da Surcuolm la gestiun operativa. Sco quei ch’el sincerescha ell’intervesta culla FMR, ei la destinaziun Surselva francada ella fiera turistica.
AUGUSTIN BEELI/FMR
Vendergis ha l’organisaziun Surselva Turissem, en collaboraziun culla cuminonza d’interess dils proprietaris da habitaziuns secundaras, envidau ad ina sera d’informaziun a Danis. Jörg Hertig, il representant da quella cuminonza ha explicau ch’ei seigi ina nova plattafuorma communabla per sebrattar e s’informar Duront duas uras han ils partenaris e purtaders dil turissem d’unviern dau ina survesta dallas activitads e dils projects. Ernst Sax ha presentau tals sin territori da Sursaissa Mundaun ed IvoMaissen, il meinagestiun dallas pendicularas Breil-Vuorz-Andiast, da lur projects. La FMR ha priu la caschun da discuorer cun Kevin Brunold, il meinagestiun da Surselva Turissem.
FMR: Cull’entschatta digl advent entscheiva era la stagiun d’unviern Cun tgei sentiment meis Vus viaden en quella?
Kevin Brunold: Las reservaziuns ein fetg empermettentas, quei ei inagada gl’essenzial per haver in bien sentiment. L’emprema neiv ha fatg gust alla glieud da reservar. Ussa dependa ei naturalmein tgei che l’aura fa vinavon, quella ei la finala la megliera vendidra dil turissem.
Il num «Surselva Turissem» irritescha meinsvart. Sa la publicitad propi tgi e tgei che s’auda tier Vossa destinaziun?
Il num ufficial da nossa destinaziun ei effectivamein «Surselva». La societad includa las vischnauncas da Breil, Glion, Sursaissa Mundaun e Lumnezia. Affiliadas ein era las vischnauncas Val Stussavgia, Trun e Sumvitg
Quei para in territori diversificau e spatitschau. Ei «Surselva» ina destinaziun identificabla, cumparegliau cun auters territoris, per exempel Val S. Pieder ni Flem Laax Falera?
Las duas destinaziuns che Vus numneis ein nossas proximas vischinas ella fiera turistica Tener ensemen nossa destinaziun Surselva funcziuna detg bein. Il gremi strategic ei il cussegl d’administraziun. Quel representa nossas sis acziunarias, quei ein las quater vischnauncas e las pendicularas da Sursaissa e da Breil. Mintgina ha ina cumpart da 16,6% al capital d’aczias, pia neginas han ina maioritad. Quella constellaziun garantescha da secunvegnir sil livel vischnauncas e pendicularas. Enteifer la destinaziun sedifferenzieschan las partenarias. Glion, il center, Breil cun fetg bia letgs e Pradas Resort, Sursaissa e Lumnezia cul territori da skis e purschidas da stad Lu dat ei specialitads, sco la cultura a Trun, Sumvitg cun Val Sumvitg e Greina, la Val Stussavgia cugl accent Ruinaulta e vallada fetg rurala
Co eis ei da menar in tal menaschi diversificau?
Ei va bein, gliez astgel jeu confirmar Perquei che las persunas s’identificheschan culla Surselva, sco regiun che includa tut quellas qualitads e diversitads. Ils lungatgs ei in tema, il romontsch ed il tudestg dils Gualsers. Quei ei nossa DNA.
Vus tgamuneis quei menaschi il tschunavel onn. Tgei bilanza targeis Vus?
Jeu astgel constatar che nus havein saviu far gronds progress sesviluppar e seposiziunar
All’entschatta hai jeu giu l’incumbensa da rinforzar l’organisaziun. Lu eis ei stau da digitalisar quella. La carta da hosps ei stada ina finamira. Da niev havein nus saviu prender vidlunder las pendicularas da Breil culla vendita dils bigliets ed abonnaments. Gl’onn proxim
il
vegn la pagina d’internet a pussibilitar novs survetschs. Quei che fa plascher special ei ch’igl ei gartegiau da posiziunar meglier la stad Nus havein per exempel surpriu il lead da miracultura cullas guidas dils vitgs. Era la collaboraziun cugl Openair Lumnezia e cun Opera Viva funcziuna. Ussa havein nus in bien fundament pil futur Jeu sun optimistics ed ei fa plascher da tgamunar quei menaschi.
Ina destinaziun viva dallas pernottaziuns e dallas habitaziuns. Ha la Vossa memia paucs letgs da hotel ni memia biaras habitaziuns da vacanzas?
En tuttas siat vischnauncas da nossa destinaziun dat ei pil mument circa 8100 habitaziuns da vacanzas. Quei ei ina enorma cefra. En cumparegliaziun cugl onn vargau ei il diember carschius per circa 600. Jeu hai in cert respect da quei che schabegia momentan en quei sectur Ella hotellaria ston ins differenziar A Breil essan nus fetg cuntents. Leu ha il Pradas Resort engrondiu la purschida ed ei ussa tier 655 letgs. Il Pradas Resort persul fa tontas pernottaziuns sco l’entira hotellaria da nossa destinaziun. Per Breil ei quei sistem buns e la gastronomia existenta profitescha fermamein. A Sursaissa ha ei il pli grond diember da secundas habitaziuns ed era dus, treis hotels. In resort sco a Breil fuss giavischeivel. Ei marschan actualmein dus projects corrispundents: el «Chanzla» ein la vischnaunca, las pendicularas e la societad Fanzun involvadas. Lu il project Cresta dalla societad Allod Mathis. Sche quels vegnessen realisai, dess quei in grond stausch anavon Era en Lumnezia ha ei paucs, mo buns hotels. Denton era leu memia paucs letgs. Leu sperel jeu ch’ei mondi vinavon cul project sils parcadis dallas pendicularas a Vella.
Co giudicheis la situaziun a Glion?
Glion ha era hotellaria, denton in’autra. Ed jeu giavischass aunc in tec dapli. La stad profiteschan ils hotels da Glion dil traffic da velo e dil transit. Tgi che meina oz en general cun passiun e cor in hotel, ha fetg bunas schanzas da haver success. Glion sco liug da basa fuss fetg adattau per tuttas occupaziuns dil temps liber, ir cun skis, wellness. In hotel dapli fuss propi excellent. Sch’ins vuless dar in stausch a Glion, fuss denton la pendiculara sil Péz Mundaun decisiva.
Con avanzaus ei quei project?
A Glion, Sursaissa e Lumnezia eis el perinagada sin meisa. Nus fagein part dalla gruppa da
lavur dil project «Rhein&Rauf». Igl ei in project grond che drova temps pervia dallas regulaziuns e proceduras. El fa part d’in grond sistem che pussibilitass gl’access direct alla lingia dil tren. La colligiaziun directa sil cuolm sur la staziun dalla Viafier retica gidass da sviluppar la purschida da stad e d’unviern. Glion fuss predestinaus per quei sistem.
Ha Surselva Turissem insumma influenza sin projects ed investiziuns dallas pendicularas?
Nus enconuschein secapescha ils basegns e las premissas dils territoris da skis. Influenza directa havein nus buca sin lur investiziuns. Demai che las pendicularas ein acziunarias e representadas el cussegl d’administraziun, dat ei tuttina pusseivladads. Indirectamein essan nus en in brat cuntinuau. A Breil accumpignein nus per exempel la cumissiun turistica che ha sviluppau il masterplan. Finamira communabla eis ei da promover il carschen dil turissem sco part economica essenziala da nossa regiun.
Dalla clientella, respectiv ils hosps, survegnis Vus plitost resuns sche zatgei funcziuna buc. E da Vos partenaris?
Sco Vus scheis, survegnin nus als spurtegls e biros d’informaziun resuns che animeschan nus da migliurar e curreger quei ch’ei necessari. Nos partenaris ella destinaziun conferman savens che nus fetschien buca schliet nossa lavur e che nus hagien saviu sesviluppar. Il niev sistem digital culla carta da hosps communabla ei secumprovaus. Quel havein nus introduciu avon quater onns.Tuttas adattaziuns havein nus saviu curreger fetg spert. Nos partenaris s’encorschan era che nus fagein tut il pusseivel da migliurar ed optimar ils survetschs.
Dat ei projects novs ch’ein sin rucca tier Surselva Turissem? Gie, gliez dat ei zaconts. Inagada ei quei «Rhein&Rauf», la pendiculara da Glion sil Mundaun. In tema ei vinavon il trail da bike Péz Mundaun-Glion. Ulteriurs projects ch’ein sin rucca, ennevar pistas, pendiculara Valata-Cuolm Sura, in project da reiver aTriel. Lu ina colligiaziun fixa da bike denter Lumnezia e Sursaissa tuttina sco quella da skis digl unviern. E la finala buca d’emblidar ils projects da resorts a Vella, Misanengia e Miranigia ch’jeu hai menziunau. A Breil ei il project numra in la pendiculara directa Breil-Alp Dado ch’ei en planisaziun. Sch’ella vegn realisada, ei quei colligiau cun arver l’Alp Dado la stad e cun colligiaziuns viers Vuorz ed Andiast. Grond’impurtonza dundel jeu alla via communala denter Vuorz e Breil ch’ei projectada. Cunzun pil traffic public fuss quella fetg impurtonta. In da nos projects strategics fuss da cumplettar il traffic public cun ina lingia circulara Glion-VuorzBreil-Tavanasa-Sursaissa-Glion.
Kevin Brunold
Il directur da Surselva Turissem Kevin Brunold ha 39 onns e habitescha cun sia famiglia a Surcuolm, nua ch’el ei era carschius si. Suenter in emprendissadi tier la Banca cantunala eis el seperfecziunaus ed ha concludiu alla Scol’aulta specialisada dil Grischun cul diplom MA Business Administration.Elhaluvrauzaconsonnsscorevisurtier Price Waterhouse Cooper a Zug e turnaus silsuenter el Grischun sco cussegliader da vischnauncas. Igl 1. d’avrel 2019 ha el surpriu il post da meinagestiun da Surselva Turissem. El meina ina squadra da 15 collaboraturas e collaboraturs a Glion,Vella, Cuort/ Meierhof e Breil. Il biro central ei a Glion ella Casa Surselva alla Via dil Glogn 22a. (fmr/abc)
GLION
Decidiu per ina plazza artificiala
L’Uniun sportiva Schluein Glion (USSI) duei survegnir ina plazza artificiala sigl areal da Fontanivas. Igl ei ina investiziun decisiva pil futur dil sport da ballapei dalla Surselva.
CDM/FMR
En ina radunonza generala extraordinaria han las commembras ed ils commembers dall’Uniun sportiva Schluein Glion (USSI) decidiu vendergis vargau unanimamein da construir a Glion ina plazza artificiala da ballapei. Quei scriva l’uniun en ina communicaziun allas medias. La plazza vegni a remplazzar la plazza da pastg naturala existenta sper il bogn a Fontanivas, ella dueigi migliurar decisivamein las relaziuns da trenament dall’entira uniun e dall’entira regiun, «da quei vegn oravontut la generaziun giuvna da ballapei dalla Surselva a profitar», aschia l’USSI.
A disposiziun sigl atun 2025
Las numerusas giugaduras ed ils numerus giugadurs dalla cooperaziun da juniors dalla regiun (JG Surselva) che separticipeschan sut il num d’equipa «Team Surselva» a giugs da campiunadi, vegnan ad haver lur center da trenament a Glion. Il liug secatta amiez la regiun ed ei bein contonschibels da tut las direcziuns. Quei implont porscha bunas cundiziuns per trenar quasi gl’entir onn independentamein dall’aura. Il plaz duei plinavon star a disposiziun allas scolas ed ad ulteriuras occurrenzas da sport.
Culla realisaziun dalla plazza nova eis ei previu d’entscheiver la primavera proxima, aschia ch’ella stat a disposiziun sigl atun 2025. Il project vegn a custar 1,5 milliuns francs. La vischnaunca Ilanz/Glion sustegn el cun ina summa da 600000 francs ed il cantun Grischun, sur il fondo da sport ed il Concept per implonts da sport d’impurtonza naziunala (CISIN), cun 300000 francs. Per la finanziaziun restonta ei il club da ballapei responsabels sez e sto daventar activs. Previdas ein differentas activitads per gudignar sponsurs e donaturs. Las commembras ed ils commembers dall’USSI vegnan ultra da quei puspei clamai a lavur cumina. Che tuts ein motivai da far quei, han ellas ed els mussau avon strusch diesch onns a caschun dalla realisaziun dall’Arena da ballapei Crap Gries a Schluein.
Gie alla corporaziun nova
Las vischnauncas dalla Cadi ein vidlunder da fundar ina corporaziun en connex cul turnar a tschep dallas ovras hidraulicas.Tochen 2048 scadan ils contracts da concessiun cull’Ovra electrica Rein Anteriur SA (ORA). Gievgia sera ha era la radunonza communala da Breil priu posiziun en caussa. Ella ha approbau unanimamein la participaziun alla corporaziun nova ed era ils statuts corrispundents. La corporaziun duei entrar en vigur igl 1. da schaner 2025. Ella pussibilitescha da contrahar cull’ORA tenor la strategia cantunala. Finamira eis ei da mantener la segirtad dil provediment e d’augmentar il dretg da condecider pertuccont ils dretgs d’aua. Ils da Breil han approbau plinavon il preventiv communal 2025. Il quen da gudogn e sperdita preveda in gudogn da biebein 440000 francs, quei suenter amortisaziuns da 917500 francs. Il quen dallas investiziuns preveda ina summa brutta da 4,55 milliuns francs. Plinavon ha la radunonza approbau unanimamein il pei da taglia 2025. Quel duei restar sin 90% dalla taglia cantunala, medemamein il pei dalla taglia sin schischom da 1,7‰. (fmr/abc)