exposiziun da maletgs

Bilderausstellung Charles Flach

Juli und August 2023

Ella Casa Fausta Capaul vegnan exponi il fenadur ed uost 2023 maletgs dil pictur Charles Flach. Ei setracta dad ovras a scarvun, da pastèl, d’aquarel ed en ieli che muossan il vitg e la veta a Breil. Charles Flach ei naschius 1863 ella colonia Leopoldine en Brasilia. Sco giuven ei el vegnius a Berna. El ha studegiau d’inschignier a Hannover e Dresden. Suenter siu studi ha el luvrau en Valisa en ina miniera da cotgla. Cun 25 onns ha il fiug per la pictura tschaffau el ed el ei sescolaus sin viadis da studi a Firenza, Madrid e Paris.

Pervia da sia sanadad ha el encuretg ruaus e recreaziun a Breil. Daco ch’el ei gest vegnius si Breil ella Casa Fausta Capaul, sa negin pli. Charles Flach ei restaus fideivels a Breil per veta duronta. El leva schizun vegnir satraus a Breil. Per motivs confessiunals ei quei stau nunpusseivel. 1933 miera Charles Flach a Paris.

Denter 1881 ed 1928 ei Charles Flach staus silmeins 23 gadas ella Casa Fausta Capaul. Da quei dat il cudisch da hosps perdetga. Sias visetas cuzzavan entgins gis ni era plirs meins. En quei temps ha el malegiau dabia maletgs da Breil – ins entupava el el vitg malegiond avon siu cavallut. El era enconuschents egl entir vitg sco um emperneivel ed amicabel. Las casas dil vitg, il contuorn e la pezza, ils praus e las pastiras e la glieud dil vitg eran ils motivs preferi da Flach. Aschia portan ses maletgs tetels sco «Alte Weberin in Brigels», «Brigels in Winterkleide», «Alte Brigelserin in Sonntagstracht» ni «Erntezeit (Brigels)». maletg da Naul

Flach ha exponiu singuls da ses maletgs denter 1901 e 1923 ensemen cun auters artists el museum d’art a Turitg. Igl onn 1912 ha il pictur da Breil astgau mussar ver 30 ovras en in’exposiziun el museum d’art a Berna. Igl onn 1980 ha la Cuort Ligia Grischa a Trun organisau in’exposiziun da Charles Flach. Ils davos onns ch’el ei staus a Breil ha la Fausta cumprau in grond diember da sias ovras. Aschia ei la Casa Fausta Capaul daventada possessura da biars maletgs da Charles Flach. Ina selecziun da quels vegn exponida il fenadur ed igl uost 2023 ella Casa Fausta Capaul.

In der Casa Fausta Capaul findet im Juli und August 2023 eine Ausstellung der Bilder des Malers Charles Flach (*1863, † 1933) statt. Charles Flach wurde als Maler von Brigels bezeichnet. Er hat bei seinen zahlreichen Aufenthalten in der Casa Fausta Capaul viele Bilder des Dorfes und des Lebens in Brigels gemalt.