He kupu whakataki nā Te Kaiwhakatere Welcome from Te Kaiwhakatere (CEO) E koekoe te tūī E ketekete te kākā E kūkū te kererū E korohī, e korokī te manu nō uta, nō tai Koia ko Te Manu a Te Wānanga o Aotearoa Kua tau, kua tau, kua tau! Mihia te wāhi ngaro i āna tini manaakitanga mai ki a tātau, tatū atu hoki ki a Kīngi Tuheitia, te mauri o te motu. Kei te rau o tītapu, te iwi hokinga kore ki muri nei, nā roimata koutou i tuku, heoi, mā ngākau koutou hei pupuri mai hei maharatanga ake, okioki atu rā. Kei ngā kanohi ora o rātau mā, tātau ngā waihotanga ake, e puta nei, ki te whai ao, ki te ao mārama, tēnā rā tātau katoa. Tēnā rā koutou e ngā whānau, e ngā hapū, e ngā iwi, otirā, e ngāi tauira mā, kua piki mai ki runga i te waka o Te Wānanga o Aotearoa, nā runga i te hiahia ki te whakatere i te moana nui o ō tūmanako, e māro ai te rere o te waka ki tua o pae, hei oranga mōu, waihoki mō tō ao me ōna tāngata katoa kei roto. Mā Te Manu nei koe hei āwhina, e mārama ai koe ki ngā mōhiohio e tautoko ana i tōu haerenga i runga i te waka o Te Wānanga o Aotearoa; ko ngā ratonga ērā, ko ō motika ērā, ko ō haepapa ērā, aha atu, aha atu hoki. He taunakitanga tēnei i ngā āwhinatanga nui kei tō kaiako, kei tō kaitiaki rānei, me Te Puna Manaaki (tautoko tauira) - katoa, hei taunaki i a koe kia tino eke panuku ai koe ki roto i ō mahi. Nō reira, ko koe tēnā e kaha nei ki te whakatutuki i ō whāinga, ā, ko tētahi o ā mātau whāinga, ko te tautoko i a koe ki te pērā - nō reira ko tātau tērā.
3
