Kalimutaw

Kalimutaw Ni Kynah Rhea B. Fuentes

Indi ako ang takos nga balasulon— kung sa pagpamisok, ako ang handum nga tulukon, kag ang nanari-sari nga kata-kata sa akon ginapaupok; kung tanan nga atensyon akon na gin-angkon, kag akon dungog ang sumsuman sa kada purok; kung sa akon lang galibot ang kalibutan, kag ako lang ang buot sundan ka kapawa. Ina suno sa akon kaliwatan.

Amo ni dapat, indi na amo—tanan ini dapat sundon ko. Ano ang takos nga himuon, kung sa kada pagpa-uto tamyaw kag dayaw ang ingreso; bugal kag kaayawan ang manggad; kag pagatakpan sang (kuno abi) maanyag nga yuhom.

Akon lamang nabinag-binag— maiwat ang tamyaw sa gamay nga kadalag-an; apang isa ka kasal-anan, ang tinaghol sang kasimanwa indi mapunggan.

Nabuhi lang bala ako para sa kalipayan sang iban nga tawo? Nagtuhaw para mangin permanente nga topiko sang kadam-an? Ukon gin bun-ag bilang kalingawan sa entablado?

Indi na nakon pagpaligban, apang sa mga masunod nga tini-on, ang pasulabihon nga balatyagon: indi imo, indi ila, indi inyo—

AKON.

44