DE FEIRAS
Degustación de produtos eco en Salimat O Craega colaborou coa Consellería do Mar nunha das catas e degustacións dos produtos do mar que formaron parte da 24.ª edición do Salón de Alimentación do Atlántico (Salimat Abanca), celebrada no marco da Semana Verde de Galicia, en Silleda (Pontevedra) a comezos do mes de setembro. Baixo o lema “Galicia sabe amar: ecolóxicos a mares”, presentámoslles aos asistentes diferentes produtos ecolóxicos que puideron saborear unha vintena de persoas. A cociñeira Begoña Vázquez, do restaurante Regueiro da Cova (Verín, Ourense), elaborou diferentes pratos do mar que foron acompañados por unha sidra ecolóxica. Mentres os preparaba, o secretario do Craega, Javier García, explicaba as vantaxes dos produtos certificados, que importancia ten contar co selo e que requisitos teñen a agricultura e gandería para ser ecolóxicas.
A horta e o mar ecolóxicos de Galicia viaxaron a Fruit Attraction Coa lenta, pero segura, volta aos eventos presenciais, varios operadores do Craega desprazáronse a Madrid para asistir a Fruit Attraction, a “gran feira de froitas e hortalizas de referencia mundial”, que se desenvolveu entre o 5 e o 7 de outubro no Ifema Madrid, un evento organizado por esta mesma entidade xunto a Fepex. Porto-Muiños, HQ Seaweed, Capitán Alga, Algamar, Algas La Patrona, Conservas Mar de Ardora, Horta do País, Milhulloa, Eurobanán, Trasdeza Natur, Amorodo Conservas Ecolóxicas, Legufrut, Mirabel do Rosal, Francisco José Fernández Gómez, Labrecos, Souto da Trabe, Naiciña e Daiquí Alimentos Ecolóxicos luciron os seus produtos co selo de certificación eco nesta cita, agrupados no stand da Consellería do Medio Rural. Sen dúbida, Fruit Attraction é unha ferramenta de referencia global para a promoción e comercialización de froitas e hortalizas e, xa que logo, un bo escaparate para os agricultores galegos certificados en ecolóxico. Este evento ten prevista a súa próxima cita presencial do 4 ao 6 de C R A E G A 2 0
5 8
outubro de 2022 e agora reúne toda a comunidade hortofrutícola durante os 365 días do ano a través de Fruit Attraction LIVEConnect, unha plataforma dixital que potencia e complementa con novas funcionalidades o evento presencial. Máis información: https://www.ifema.es/fruit-attraction
