Eld E r STory: A Tale to Remember

By Agnes Nigiyok

Elias

Uvani, Agnes Nigiyok (1909-1994) quliarimaya taimani umiiyaramik. Ilaanni nanginaqtuq atuqlugu tajva nunamun tulangniaqsimagamik nunamun, ukiiviksaqtik qiniqllugu. Nigiyom uqausiit nalunaivialuktut, inuit nunagaluat takumayuuyarnaqtut.

Puiguqungiluta tamapta.

Quliaqtuarniaqtuami aipaniklungalu taimani. Atautchimik nutaruaqtuguk. Taimani umiiyarapta. Una quliaqtara ilumuuqtuq. Qangma aaquaqsimaakiqtuami. Umiaqpauyamun ikiyuanni Cape Parry-m qaningani. Umiaq ingniqutaittuq. Tingilrautilikkun aulavaktuq kisian. Aiparalu nuna tamana nalugikpuk. Nunagigaluariga tajva Ulukhaktuum qaninga, ilisimaluangitkiga inugukvingingilugu manna.

Ubluni qapsikalungni tajva aulayugut. Ikayuqtigiiklutik aqutpagaat umiaq. Nasitaraangapta umiam qaanganin , siku takunaqtuq. Tajvaptauq qimmiaryuit qimmivut umiami, mitquit sikutat.

Ilaanni yaravaktuami, nalanguliqlunga umiam iluani. Aniblunga qiniriaqpaktuami aglaan takusinaittuq sumik, nunamik takunaittuq. Oh Eh! Tokluk aipanilu umiaqpauyangak una. Tusaayuami ilatkaguuq ilangit inuuyut suli. Aiparma ilatka uvamnun takutqublugit.

Ublut kapsikaluit qaangiutiyut. Sinikpaktuami nalauyaqlungalu malittaraangama. Makilluayuittunga.

Ublut ilanganni aiparma takuyaqtugaani, tupaaqlunga uqalautiyaani,”Makittin. Nuna takunaqiyuaq ilitarisuitkiga aglaan. Takuyaqtugara aniblunga. Nuna qatiqsinigaa, apiblugu. Nalugiga sumuktilaanga. Nuna takumayaqput nayuqtaksaqput. Isumayuami qakuguta nuna tikitcharnirikput umiaqput ami ingniqutaittuq. Aulayugut. Nuna qaglimaakitqaikput. Sarvamluuniin ikayuraatigut. Aiparma upakkaminga qiviagaani uqallaqlunilu uvaguuq “Nuna qaglivialukaqput aglaan sivunnaptingni imnaqpak takiyukaluk” Tajvani iqsisaktuami. Aiparma atchanga, Banigabluk makiluayuittuq. Angami ququakihlaqtuq, “Tingilrautit tarium tungaanun ililugit. Imnanun apulaitugut taimaligupta”. »

Tusaangitqaraat sakukpalaaqsimablutik. Angutit pingsut. Tingilrautit aklunaangit kiblurnigait. Sinaanun tipiyuanni. Umiam iluani ittunga suli. Tajva kisian aiparma ququakirmanga, “Agnes, qipiutivut tamaita umiam qaanganukkit. Umiaqput uyaqat siqumisimaakigaat. Ungiulikpait. Imaq iluanukluni umiaqput uviqiitaakiqtuaq.

Tajvani taima tamapta qaanganuktuanni. Inukittugut. Umialik, Tokluk, qivialakamigik ipara, Jacob

Nipalayoklu taamnalu

David Bernhardt umiuyaq imamun atqagaat. Taima aasiin niqikalungnik usilliqlugu. Umiuyaq mikimiyuaq. Malikpait kinngutaat, usiangit taima. Qiyuk takiyuq iliyaat umiamin sinaanun ikkatumun timmungniarukluta. David qiyuk taamna tutqiqsiniakiga isumagiblta ami. Aiparma atchanga timugataqtinnagu qiyuk navihlaqtuq qitqagun. Alamik illiqihlarmiut navilaiturluuniin una. Angutit iqsitqungitkaluaraatigut tajva aglaan iqsisungitkaluaqtuni sapirnaqtuq. Kinitkaluarluta tajva uqautigaatigut, “Annaksaqtuksauyugut”

Taima aasiin qiyuk naviktinnagu, timungniakiutiyuanni. Aaquaksaq isumagiblutigu sivuliuyuaq. Tamapta aasiin timmuktuanni. Nuna apilluarnigaa. Nunamuktainarapta suralivut tamaitakapsak ulapitavut.

Anuraatualuvut tajva atimayavut. Malikpaum ilaanni qulautpagaa David Bernhardt, qiyuk atuqtaqput uva munarimagaa. Taimanakiaq timmuktuanni. Aipara kisimi tajva umiami suli ittuq. Qimmini annautisuklugit, uva niqiksaitkaluaqtut. Taima anuraavut tariitat sivvuqtupaluakikavut tamapta. Atipsaaqlugit aasiin ami anuraatualuvut.

Aiparma qimmiit 6nguyut. Imamun miluruutiyait. Umiamun utiruktut aglaan. Ququaqpakaluaraptigit timmulainirmata aipara Jacob annaksaqtuaq. Umiaq ami siqumisimaakiqluni tajvani. Ikpiaryuni ikutiniklu taugaaqiniklu imalik tigumiaqlugu. Ingilraan “cigarettes” takunaittut. Savinilu iluani inniqtuaq. Taamna savik quyallitauvialuktuksauniqtuaq.

Tulakvikput qiyuunirman nuatiakikatka nanialiuruklunga anuraavut ami paniqsiaksat. Toklutkut tamaita suralitik ulapitait. Qiayuk. Tamaita niqautitik, aluaq, suliqaa.

Tamaita suralgit umiam qaangani ittuat tajva takunaqtut kiviyat. Ilangit saligaittut, qibliqtut. Umiaq siqumavialuktuaq. Qulaani ittuanin tupiq tipiman sinaanun angutit isivinamijung napagaat. Uqqipalukluta tajvani. Tupiq angiaqtuq. Qiyungnik nuatchiblunga naniaqlunga paniqsikavut anuraavut. Tokluklu aipanilu nipaittuk quviasungituk. Davidlu Jacoblu aglaan nipaiyuittuk iglaqpaktuk. Niqaitugut, tea-ngutaitugut.

Tajva qaumaksimaakiqtuaq. Panikpuk, Elizabeth, malrungnik ukiuniklunilu. Kaaliraangan miluktitpagara uvamnin. Qipilraituq. Aputauyuraluaq aglaan qattaruangitugut tea-ngutaitugut.

Unnuguutiyainni. Qiyuutitka inugiaktut qanini, qamitqungilugu naniaq. Uvanga kisian tajva naniaq munarigiga. Ilatka tupqum iluani. Paniga miluktitqaaqlugu amaakigara. Taavunga sinaanun pisuuyaakiqtuami umiam siqumijvianun. Unnuklunilu, ungavanun takunaittuq.∞