Pfimi Interlaken

Gsuecht: Wunderbare Mönsch für schöni Partnerschaft

Egal, wo du grad steisch

Sit Jahre bini uf der Suechi nach dir. Mis Sehne nach Gmeinschaft mit dir isch riese gross. I mim Härz isch so viel Platz für di. Vor langer Zyt hani alles parat gmacht, damit du bi mir chasch si. Wie mängisch hani scho di Name grüeft. Luut, lislig, nächdrücklech, sanft u mängisch nur es hoffnigsvolls Flüschtere.

I gseh, dass dis Härz schwär isch u dus nid eifach hesch, bi all däm Wärbe u Rüefe vo vielne Stimme mini Stimm zghöre. Drum probieris uf däm Wäg u schriebe dir. Um mi dir chlei besser vorzstelle.

Wär bini? I bi dä, wo di scho geng het welle. Ou denn, wo niemer sich um di het grisse oder dir derna het gfragt. I ha di welle im Erfolg u Misserfolg. Wo du Guets oder ou Schlächts hesch ta. Es git eigentlich nüt, wo mi dran chönnt hindere, das ig di wett. Du muesch di nid astränge, besser wärde oder zersch ine Schönheitsfarm, damit i di nämti. I bi dä, wo di scho geng het kennt. Mir si dini Härzenswünsch, dini Hoffnige u Tröim bekannt. U si simer nid egal. So gärn wetti, dass du mit mir über all das redsch, wo di beschäftiget. Über Grosses u Chliins. Wichtigs u Unwichtigs. Eifach über alles. Was du mir avertrousch, das isch i guete Händ. I bi dä, wo dir der Wäg wott bereite, ufem jedem Schritt di wett begleite. Egal ob im Tal oder ufem Bärg. Dini Wäge hei mi scho immer interessiert. Immer wieder hani ghofft, du biegsch i mini Richtig ab. U die Hoffnig hani ou hüt u i Zuekunft. I bi dä, wo di ganz genau kennt u di trotzdäm liebt. Jedes Haar u jedi Träne vo dir isch mir wichtig. Was du dänksch isch mir wichtig. Wän du liebsch isch mir wichtig. I ha scho immer e Plan gha für üsers gmeinsame Läbe. Dis Läbe isch so wärtvoll. Dass di git, isch richtig. Du bisch mir wichtig. Dass du da bisch, het e Grund.

Was i mir vo dir wünsche? Dass du küehn u muetig bisch, e Schritt uf mi zue zmache. Öffne dini Härzenstür. Nur mal e chliine Spalt. U probiers mit mir. Es isch alles parat für di. I warte druf, dir uf Ougehöchi chönne zbegägne, dir persönlech z zeige, wie ig würklech bi. Dass du dLiebi woni für di ha, chasch erläbe u gniesse. Use usem Strudel vo der Wält i Stand vome Chönigschind.

I liebe di! Di Schöpfer

Daniela Francioli-von Allmen

www.pfimi-interlaken.ch