Pfimi Interlaken

Vom Splitter u Balke

u warum Massstäb u Schublade trenne

Vor me Zytli hani öper nach vielne Jahre wieder troffe. Mir hei chum es Wort gwächselt seit die Person zu mir: «Du bisch geng no genau die Gliichi.». Das het mir weh ta. I ha dä Mönsch vor Jahre blaget u nid guet behandlet. Scho lang het mir das fescht leid ta. Will mir üs nie me gseh hei, isches nid möglich gsi, das id Ornig ztue – um Vergäbig zbitte. U jetz das. I bi ire Schublade. U derbi hani mi fescht veränderet. Bi 20 Jahr älter worde. Einisch gmässe, für immer gliich?

Hani ou so Schublade, wo ni dMönsche um mi ume misse, beurteile u i Schublade sortiere? Was heisst mässe? Mir hei mängisch so unsichtbari Massstäb, dene dLüt um üs ume sötte gnüege. Wär das nid tuet, mit däm gö mir gar nid gross Beziehige i. Mir boue Muure uf, kanzle üs ab. U vielech verpasse mir genau hie die beschte Fründschafte! Will mir der Splitter bim andere u nid der Balke bi üs sälber gseh…

Chas si, das mir üsers Urteil o über Gott hei gfällt? Vielech ufgrund vo Mönsche, wo säge, sie sige Christe. U die läbe i üsne Ouge grad gar nid so, wie mir üs vorstelle, dass e Glöibige sött läbe. Da gits viel truurigi Gschichte vo Mönsche, wo über Jahrhunderte der Gloube a Gott hei gläbt, wies Bible nid meint u ihri Religion hei missbrucht, um Macht über anderi uszüebe. U wäge dene isch Gott jetz ire Schublade. Wie würd zBärner Oberland usgseh, we mir alli fürs nöie Jahr nur dä Vorsatz würde fasse: A üsem Balke u üsem Massstab zschaffe. U ersch we mir besser u anders gseh uf die Andere luege. Üs interessiere, wie sie würklech si. Nid nur dOberflächi aluege, sonderns wage, se nöi u richtig kennezlerne.

Am beschte vö mir bi üsem Schöpfer a. Wie isch är würklech, dä Gott vor Bible? Er isch der einzig Gott, wo het wölle Mönsch wärde. Er het alles für üs ta, damit mir nid sälber für üsi Fähler müesse zahle. Er het sis Läbe für üs gä am Chrüz, um üs mit sich zversöhne. Er het welle, dass DU läbsch une guete Plan für jedes Läbe. Er het unändlechi Liebi für DI. Er isch dä, wo üs mit offne Arme erwartet, um mit üs is nöie Jahr zstarte. Er het e «Pinzette» für üsi Balke u Splitter u Füür für üsi falsche Massstäb. U zBeschte isch, dass du Afang Jahr gar niemerem muesch säge, dass du dä Gott vor Bible, Jesus Christus, nöi u richtig am kennelerne bisch! Aber jede wo üs begägnet, wird e Veränderig wahrnä, will mir däm Vorbild folge, wo Beziehig suecht u nid zUrteil.

Daniela Francioli-von Allmen

www.pfimi-interlaken.ch