GRAWNG SAU RIANG HAWT LOX SI KA H KRAI PLAK PIANG SON PLUAT TIX TIX PA YOEK PA AWP LOX PLOI. Son sang pon yuh tix tik num phen khaing daux hak tiex Meung Vax, daux khix 6. 10 ngaix 2005 num, Pa ti rob rom Meung Vax, daux Vawng Meung Vax, num lien rob rom Meung Vax kix hoik ploi lox sika tat {{ son pluat tix tik pa yoek pa awp}}mai ot daux khix 6-26 ngaix, yuh bang kum ting daux veng Pang Kham son ngaox lao kah “tik hak tiex Meung Vax num phen mai pui piang meung” mai mhaing tix ah ang kieh “ 4 ceu” koe: hak tiex Meung Vax kix in. Ot khaix hoik tik num phen daux (4)num bawg yam, kawn pui daux hak tiex khawm mu, pa yuh kaing greem vawng, lien khawm cao kaing ku plak, hoik bre tix hawt lox plak piang khawm uik. Nie mawh pa giex lox num been krax kaux cong ku dah ku dee, hoik sau riang ti ku plak ku vang, yuh krax greem yuh mai pa giex krax kaux cong praox veng ex ku plak son tiep tie pa yoek pa awp. Daux (4)num bawg yam in, ka ang lai yaox dee cox tix sum phen daux hak tiex Meung Vax, hoik pon lox yaog yaw ka pui piang meung khawm uik. viang mawh nan kawn koe: “pui plak iak” ang nghiet lox ah si ka tat plak piang, ang kawt son klawt yuh kawn pui Meun Vax, son sang nyawm ot si u koe caw tix briex tix yuh krax glip mai pui plak praix, viex pa yoek pa awp yuh mai pui plak praix hoek laig daux hak tiex Meung Vax, kieh pa coh pa yoek pa awp, tot si dah in kix ot si phie nie si phie, khawm pui ting kawn iak, hoik sug sak yuh hak tiex nyiex ma, khawm krax sang lai ling ing tiang ex mai pa ot praok veng ex ku plak. Pa sum phen, plaok phen, pa coh pa yoek pa awp, pa tot si dah in kix mawh pa ang hak tiex Meung Vax cu, ka mawh nang pa tiep tie pui piang meung khawm uik. Pa ti ku kaux, lien ex khawm uik, kawn pui ku kaux khaw tix rien rhawm tix ka, ang pon tix kieh pui in kix laux yuh hak tiex Meung Vax, paw tawx pui in kix yaox ka sang naog vaig bih nu tix tawx pui haoh pui hun yaox krax nu krax teek. PA TI ROB ROM MEUNG VAX AH NIN 1. Pa ti khawm mu, lien ex khawm uik, pui haoh pui hun ku kaux, brie tix hawt lox ah si ka tat plak piang, yuh nang graing cao mai pa ang nghiet pa thieh lox ploi plak piang son “ pluat tix tik pa yoek pa awp”. 2. Pa giex been son krax kaux cong ku dah, brie tix hawt glak tat hu yuh “ mawx krai pa yuh krax lut koe riang, pui mox koe lut” in kix.
3. Pa yuh kaing greem vawng, lien ex khawm uik, num kaing hak tiex ku dah, pa yuh kaing ceu pui mai nyiex gau lai, khaw cox khrawm yuh krax gau ka pa tat plak piang son “pluat pa yoek pa awp” yuh tix tawng mai yuh lih plak greem. 4. Tawx lox si diex ka pui yuh laih lai, priex tix leet, priex tix coh pa yoek pa awp an kix, cao kaing an ah, pui yuh laih lai ang ah, pui cao hak tiex ex ang ah, pui plak praix ang ah, mhaing kix rien rhawm tix, naox krax yuh mee in. 5. Plak piang hoik tat, mee 2009 khix 11 (30) ngaix, can pui hoik cox rhawm tix ang lai laig mai pui pa yuh laih lai krax glip son pa yoek pa awp, chix tix ang lai teei krax lut yuh ka in. khaix khix 11-30 ngaix phan kawn koe pui briex tix leet, briex tix coh, phan pon yaox ex caw tix yuh hawt krax pa tat ‘Vax pang ci peung fax’ heue. 6. Lox pa tat bawg in, caw tix mawh pa giex num son tik pa yoek pa awp daux hak tiex Meung Vax, khawm cub caw pa giex krax kaux cong, mai cub caw pa giex krax kaux cong plak greem ku dah, pa thung sawn plak pa yoek pa awp daux lien khawm mu pa caw tix lih yuh. Plak piang Caw tix ploi Tax kuat Ciet mawh cao bung, Tax Bo Lai Kham, Tax Sam Lu, mawh pa tawx riang, Tax Li Ci Chaong, Tax Co: Ta Fux, Tax Cao Ai Tao, mawh pa hawt grawng, daux Sien, daux theux chi plak greem pa yuh see fax voe su ci mawh cao bung, cao kaing daux jhing cax chuix mawh cao tawx riang, daux lien ruah pa mawh fu loex cang tix kaux mawh cao bung, fux jhux jhix tix kaux pa tawx riang, lih yuh lox ah si ka krai pa tawx plak piang bawg in si dawng heue. Lox lai pa tawx
num pa ti rob rom meung vax num vawng ting meung vax. num bang lien rob rom meung vax 2009 num, khix 11 (1) ngaix.