Исломий инқилоб муаззам раҳбарининг улуғ ҳаж маросими қатнашчиларига мурожаати. Ооооооооооо Бисмиллаҳир раҳмонир раҳийм. Алҳамдуллилаҳи раббил оламин. Ва салоту вассалом ало саййидил анбиёи валмурсалин ва ъало олиҳит тайиббин ва саҳбиҳил мунтажабин. Ҳаж мавсумини ислом умматининг улуғ байрами деб аташ лозим. Йилнинг ана шу кунлари дунё мусулмонларига ато айлайдиган муъжизали фурсат ғаниматдир. Агар ана шу фурсатдан муносиб фойдаланилса,ислом дунёсининг жуда кўп муаммолари ҳал этилади. Ҳаж илоҳий файзнинг қайноқ булоғидир. Сиз саодатли ҳожиларнинг ҳар бирингиз сафо- самимият ва маънавият ила йўғрилган бу маносик ва амаллар орқали қалб ва жонларингизни ювиб- поклаб, илоҳий раҳмат, иззат ва қудрат манбасидан бутун умрингиз учун насиба олиш бахтига муяссар бўлдингиз. Раҳмли Аллоҳ наздида таслим ва камсуқумлик, мусулмон киши зиммасига юклатилган вазифалар масъулиятини англаш, диний ва дунёвий ишларда сайъ-ҳаракат қилиш, биродарлар билан муносабатда кечиримлилик, оғир муаммоларга юзма-юз келганда ўзига нисбатан ишонч, ҳаммавақт, ҳар ерда, ҳар қандай ҳолатда Аллоҳнинг кўмагига ишониш, кам сўзлаш, илоҳий таълим-тарбия соҳасида ўзидан мусулмончилик талаблари асосидаги янги инсонни тарбиялаш каби ҳаж барокотларини ўз ҳаётингиз, мамлакат ва халқингиз ва ниҳоят, ислом уммати учун совға сифатида олиб боришингиз мумкин. Бугун ислом уммати ҳар қачонгидан кўра ақл-тафаккур ва амални иймон, сафо ва ихлос билан уйғунлаштирадиган, гина-кудуратли душманларга қарши муқомават билан ёнма-ён ўзини руҳий ва маънавий жиҳатдан қайта қуришга шай бўлган кишиларга эҳтиёж сезади. Бу улуғ ислом жамиятининг ошкора душман томонидан юклатилган ёки иймон, басийрат ва сайъ-ҳаракатининг сустлиги сабабли йиллар давомида вужудга келган муаммолардан нажот топишининг ягона йўлидир. Шубҳасиз, бугунги давр мусулмонларнинг уйғониш ва ўзлигини англаш давридир.Бу ҳақиқатни исломий мамлакатлар юзма-юз бўлган кескинликлардан ҳам англаш мумкин. Иймон, таваккул , басийрат ва тадбирга асосланган ирода ва сайъ-ҳаракат мусулмонларни ана шундай бир вазиятда музаффар айлаб, уларни иззат-эътиборли қила олади. Мусулмонларнинг уйғониш ҳамда, иззатэътиборини ҳазм қилолмайдиган муқобил томон бутун кучи билан хавфсизлик, руҳий, ҳарбий, иқтисодий ва таблиғот воситаларини ишга солган ҳолда кураш майдонига чиққан. Уларнинг мақсади мусулмонларнинг уйғониш ҳаракатини бостириш, ҳамда уларнинг ўзлари билан ўзларини овора қилишдир. Покистон, Афғонистон, Сурия каби Ғарбий Осиё, Ироқ, Фаластин, Форс кўрфази, шунингдек, Ливия, Миср, Тунис, Судан каби Шимолий Африка мамлакатлари ва бошқа мамлакатлар вазиятига назар солиш кўпгина ҳақиқатларни ошкор айлайди. Ички низолар, диний ва мазҳабий таассублар, сиёсий беқарорлик, терроризмнинг ривожланиши, тарихда яшаб ўтган ваҳший қавмлар каби инсонларнинг кўкрагини ёриб, уларнинг юрагини ғажийдиган экстремистик гуруҳ ва жараёнларнинг вужудга келиши, болалар ва аёлларни
ўлдирадиган, эркакларни қириб ташлайдиган, номусга тажовуз қиладиган ва ҳатто айрим мавридларда бу оғир жиноятларни дин номидан ва дин байроғи остида бажарадиган қуролли гуруҳлар, барча-барчаси бегоналар ва минтақадаги уларнинг малайлари бўлган ҳукуматлар хавфсизлик хизматларининг ишидир. Бундай жинояткор гуруҳлар мамлакатларнинг ичидаги мувофиқ шароит натижасида вужудга келиб, халқларнинг ёруғ кунини зулматга айлантиришади. Шундай бир вазиятда мусулмон мамлакатларининг ўзларидаги моддий ва маънавий бўшлиқларни таъмирлаб, бедорлик ва ўзликни англашнинг маҳсули бўлган халқаро миқёсдаги хавфсизлик маишат ва илмий тараққиёт ҳамда иқтидорни қўлга киритишлари амри маҳолдир.Бундай таҳликали вазият исломий уйғонишдан кўзланган мақсадларни барбод айлаб, ислом дунёсида вужудга келган руҳий тайёргарликни йўққа чиқариши мумкин. Натижада мусулмон халқлари узоқ йиллар турғунлик, яккаланиш ва инқироз ҳолатида қолиб, Фаластин озодлиги , мусулмон халқларини Америка ва сионизм чангалидан озод қилиш каби муҳим ва асосий масалалардан чалғишлари мумкин. Бу муаммолардан қутилиш йўл-йўриғини ҳажнинг энг ёрқин таълимотини ўзида мужассамлаштирган икки жумлада хулосалаш мумкин: Биринчи: тавҳид байроғи остида мусулмонларнинг бирдамлик ва биродарликлари. Иккинчиси: душманни англаш, ҳамда унинг режаларига қарши курашиш. Биродарлик ва ҳамдиллик руҳиясини мустаҳкамлаш ҳажнинг улуғ таълимотидир.Ҳаж мавсумида ҳатто бошқаларга қаттиқ гапириш ва жанжаллашиш таъқиқланган. Барчанинг бир хил кийиниши, бир хил амални бажариши, бир хил сайъҳаракат қилиши ва ўзаро меҳр-муҳаббатли муносабат бу тавҳид анжуманига ихлос ва ишонч билан йиғилган кишиларнинг баробарлиги ва биродарлиги рамзидир. Бу нарса Каъба ва тавҳидга эътиқодли бўлган мусулмонларнинг айрим гуруҳини ислом доирасидан ташқарида деб билгувчи ҳар қандай фикр-ақида ва даъватга қарши исломнинг қатъий жавобидир. Бугунги кунда ғаддор сионистлар ва уларнинг ғарблик ҳомийлари қўлидаги ўйинчоққа айланиб, оғир жиноятларга қўл ураётган ва бегуноҳ мусулмонларнинг қонини тўкаётган жинояткор гуруҳлар,ҳамда шиа ва суннийлар ўртасидаги ихтилоф оловига ёғ пуркайдиган айрим руҳоний либосидаги кимсалар билиб қўйишсин, ҳаж маросимининг нафаси уларнинг барча муддаоларини ботил айлайди. Кўпгина ислом уламолари ва ислом умматининг дилсўз кишилари каби яна бир марта эълон қиламан: мусулмонлар ўртасида ихтилоф оловини ёқишга сабаб бўладиган, мусулмонларнинг қай бир гуруҳи қадриятларига ҳақорат бўлиб туюладиган, ёки исломий мазҳаблардан бирини инкор этувчи ҳар қандай сўз ва амал куфр ва ширк лашкарига хизмат қилиш, исломга хиёнат ва шаръан ҳаромдир.Иккинчи рукн эса душман ва унинг кураш услубини илғаш ҳисобланади. Аввало, гина-кудурратли душманнинг мавжудлигидан ғафлатда қолмаслик керак. Ҳаж мавсумида бир неча маротаба такрорланадиган шайтонга тош отиш маросими доимий душманнинг мавжудлигининг зеҳний нишонасидир. Иккинчидан бугунги кунда асосий душман ҳисобланган дунёвий истибдод жабҳаси ва жиноятчи сионизм тармоғини англашда хатога йўл қўймаслик керак. Учинчидан, мусулмонлар ўртасига ихтилоф солиш, сиёсий ва ахлоқий фисқ-фасодни ривожлантириш, тамаъ ва таҳдид йўли билан фаол кишиларни ўзига оғдириш, халқларга иқтисодий босим ўтказиш, исломий ақидаларда шубҳа-гумонларни вужудга келтиришдан иборат
бўлган бу пасткаш душманнинг кураш услубларини тўғри англаб, билиб-билмай душманнинг малайига айланган кимсаларни аниқлаб олишимиз керак. Америка бошлиқ мустабид давлатлар кенг қамровли ривожланган коммуникацион воситалар орқали ўзларининг ҳақиқий чеҳраларини хаспўшлайдилар.Улар инсон ҳуқуқлари ва демократия тарафдори ниқоби остида халқларнинг оммавий афкори билан ўйнашадилар. Улар мусулмон халқлари кун сайин аввалгидан кў кўпроқ уларнинг фитналари оловини ўзларининг жисму жонларида ҳис этаётган бир пайтда инсон ҳуқуқлари ҳақида лоф уришади. Қатор ўнйилликлар давомида ҳар куни сионистик режим ва унинг ҳомийларининг жинояткорона жабру зулмини бошидан кечираётган Фаластиннинг мазлум миллати, ёхуд жаҳон мустабидлари ва уларнинг минтақадаги малайлари сиёсатларининг маҳсули бўлган терроризм комларида ҳаёт шаҳдини заҳар-заққумга айлантирган Афғонистон, Покистон, сионизмга қарши муқомават ҳаракатини қўллаб-қувватлагани учун халқаро мустабидлар ҳамда уларнинг минтақадаги малайларининг ғазабига учраб, ички урушлар балосига гирифтор бўлган Сурия, жабр-жафо чеккан мусулмонларга зулм ўтказилиб, уларнинг душманлари ҳимоят қилинадиган Баҳрайн ва Бирма, ёҳуд Америка ва унинг шериклари томонидан уюштирилаётган ҳарбий ҳужум ва иқтисодий чекловлар зулмини чекиб, хавфсизликларига доимий равишда таҳдид қилинадиган мамлакатларга бир назар ташлашнинг ўзи мустабид тузум бошлиқларининг ҳақиқий чеҳрасини барчага намоён этиши мумкин. Ислом дунёсининг барча минтақалардаги сиёсий, маданий ва диний жабҳадаги таниқли кишилар ўзларини ана шу ҳақиқатларни ошкор қилишга масъул деб билишлари керак. Бу ҳаммамизнинг аҳлоқий ва диний вазифамиздир. Бугунги кунда чуқур ички ихтилофларга дучор бўлган Шимолий Африка мамлакатлари ҳаммадан кўра кўпроқ душман ва унинг кураш услубларини англашга эътибор қаратишлари лозим. Миллий жараёнлар ўртасидаги ихтилофлар, ҳамда ички урушлар келиб чиқишига бепарволик бу мамлакатларга таҳдид қилаётган энг катта хавф-хатар ҳисобланади.Бу ҳолатдан вужудга келадиган зарарларни қоплаш эса ислом уммати учун жуда-жуда қимматга тушиши мумкин. Ишончимиз комилки, бу минтақадаги исломий бедорликни тажассум айлаб, оёққа қалққан халқлар Аллоҳнинг изни билан замона милларининг орқага қараб ҳаракат қилишига, фисқ-фасодга берилган, бировларга қарам бўлган диктаторларнинг даври такрорланишига йўлбу қўйишмайди, албатта. Аммо, мустабид қудратларнинг фитналари ва вайронкорликни кўзловчи дахолотларидан ғафлатда қолиш уларнинг ишини анчайин оғирлаштириб, иззат-эътибор , хавфсизлик ва ижтимоий юксалишга эришишни анча йиллар орқага тортади. Биз халқларнинг азм-иродаси ҳамда ҳаким Аллоҳ таъоло томонидан уларнинг айрим гуруҳлари сайъ-ҳаракат, иймон ва басийратларига жойлаштирилган қудратга қалбимизнинг қаъридан ишонамиз. Биз бу нарсани 30 йилдан кўпроқ давр мобайнида Эрон Ислом Жумҳуриятида ўз кўзимиз билан мушоҳада қилиб, вужудларимиз билан тажриба қилганмиз. Биз барча мусулмон халқларни чарчоқ нималигини билмайдиган, шон-шуҳратли бу мамлакатдаги биродарларининг тажрибасидан ўрганишга даъват этамиз. Аллоҳ таъолодан мусулмонлар ҳолатини ислоҳ қилиши ва улардан душман найрангларини даф айлашини сўрайман. Сиз Байтуллоҳнинг ҳожиларига мақбул ҳаж, жисмоний ва руҳий соғломлик ҳамда улкан маънавий насиба тилаб қоламан. Ва саллому алайкум ва раҳматуллоҳ .
Саййид Али Хоманаий.