Diaranson 28 di September 2011 | Margrietstraat 3 | Tel: 583-1400 | Fax: 583-1444 | noticia@awemainta.com
GRATIS
LANDAMENTO SINCRONIZA A PRESENTA PA WEGANAN PANAMERICANO 2011
BONTEMANTELSTRAAT 6
DIASABRA mainta den presencia di un publico grandisimo consistiendo di mayornan, famia y conocirnan, como tambe miembronan di e directiva di Comite Olimpico Arubano, di e Direccion tecnico di COA, di e federacion AZB y di prensa deportivo, e seleccion di landamento sincroniza a demostra nan rutina tecnico y liber, prome cu nan sali p’e Weganan Panamericano 2011. Secretaria General di COA, Nicole Hoevertsz, a habri e mainta splicando esnan presente di e preparacion intenso cu e seleccion di landamento sincroniza a hiba ya pa mas cu dos aña. Cu aplauso grandi, e atletanan cu ta forma parti di e seleccion a ser introduci n’e publico presente. E nuebe atletanan cu ta forma parti di e seleccion nacional di synchro p’e Weganan Panamericano ta: Anouk Eman, Nikita Pablo, Amanda Maduro, Nathania Taylor, Jitva Sarman, Nathifa Sarman, Nakaylee Didder, Alexandra Mendoza y Neftaly Albertsz. Entrenadornan ta: Alba Torres y Shannon Benson. Tambe a wordo selecta pa fungi como Huez durante e competencianan na Guadalajara Stella Leslie y Esther Croes. E seleccion di landamento sincroniza a presenta dos rutina, di cual ambos lo ser presenta durante di e Weganan Panamericano na Guadalajara, Mexico. Aruba a logra clasifica den e deporte di synchro pa ambos evento cu ta rib’e programa, esta e dueto y e ekipo. E delegacion di synchro ta biahando pa Mexico ya caba tres siman prome cu nan competencia pa asina pasa den un periodo di aclimatisacion, dunando nan e oportunidad pa custumbra n’e hecho cu Guadalajara ta situa na 1600 meter riba nivel di laman. Nos ta desea e seleccion di synchro tur clase di exito durante e Weganan Panamericano.