Boletín Especial de Gastronomía Febreiro—2016
BIBLIOTECA
Un ano máis, a biblioteca do IES Fraga do Eume quere sumarse á celebración do concurso de cociña "Xosé Rodríguez-Moldes Rey" cunha selección de lecturas e materiais audiovisuais arredor da gastronomía. Querémosvos ofrecer un menú degustación de libros e películas que podedes atopar na biblioteca e que adquirimos desde o concurso do pasado ano ata agora mesmo. Hai como sempre unha gran diversidade de xéneros e formatos
Velaquí a nosa selección:
NOVIDADES Empezaremos por dous libros da máis recente colleita: dous interesantes guías para navegar polo complexo mundo do viño e as adegas. A Guía, con preto de 400 páxinas, recolle a totalidade das adegas amparadas con D.O. de Galicia e contén máis de 500 fichas de cata. Inclúe tamén uns poucos viños de calidade contrastada elaborados á marxe das Denominacións de Orixe e outros datos interesantes de onde comer e onde durmir nas distintas zonas vitivinícolas galegas.
Máis de 11.200 marcas foron catadas por un cualificado equipo de cata ao longo deste ano, para que o lector, sexa cibernauta ou non, poida penetrarse cun mínimo de orientación entre o abafador e crecente número de viños que hoxe en día se elaboran por todos os recunchos da nosa xeografía. Ao longo das súas novas 1.298 páxinas penetramos no mundo da calidade do viño español en todas as zonas produtoras do noso país.