: Recientemente, Minister di Enseñansa y Deporte Endy Croes a reuni cu sindicato TOPA, esta presidente Sr. Alonso Tromp, vice-presidente Sr. Axel Figaroa y Sr. Roderick Lee. Ademas di esaki, Sra. Morela Dirkz y Sra. Miguelina Flores di Dienst Publieke Scholen (DPS) tambe tabata presente den e ocasion aki. Durante e reunion, Minister Endy Croes a scucha diferente punto en conexion cu Colegio EPI. Varios docente y/of empleado cu falta MB of cu tin varios aña trahando riba un basis contract. Den e cuadro
aki, TOPA representando e docente- y empleadonan di Colegio EPI, a trece nan puntonan dilanti. Minister Endy Croes y DPS a tuma nota di e puntonan aki y lo bay trata nan pa brinda atencion na e inkietud di e docente y- empleadonan di Colegio EPI.
Fuera di esaki, Ministerio di Enseñansa a splica TOPA tocante e cambionan grandi cu Colegio EPI ta traspasando aden desde aña 2022, en conexion cu innovacion di ocho (8) estudio (opleiding).
Durante e reunion a splica cu si no pasa den e
CAMbIA
proceso di renobacion di e estudionan aki, den futuro e diploma di Colegio EPI no lo wordo reconoci.
E mandatario di Enseñansa a enfatisa cu e procesonan
aki ta tuma basta tempo. Finalmente, Minister Endy Croes a indica cu lo atende e peticionnan di e empleadonan y dentro di algun siman lo bolbe reuni pa mira e avancenan.
Finalmente, Minister Endy Croes gradici e sindicato TOPA pa e trabou cu nan ta haciendo y e docente- y empleadonan di Colegio EPI pa nan pasenshi.
Parlamentario Hendrik Tevreden (MEP):
No por trece cambio pa taxiNaN siN dialogo
Aruba 5 di augustus 2024:
Dialuna mainta, por a tuma nota cu taxistanan a protesta. Maske
Parlamento ta den reces, toch parlamentarionan di fraccion di MEP a atende cu e caso aki, asina Lider di e fraccion, Hendrik Tevreden a duna di conoce. E parlamentario a indica: "Nos a bin comprende despues di a scucha y busca mas informacion cu Minister Ursell Arends kier haci cambio den ley y anticipando riba e cambio den ley aki, adelanta e
kier pone den su maneho e cambio pa por ehecut'e. Esaki por? Si. E ta e miho manera? No".
Dicon no? Pasobra mester tin dialogo prome cu tur cos. Mester tin transparencia y comprendemento. Si no tin esakinan, tur cambio lo ta dificil, Tevreden a agrega. Kisas minister Arends a sinta cu centralnan di taxi, pero tur miembro ta representa pa e centralnan?
Ta un pregunta valido pa contesta si bo kier y ta buscando pa bo cambionan
wordo carga pa mayoria.
Parlamentario Hendrik Tevreden a sigui bisa cu Parlamento mes no a duna nan opinion ainda cu si nan ta di acuerdo cu e cambionan. Pesey fraccion di MEP a entrega un peticion na sr. Kamperveen como presidente di Comision di Transporte pa yama dos reunion. Un cu Taxistanan mes (nan representantenan) y un reunion cu minister Ursell Arends. "Esaki mas pronto cu ta posibel pa nos scucha
ambos banda di medaya, preparando ariba e ley cu tin di wordo atendi pero
cu no ta na Parlamento ainda", a finalisa bisando.
miNister eNdY croes Y presideNte di abba sr. KeViN James a elabora riba diFereNte proYecto deportiVo
: Recientemente, Minister di Enseñansa y Deporte Endy Croes a reuni cu Sr. Kevin James, kende ta presidente di Amateur Baseball Bond Aruba (ABBA), cual ta maneha e federacion di baseball na Aruba. Durante e encuentro aki, Sr. James a duna informacion di avancenan di e campeonato local cu lo tuma luga na Aruba e aña aki den e luna di november y a pidi Gobierno di Aruba algun ayudo adicional pa esaki. Tambe Sr. James a presenta su vision pa futuro, en conexion cu un proyecto cu un compania internacional y a pidi sosten di Gobierno di Aruba pa e proyecto aki. E mandatario di Deporte a indica cu sigur lo bay amplia riba esaki e lunanan nos
dilanti.
Ademas, Sr. James a indica cu e tin deseo di inicia cu Proline League pa e deporte di softball, mescos cu Proline Baseball League cu ta tuma luga den e luna di november na Aruba. Ministerio di Deporte tin deseo di yega tambe na mesun tipo di proline pa volleyball y basketball. Tin un patronisado internacional cu durante dos (2) aña caba a patronisa uniform pa Proline Baseball League y Sr. James ta desea di engrandece esaki pa mas deporte aki na Aruba. Pa finalisa, Minister Endy Croes a indica cu lo keda den contacto estrecho cu Sr. James y Gobierno di Aruba sigur lo sostene y guia e gran proyecto deportivonan aki.
Gabinete di aruba ta entreGa
“Handboek voor arubaanse studenten in nederland” na tur studiante cu a caba di yeGa Hulanda
Den Haag – Na cuminsamento di aña Gabinete di Aruba a tene un encuesta bou di tur studiante di Aruba na Hulanda. For di e encuesta a sali na cla cu nos studiantenan ta sinti cu nan falta hopi informacion for di prome cu nan bin Hulanda caba, pero tambe riba con pa studia, biba y traha na Hulanda. Nan a indica di tin falta di informacion tocante di seguro, prestamo di DUO, OV-kaart, fiansa di studio, inscripcion na Gemeente, tips di con pa gasta menos na Hulanda, tips con pa haya ayudo di nan scol y nan decanonan, con pa busca cas etc. Banda di esaki nan tabata kier sa over di e relacion di Aruba den Reino y tocante di Statuut di Reino Hulandes encaso cu otro studiante puntra nan. Otro pregunta ta kico Gabinete y e mentornan ta
hasi y con nan por contact e studiante.
A base di e resultado di e encuesta y loke e studiantenan a indica cu nan lo kier haya na informacion, Gabinete a cuminsa compila un “handbook” cu tur informacion relevante pa tur studiante cu ta bin of kier bin studia na Hulanda. E la tuma cuater luna pa finalisa danki na e gran colaboracion entre Gilner Dirksen di bureau di Minister di Educashon y Deporte y Indhira Burke di Gabinete di Aruba. E “handbook” ta consisti di 5 capitulo. E prome ta splica tocante di Gabinete, relacion den Reino y Statuut di Reino Hulandes, di dos ta elabora riba biba, studia y traha na Aruba, di tres capitulo ta encera biba, studia y traha na Hulanda, seguro
na Hulanda y un seccion
Q&A. Dia 5 y 6 di Augustus e “handbook” aki a wordo parti por medio di un QR code na tur studiante cu a yega Hulanda. Directora di Gabinete di Aruba Joselin Croes LL.M ta invita tur mayor, tur decanonan, studiante of tur persona cu ta guia studiantenan pa tuma nota di e contenido di e handbook aki pa ta na altura di tur e cambionan cu Hulanda a introduci pa nos studiantenan. Boso por click riba e QR code cual boso por haya riba e website di Gabinete riba www.kabinetaruba.nl. Cu esaki Gabinete di Aruba ta cumpli cu su tarea di informa tur studiante debidamente relaciona cu tur loke nan por spera ora nan bin studia na Hulanda.
Nota pa redaccion: E potretnan ta cortesia di Arubahuis
Cuerpo Policial Ta Informa
DURANTE CONTROL DI TRAFICO 7
CHAUFFEUR A PERDE NAN RIJBEWIJS
Diasabra den oranan di madruga, entre 03:00 pa 06:00, polisnan di districto di Santa Cruz hunto cu Flex Team y Unidad Motorisa a tene un control pa cu maneha bao
influencia di alcohol.
Durante e control mas cu 240 auto a ser para pa asina haci e control necesario.
A reparti 20 multa pa maneha bao di influencia
di alcohol, di cual 7 chauffeur a perde nan rijbewijs, door di surpasa e limite.
E controlnan lo sigui enconexion cu e cantidad
di chauffeurnan cu ta maneha vehiculo di motor bao di influencia di alcohol.
Cuerpo Policial ta keda boga pa seguridad den
trafico pa asina preveni casonan lamentabel. Abo como chauffeur sea mas consciente y si bo ta bebe NO stuur. Uza un amigo responsabel.
Gabinete di aruba a ricibi di dos Grupo di studiantenan cu a yeGa Hulanda
Den Haag – Un total di 60 studiante a yega awe 6 di Augustus cu vuelo 765 di KLM. Nan ta forma e di dos grupo di studiante Arubano cu a bin Hulanda e aña aki pa sigi un estudio avansa na nivel di HBO of Universidad na Hulanda. E grupo di studiante aki lo bai studia na e ciudadnan di Breda, Eindhoven, Delft, Den Haag, Leiden, Groningen y Leeuwarden.
Na Schiphol e studiantenan mescos cu tabata e caso di ayera a wordo saluda pa Minister Plenipotenciario mr. Ady Thijsen y director di Gabinete di Aruba Joselin Croes LL.M. Un biaha mas tabata tin un delegacion consistiendo di functionarionan di Departamento di Enseñansa, Bienestar General y Cultura di Gabinete di Aruba, studiementor y miembronan di e POC (Plaatselijke Opvangcommissie) presente den sala di yegada di Schiphol.
Despues cu e grupo di
studiante a sali cu nan maleta, na un forma bon coordina y organisa a haya instruccion di personal di Gabinete di Aruba, mentor y miembronan di e POC con pa cana y unda nan mester a para den grupo pa warda nan turno pa bai na e bus cu lo hiba nan na nan ciudad.
Mescos cu ayera Robby Schouten di e programa Leu foi Cas tabata tey atrobe pa haci entrevistanan entre otro cu e studiantenan.
Mayan e grupo di studiantenan aki lo cuminsa cu e programa di “opvang” obligatorio, cual lo dura entre tres dia y un siman. Durante e dianan
aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia. E prome aña e studiante ta ricibi guia di e studiementor, pero pa e resto di su estudio e ta cai bou di Gabinete di Aruba.
Riba Facebook y Instagram di Gabinete di Aruba y Facebook di Onderwijszaken lo tin reportahe y potretnan di e yegada di e grupo di studiantenan.
Nota pa redaccion: E potretnan ta cortesia di Arubahuis
Prome Minister Evelyn Wever-Croes: MIEMBRO NOBO PA ARUBA DEN E COLEGIO
DI SUPERVISION FINANCIERO PA ARUBA (CAFT) A REUNI CU PROME MINISTER
Diamars mainta, 6 di augustus, Prome Minister Evelyn Wever-Croes hunto cu colega Minister di Finansa, Xiomara Maduro a reuni cu señor Marion Agunbero ken ta e miembro nobo pa Aruba den e Colegio di Supervision Financiero pa Aruba (CAft). Presente pa e reunion tambe tawata e miembro saliente, señora Hellen van der Wal.
Desde 1 di augustus 2024,
señor Marion Agunbero ta e miembro nobo pa Aruba den e Colegio di Supervision Financiero pa Aruba (CAft). Conseho di Minister di Reino a aproba riba dia 21 di juni 2024 e proposicion di Aruba pa nombra señor Agunbero como e miembro nobo. Señor Agunbero ta un persona cu hopi experiencia tanto na Departamento di Finansas y na Banco Central y el a traha den Raad van Advies y cu fondo di pensioen entre otro. E ta un persona cu hopi conocimento y cu awor ta dedica su tempo como e miembro nobo pa Aruba den CAft.
Prome Minister ta remarca cu e miembro saliente, señora van der Wal a sirbi pais Aruba durante dos periodo pa un total di 6 aña durante temporadanan hopi dificil. Tempo señora van der Wal a inicia cu su trabou, ya Gobierno a
cuminsa pone orden den e situacion financiero di Aruba creando surplus, pero net e tempo ey a bin e pandemia di Covid19, y cu esey a bin masha hopi polemica cu CAft. Prome Minister ta hopi agradecido na señora van der Wal pa e servicio cu el a duna na pais Aruba den CAft. A traves di su persona por a trece e perspectiva di Aruba dilanti den tur e discusionnan cu CAft. No ta tur ora e tawata di
acuerdo cu CAft y semper a expresa esaki, pero si semper el a mantene un relacion transparente cu Gobierno di Aruba sin cu Gobierno a interveni den su trabou di supervision.
Den nomber di Gobierno di Aruba, Prome Minister ta gradici señora Hellen van der Wal pa su trabou durante e 6 añanan, y ta desea señor Marion Agunbero hopi exito den e periodo su dilanti.
Prome Minister Evelyn Wever-Croes:
PROME MINISTER A ATENDE EXPOSICION ‘KINDERKUNST IN 3D: FROM DESIGN TO CREATION’
Arte 3D ta un dimension vibrante unda e creatividad no tin limite y ta aporta na educacion artistico di e alumno
Dialuna atardi, 5 di augustus, Prome Minister Evelyn Wever-Croes a atende un exposicion di arte hopi special. A trata di e obranan espectacular den e dimension di 3D di muchanan entre 9 y 13 aña.
Durante e ultimo tres
lunanan Pieter Verduijn di Makerpedia a duna un curso di Arte den 3D na muchanan entre 9 y 13 aña: ‘Kinderkunst in 3D’. E exposicion final ta e celebracion di e biahe di e alumnonan y un showcase di nan trabou increibel. E resultado ta un exposicion
impresionante di creacion imprimi den 3D. Prome Minister tawatin e placer di conecta cu e talentoso artistanan hoben tras di e proyectonan, y a keda sumamente impresiona cu nan talento y creatividad.
Educacion artistico desde hoben, ta forma mentenan flexibel, ta fomenta aspectonan fundamental den desaroyo di un mucha y ta conduci na su crecemento personal. E ta stimula pensamentonan original y ta laga e mucha expresa su emocionnan a traves di arte.
Arte 3D ta un dimension vibrante unda e creatividad no tin limite y asina ta aporta na educacion artistico di e mucha. E ta consisti den siña e alumnonan crea, compronde y aprecia obranan di arte tridimensional. E ta bay mas leu di un simpel dibuho of pintura tradicional y ta inclui sculptura, ceramica, e modelo digital y animacion entre otro. E ta haci bo mira e arte como algo experimental y interactivo. E Arte 3D ta birando un parti esencial di e enseñanza den henter mundo.
Prome Minister:
“Un proyecto bunita cu ta inculca den nos muchanan desde hoben pa brasa arte y tecnologia a traves di innovacion. Arte ta lanta nan creatividad y autoestima y ta laga nan sinti cu kico cu nan pone nan mente na dj’e nan por construi. Mi ta felicita Pieter y Tess cu un proyecto asina bunita. Tambe mi ta gradici Prins
Bernhard Cultuurfonds, UNOCA Aruba y Setar pa nan aporte na e proyecto. Y sigur, mi palabranan di gradicimento di curason na e mayornan pa inverti e tempo y laga nan yiunan participa. Un pabien grandi na nos innovadornan hoben cu nos tin na Aruba pa e bunita obranan cu nan a expone”.
BUREAU TRAIMERDIA ARUBA A ORGANISA
EVENTO DI TEAMBUILDING 3 DIA DI ACTIVIDAD
PA SU EMPLEADONAN
Bureau Traimerdia a tene un evento special di teambuilding di tres dia di cual tawata riba 22, 23 y 24 di July 2024 pa tur su empleadonan como clausura di fin di aña escolar 2024.
Durante e tres dianan aki di actividadnan a duna oportunidad pa coleganan conecta y fortifica relacionnan mientras a disfruta di un ambiente carga cu alegria, canto, baile y reflexion.
Riba e prome dia, 22 di Juli 2024: Charla Motivacional for di Sra. Paloma Tromp di Fundacion Plan di Bida y a finalisa e dia cu
”Hersengymnastiek” bao guia di sra. Shermine Maduro y sr. Delo Maduro na Edificio di JFK.
E dia aki a enfoca riba stimulacion mental cu varios actividad interactivo y educativo, “Kibra bo Coco”! Wak bo no bira loco.
Riba di dos dia: Karoake “Let’s Sing” na Bucuti Yacht Club Aruba
E dia aki tawata yena cu entretenimiento y empleadonan por a canta nan canticanan faborito den forma individual of den grupo combina cu show.
E ultimo dia a cera cu un
sesion di: Bowling pa tur empleadonan na Eagle Bowling Palace.
Bureau Traimerdia ta kere cu e actividadnan aki no solamente a contribui na fortificacion y lasonan fuerte pa tur empleadonan, pero tambe a crea un ambiente di trabao positivo pa cuminsa e aña escolar nobo cu energia renoba y cu un spirito di team/ ekipo.
Por ultimo Bureau Traimerdia kier a gradici na tur nos empleadonan pa cu nan participacion masal y na nos stakeholders pa
nan coperacion y sosten pa por a haci e tres dianan aki uno sumamente exitoso; Domino Pizza, Subway, KFC, M.R.C Sweet and
sra. Shermine Maduro,
Salty, sra. Suhaël Lake, Martijn Trading, Pearl Lottery, De Wit Van Dorp, sr. Delo Maduro y
MINISTER ENDY CROES TA DESEA E DI DOS GRUPO DI 61 STUDIANTENAN CU A SALI PA HULANDA HOPI EXITO
ORANJESTAD: E di dos grupo cu ta consisti di 61 studiante a sali dialuna anochi rumbo pa Hulanda pa continua cu nan estudio riba nivel di enseñansa avansa, HBO y universidad. Ta trata aki di e studiantenan cu ta bay biba na Breda, Delft, Den Haag, Eindhoven, Gouda, Groningen, Leeuwarden y Leiden. Famia y amigonan tabata presente na Aeropuerto Internacional Reina Beatrix pa desea nan ser keri un bon biahe y exito den nan siguiente etapa di bida. E mandatario di Enseñansa y Deporte tambe tabata presente na e ocasion aki pa despedi y yama ayo na e studiantenan cu ta saliendo rumbo pa Hulanda pa sigui estudio avansa.
“Como gobierno, nos ta duna e sosten moral, motiva y inspira nos studiantenan y ta pa e rason ey nos ta na aeropuerto,” Minister Endy Croes a indica.
“Nos sa cu e mayonan ta keda tristo atras, paso awe ta e dia cu nan ta habri nan hala y laga nan yiu sigui riba nan mes, pero sigur pa un bon porvenir. Alabes, ta desea e studiantenan tur clase di exito y ohala ora nan termina nan estudio nan por bin Aruba bek y yuda nos sigui desaroya y engrandece e pida baranca Aruba.
Haci boso best. Nos ta keda en espera di boso.
Hopi exito!,” Minister Endy Croes a expresa. Sra. Gina de Kort, directora suplente di Departamento
MINISTER ENDY CROES TA DESEA E DI DOS GRUPO DI 61
STUDIANTENAN CU A SALI PA HULANDA HOPI EXITO
CONTINUACION PAG. 10
di Enseñansa Aruba (DEA) a expresa cu awe nos ta barca e di dos grupo cu ta bayendo Hulanda den e vuelo organisa pa Departamento di Enseñansa. “Despues di e trabounan duro di nos coleganan di Studiefaciliteiten, awe nos ta desea e studiantenan hopi exito y perserverancia cu nan estudio na Hulanda. Nos ta spera cu tur studiante sea si ta bay cu Arubalening of riba nan mes pa studia, duna tur di nan banda y sa di busca otro ora cu tin mester. Alabes, ta recorda e studiantenan cu na Hulanda Cas di Aruba ta na boso servicio y semper nan por conta cu nos. Tuma contacto y busca bo informacion si bo tin mester. Exito y forsa na e famia cu a keda atras un poco tristo, pero corda cu nan ta bay cu un meta Hulanda. Nos mester stimula nan y yuda nan pa cumpli nan meta, Sra. de Kort a subraya.
Sra. Marylin Feliciana, kende ta Marketing & Communications Mangers di AAA, a expresa cu den nomber di AAA cu nan ta orguyoso pa wak un otro grupo di studiante biahando pa Hulanda pa sigui nan soño y ta desea nan hopi exito. “Sky is the limit”. Haci boso best y nos ta warda boso bek na cas. Na final di e ceremonia, AAA y Ministerio di Enseñansa a brinda e studiantenan un obsekio. Minister Endy Croes ta gradici Sra. Sharine Croes - Dubero di Seccion Studiefaciliteiten, Sra. Marilyn Feliciana y team di marketing di AAA pa nan excelente trabou. Pa conclui, Minister Endy Croes ta desea e studiantenan tur clase di exito cu nan estudio den exterior. Pa boso regresa Aruba bek dentro di algun aña cu boso diploma, conocemento y experencia.
Augustus a cuminsa bon pa e industria di crucero
Awe ta un bon dia pa e industria di crucero
Desde e bancarota di linea di crucero, Pulmantur, na aña 2022, e industria di crucero na Aruba a wordo impacta pa esaki, ya cu e linea di crucero aki tabata trece 1 barco pa siman na Aruba. Parti di e strategia di Aruba Ports Authority N.V. (APA) ta pa sigui crece e industria di un forma sostenibel enfocando riba crecemento den temporada abou. APA conhuntamente cu partnernan den e industria ta pone hopi esfuerso den logra esaki. Esaki sigur no ta facil ya cu tur e lineanan di crucero ta opta pa haci itinerarionan den otro regionnan hopi lucrativo manera Alaska, region Baltico y Mediterraneo. Durante e temporada aki e clima ta mas favorabel pa turismo crucero den e regionan aki.
APA ta satisfecho, cu e trabou dedica na logra mehora e temporada abou ta dunando bon resultado, ya cu por observa un tendencia gradual di crecemento den e temporada abou den e ultimo 2 añanan. Esaki ta un tendencia positivo y segun e flotanan di e lineanan di crucero ta crece, esaki lo trece mas oportunidad pa mas itinerario durante e temporada abou pa e region di Caribe y tambe pa Aruba.
Awe, diamars 6 di Augustus, Aruba ta conoce un bes mas un bon dia pa e industria, cu bishita di 3 barco, esta Carnival Horizon, Adventure of the Seas y Carnival Mardi Gras cu lo trece alrededor di 12 mil pasahero. Esaki sigur ta bonbini pa APA, pa stakeholdernan di e industria y pa Aruba su economia en general.
2024 ta proyecta di ta un aña record pa e industria di crucero aki na Aruba cu lo sobrepasa 2019 den cantidad di bishitante di turismo crucero cu un crecemento di aproximadamente 4.5%, di cual mas di 20% lo ta durante e temporada abou di Mei pa September.
Ariba www.arubaports.
com den e seccion di schedule di barconan di crucero por haya mas detayes di e barconan crucero cu lo ta den waf awe.
Tocante Aruba Ports Authority:
A funda Aruba Ports Authority N.V. na aña 1981. E compania ta pertenece 100% di Gobierno di Aruba y tin 80 trahado den servicio directo. Hunto ta maneha e dos wafnan di Aruba, pues tanto esun di crucero na Oranjestad como tambe esun di carga na Barcadera, unda nan tin un acuerdo di operacion cu ASTEC. Pa aña ta yega mas o menos 330 crucero na Oranjestad. E compania ta stabiel y ta bou maneho di Marc Figaroa.
Weganan Nacional 60+.
Jani Brokke Memorial 2024
"Fundacion Movemiento ta Bida" kier participa na tur persona cu ta 60+ cu E Weganan Nacional 60 + ta tuma lugar pa di 15 biaha (2010-2024). E aña aki e weganan ta cuminsa diadomingo 11 di Augustus proximo y lo termina diavierna 13 di September. Clausura lo tuma lugar na Club Primavera. E Weganan aki ta carga e
nomber di Jani Brokke Memorial desde 2011 dunando reconocimento na un gran deportista Arubiano Jani Brokke qepd. Na 2010 Jani Brokke qepd a participa den e weganan aki den e deporte di Tennis unda e tabata partner cu Cadochi Kock prome cu e la fayece. Mirando e interes cu a crece den e 15 añanan "Fundacion Movemiento ta Bida" tin
programa un total di 9 deporte pa 2024. E 9 deportenan ta lo siguiente:
Pa mas informacion encuanto e Deportenan ariba menciona por acudi na e persona di contacto. Fundacion Movemiento ta bida ta gradici Cede Aruba, Ministerio di Adulto Mayor y Ministerio di Deporte pa nan cotribucion valioso pa asina e weganan tuma luga anualmente. Alabes ta recorda tur adulto mayor pa keda pendiente pa
mas informacion riba nos pagina di fb. . (Ariba portret por wak un team di Volleybal)
FORTALEZA PA FAMIA Scirbi pa Pastor Marcel Balootje.
E AMOR DI DIOS TA TUR COS PA NOS
Abo a pensa nunca cuanto Dios ta stima bo? Y cuanto abo ta stima Dios?. E ta parce manera un wega pero e amor di Dios ta maraviyoso pa nos tur, yen di compasion y misericordia.
For di ora nos lanta mainta te ora anochi sera Dios ta cuida nos, E ta duna nos bida y rosea na abundancia, cu nos por anda tur caminda cu confiansa, sin miedo di nada of den un momento of otro nos por kita cay, pasobra e man di Dios ta sostene nos.
Ta solamente Dios por duna nos e gran speransa di bida na abundancia y bida eterna.Y no solamente esaki,ma nos ta regosiha tambe den nos tribulacion, sabiendo cu tribulacion ta produci perserverancia , perserverancia karakter, y karakter speransa, speransa no ta desapunta, pasobra e amor di Dios a wordo drama den nos curason door di Spirito Santo, Kende a wordo duna na nos.( Romanonan 5:5).
Si nos wak e comportacion di hende, y nos compare cu e amor di Dios, nos tin cu keda keto, y yora amargamente con hende trata Dios. Cada bes cu hende ta rebeldia y rechasa Dios, lanta contra Dios manera nan no sa ken Dios ta , y nan ta lubida ken ta doño di nan bida, y ta usa palabranan di rebeldia y rechaso completo contra Dios,
Actitud di hende a bira completamente orguyoso y materialista, buscando e placa y diberticion prome cu tur cos y solamente den momento nan di malesa, necesidad of tristesa ta menciona nomber di Dios.
Wak con hende a cohe e berdad di Dios cambie den un mentira, tur dia nos mester confronta un trosemento di berdad extraordinario riba e mundo aki, cual hende ta comete y defende, y no kier arepenti cu nan ta den un eror.
Dios ta hustu, puro, y berdadero, y no kier pa ningun bay perdi ma pa tur yega na conocemento di e berdad, ora hende desvia for di caminda di Dios, Dios ta duna oportunidad pa bolbe bek.
Ma Dios a demostra Su mes amor pa cu nos den esaki, cu tempo nos tabata pecador ainda,Cristo a muri pa
nos.
Cristo Hesus ta e unico mediador entre Dios y hende, ningun hende por yega serca e tata si no ta pa medio di e Yiu,
Mescos cu e Tata a stima Mi , Ami tambe a stima boso,keda den Mi amor.( Juan 15:9).
Si boso keda den Mi y Mi palabranan keda den boso,pidi tur loke boso kier,y e esaki lo wordo haci pa boso.( Juan 15:7).
Stimanan , laga nos stima otro, pasobra amor ta bin di Dios, y cu tur cu ta stima ta
naci di Dios y conoce Dios. Esun cu no ta stima no conoce Dios, pasobra Dios ta Amor.( 1 Juan 4:7-8).
Pasobra ta serca Bo e fuente di bida ta, den Bo lus nos ta mira lus.( Salmo 36:9).
Tur hende mester realisa, cu den Señor nos tin tur cos, leu for di Señor nos no tin nada.
Ta tempo pa tur hende recorda cu tur rudia mester dobla y tur lenga confesa cu Cristo Hesus ta Señor pa Gloria di Dios Tata, y esun cu tin E Yiu tin e Tata.
E palabra ta fuerte pero nos tur tin cu recorda locual ta
para scirbi: Esun cu kere den eYiu tin bida eterno, ma esun cu no obedece e Yiu lo no mira bida,ma e furia di Dios lo keda riba dje.( Juan 3:36).
Ta un biaha so un hende ta biba, y mihor cos ta pa nos biba pa Dios.
“Señor ta mi wardador, mi’n tin falta di nada
Den cunucu di yerba berde e ta ponemi sosega.
E ta hibami na awa trankil,
Pa mi bolbe haña forsa”.
Salmo: 23
A bai laga nos, esposa, mama, wela, bisa wela stima
Sylvia Dabian-Lampe
Mihor conoci como: “Sira”
*31-07-1939 – †03-08-2024
Ex empleada manager di Drive Inn theater
Na nomber di:
Su casa: Andres ‘Belin’ Dabian
Yiunan: Marvel y Enrique Vilchez
Amira y Tito Luydens
Debby Dabian
Gina y Michel Blonk
Nietonan: Marange y Barry Krouwel
Angel Vilchez
Ismaël y Marian Vilchez- Delissen
Sierra Luydens
Renell Luydens y Lieke Aerts
Richinel Luydens y Lizzy van Hout
Shannon Blonk y Michan Galekop
Marisa Blonk
Justine Blonk y Rutger van Velzen
Bisanieto/a: Mia y Sam Krouwel
Kymora Toppin y Lou mae Luydens
Abby Luydens
Jomar,Siegmar y Igmar Schwengle
Ruman: †Pedro y Maria Willems
Siegfried y Marisol Schwengle-Simon
† Petrus ‘Shon Pe’ Lampe y Silvia Wout
Swa y Cuña: †Elma Dabian
†Theodor ‘Doty’ Dabian
Sonia Geerman-Dabian
Lucindo ‘Lu’ y Carmen Dabian
†Pedro ‘Rufo’ Dabian
†Greta Dabian
Ayudante: Ethlijn Servud, Miladis Miranda-Ochoa
Demas famia: Lampe, Dabian, Vilchez, Luydens, Blonk, Krouwel, Schwengle, Simon, Toppin, Delissen, Van Hout, Aerts, van Velzen, Galekop, Geerman, Willems, Flanegin, Wout, Alberts, Kransen, bisiña y amistadnan
Ex colega nan di Drive Inn Theater y Meta Corp
Disculpa nos si den nos tristesa nos por a lubida un famia.
Acto di intiero lo tuma lugar diabierna 9 di augustus 2024 di 9:00 pa 11:00 a.m na Aurora Funeral Home. E resto mortal lo bay Santana Catolico na Santa Cruz.
Despues di entiero nos no por tuma condolencia na cas.
Un feliz siman yena di bendicion, gracia, amor y paz di Señor
El a hisa su cara na shelo y a gradici Dios. (Mateo 14,19) Rumannan nos tur conoce kico ta nifica un situacion basta preta p.e. un ocasion den cual nos recursonan ta hopi limita. Kiermen si nos ta confia solamente riba nos capacidad of nos recursonan nos lo keda desampara. Pero Hesus si por dirigi e situacionnan aki. Ta trata di cuanto hende? Nos no sa, pasobra e cifranan ta simbolico.
Den Bijbel ”diesdos” ta mustra nos riba e diesdos tribonan di Israel. E diesdos macutonan cu e pida pannan cu a resta ta mustra nos riba e diesdos tribonan di Hesus su Israel nobo. E manera cu Hesus a tuma e pan y a bendicion’e lo mester recorda tur Cristian riba nos celebracion di Eucaristia. E fiesta aki den aire liber ta un prefiguracion di nos Eucaristia, cu Hesus mes meymey di su pueblo. Den e revelacion biblico e cuminda ta expresa e bida cu Dios ta duna su pueblo.
E mana cu e pueblo a come despues di a sali for di Egipto y awa cu nan a bebe na Horeb y hopi otro realidadnan smbolico ta un prefiguracion di e don cu ta sali for di boca di Dios loke a keda cumpli den Hesucristo.
Oracion: Mi Señor y mi Dios, gloria na Bo Señor Hesus. Amen
