Diasabra Maart 12, 2011
Pagina 16
Realidad, Creencia of Imaginacion
Universidad di Aruba ta organiza lectura tocante Hipnosis STA. CRUZ -- Otro siman diarazon, dia 16 di maart 2011 pa 7:30 anochi Universidad di Aruba lo organiza un lectura tocante Hipnosis. Aunke ta asocia e palabra Hipnosis tin biaha cu show y cu lo inexplicabel, realidad ta cu mayoria hende tin un concepto eroneo di Hipnosis, particularmente Hipnosis clinico (hipnoterapia). Hipnosis clinico a yuda miyones di hende stop di huma, perde peso, reduci tension y drecha nan calidad di bida. E asociacion British Medical Association (BMA) y American Medical a aproba e uso di Hipnosis clinico den añanan 1950 y mas di 600 articulo tocante di Hipnosis ta aparece riba e website di e prestigioso National Institute of Health, un di centronan di investigacion medico mas prominente na mundo. Hipnosis ta estado natural eleva di concentracion. Simplemente bisa, Hipnosis ta ora bo concentra riba un solo cos. Cu Hipnosis bo ta keda bao di control di bo selectividad, bo forza di voluntad (willpower) y tur bo facultadnan y por scucha, waak, sinti, hole, purba y papia. En realidad bao di hipnosis bo tin mas control di bo facultadnan. Cu Hipnosis e curpa y e mente ta keda influencia
di forma igual y traha den forma harmonioso. Aunke cada hende ta reacciona diferente riba e sugerencianan, e ta un forma placentero y influenciabel cu ta permiti efecto masha positivo riba e mente consciente y subconsciente. Door cu bo ta emocionalmente separa di e tema, bo por experencie na diferente nivel. Si e sugerencia ta na bo agrado y ta emocionalmente y moralmente rasonabel pa bo, lo bo acept’e, apesar di e hecho cu bao di circunstancianan ordinario lo bo consider’e un sugerencia imposibel. Esaki ta permiti resultado excelente y ta yuda bo haci e cambionan cual bo tin basta tempo ta purba logra. Orador ta Eddy Oduber kende recientemente di forma exitoso a logra su titulo di Certified Hipnosis
Instructor for di e National Guild of Hypnotists (NGH). NGH ta un organisacion Americano cu mas di 10,000 miembro den 71 pais. Solamente 3 otro hipnotista di nacionalidad Hulandes tin e cualificacion como instructor certifica di e National Guild of Hypnotists. Eddy ta director di Aruba Hipnosis Center cu ta un centro pa Stop di Huma y tambe ta presenta e seminario “The Amazing Secrets of Your MindS”, cual ta permiti e participantenan identifica e podernan invisibel y ta duna nan e hermentnan cu ta permiti nan haci cambio significante den nan bida. E seminario ya tabatin varios cien participante cu a keda sumamente impresiona cu e informacion. E lectura ta den Aula di Universidad di Aruba na J.E. Irausquinplein 4, e idioma lo ta Ingles y entrada ta liber.
CAMBIO DI HORARIO DEN PAGO DI BIJSTAND STA. CRUZ -- Departamento di Asunto Social pa medio di esaki ta informa na su clientenan di bijstand cu awe ta paga bijstand for di 10’or di mainta te cu 2’or di merdia esaki debi na un situacion fuera di alcanz’e di Postkantoor. DAS ta desea di evita inconviniencia pa e cliente cu di custumber ta presente di 6’or di mainta na un di e hulpbestuurskantoornan. Un peticion ta bay na comunidad henter pa coopera y pasa e informacion aki den caso bo conoce un cliente di DAS.
RBC/RBTT ta lanza programanan pa trabaonan voluntario di su empleadonan pa aña 2011
STA. CRUZ -- Como un adelanto riba su siman di trabao voluntario cu lo tuma lugar den luna di April proximo, RBC y RBTT a lanza nan ‘Employee Volunteer Programmes’ pa aña 2011, dunando asina aproximadamente 79,000 di su empleadonan rond mundo oportunidad pa gana ‘toelage’ pa e instancianan caricativo di nan escogencia. Volunteer Week (Siman di Voluntario) ta tuma lugar di 10 pa 16 di April den tur hurisdiccion caminda RBC y RBTT ta opera. Empleadonan di RBC y RBTT por gana grants pa sostene e instancianan caricativo di nan escogencia atraves di Community Spirit Awards Employee Volunteer Grant Programme y Day of Service Grant Award Programme di RBC/ RBTT. “RBC y RBTT a desaroya e programanan aki pa apoya trabaonan voluntario di su empleadonan como parti di nos compromiso grandi di envolvimento cu comunidad y responsabilidad colectivo,” Andre Roberts, Head, Corporate Communications & Brand, pa RBC y RBTT den Caribe a bisa.
“E programanan ta acomoda e forma di biba di nos empleadonan y ta sostene empleadonan cu ya caba ta activo haciendo trabaonan voluntario of ta buscando formanan pa cuminsa realiza trabaonan voluntario, sea individual of como parti di un team.” Empleadonan cu sobresali den liderazgo y dedicacion na nan comunidadnan ta eligibel pa Community Spirit Awards, mientras cu Employee Volunteer Grant Programme ta pa duna muestra di aprecio na empleadonan cu a realiza mas di 40 ora di trabao voluntario den un aña. RBC/RBTT Day of Service Grant ta duna sosten na teamnan cu ta haci trabao voluntario despues di ora di trabao riba cualkier dia den luna di April. E programanan ta pa empleadonan di RBC rond mundo, incluyendo esnan di cualkier un di e 19 hurisdiccionnan caminda RBC/RBTT ta opera den Caribe. Lo anuncia e ganadornan rond mundo durante di Volunteer Week, cu e ganadornan ricibiendo certificado di participacion y un ‘toelage’ pa e organizacion di nan escogencia.