DICT NAGPADANGAT OG 25 KA LAPTOPS SA AGUSAN DEL NORTE

Mosuma sa 25 ka laptops ang gi-turn over sa Department of Information and Communications Technology (DICT) ubos sa proyektong ICT Literacy and Competency Development Bureau (ILCDB) ngadto sa probinsya sa Agusan del Norte sa usa ka seremonya nga gihimo sa Provincial Capitol, Butuan City adtong Pebrero 28. Sa 25 ka laptops, ang 20 sa probinsya ug ang lima niini alang sa syudad sa Cabadbaran.

Tumong sa pagpadangat sa maong mga ICT equipment nga matabangan ang probinysa pag-edukar sa katawhan kalabot sa cyber safe.

Usa na niini nga mahimong aware ug protektahan ang mga estudyante ug tanan nga nagagamit og digital tools sa mga cyber threats sama sa phishing nga magkuha og discreet information, hacking, magpataka og download nga maoy rason nga maguba og dali ang mga laptops o ang gitawag ni Chin Rus Echevarre, focal person sa ILCDB, nga “awareness to capacitate the individuals, with regards the cyber threats”.

“Kini nga mga laptops nga naa sa atung atubangan karon dili lang siya mag end nga paghuman hatag humana dayon. After we formally turn over these laptops to the province of Agusan del Norte, these identified beneficiaries will undergo trainings with regards cyber safe learning,” sumpay ni Echevarre.

Gihisgotan usab ni DICT Undersecretary Engr. Alan Silor kung unsa kadako ang role sa gobyerno ug pag edukar kalabot sa mga cyber threats. “Diri ang role sa gobyerno atong bantayan, ang atong mga kabatanonan, constituents to protect them from being victimized by cybercrimes and other cyber threats,” ingon ni Silor.

Sa maong suporta sa DICT mapasalamaton kaayo si Gob. Dale B. Corvera.

“I am very happy that Agusan del Norte was chosen nga recipient ani nga laptops because kini nga mga laptop will enhance the capacity and capability sa mga recipients ani unya. Mosugot ta ug sa dili halos tanan sector nagkinahanglan na niini,” sumala sa gobernador.

Mitambong usab sa maong kalihukan sila si DICT Regional Director Leo Ugto, Board Member Erwin Dano, ang Committee Chair on ICT, Atty. Albert Cong isip representante ni Mayor Judy Chin Amante sa Cabadbaran, uban pang mga Sangguniang Panlalawigan Members, mga hepe sa kapitolyo ug uban pa.(Shena Mae Pabia ug Sonny Montilla, LGU-Agusan del Norte/ PIA-Agusan del Norte)

Magtutudlo nga nagserbisyo sa Agusan del Norte og 20-40 ka tuig, gipasidunggan

Gipasidunggan sa Department of Education (DepEd) sa Agusan del Norte niadtong Pebrero 24 ang 250 ka mga magtutudlo sa probinsya nga nakaserbisyo na ug 20, 30 ug 40 ka tuig.

Sa usa ka kalihukan nga gihimo sa E & G Convention Center, personal nga gipadangat ang award nga nag-apil og cash og plaque of appreciation sa tagsatagsa ka magtutudlo nila ni Gob. Dale B. Corvera, ni Ruth Jugao nga nagrepresenta kang Kong. Angel AmanteMatba, Schools Division Superintendent Lorenzo Macasocol, Assistant Schools Division Superintendent Emma Love Sudario ug uban pang mga opisyales sa DepEd-Agusan del Norte.

Sumala pa kang Gob. Corvera importante kaayo ang maong pagila sa kakugi sa mga magtutudlo tungod kay magsilbi kining inspirasyon kanila aron ihatag ang de kalidad nga serbisyo.

Alang kang Gob. Corvera daku ang kabahinan sa mga magtutudlo aron mahimong mahinungdanon ang kaugmaon sa mga kabatan-onan, dili lamang sa probinsya apan lakip na sa tibuok nasud.

Matud pa ni Macasocol nga himuon sa DepEd ang maong kalihukan matag tuig aron mas madasig pa ang mga magtutudlo nga mohatag og kalidad nga serbisyong pagtudlo alang sa mga kabatanonan sa probinsya. (Karen Kie Decamotan, LGU-Agusan del Norte/ PIA-Agusan del Norte)