CASH FOR WORK DIHA SA PAGPANANUM OG KAHOY HIMOON SA RTR

Gipahigayun niadtong Hunyo 24, 2021 ang oryentasyon sa mga benepisyaryo sa cashfor-work program sa Department of Social Welfare and Development (DSWD) nga giimplementar kaabag ang munisipyo ug ang probinsya sa barangay sa San Antonio, Balangbalang ug sa Tagbongabong, RTR.

Ang maong oryentasyon gitambungan sa mga benepisyaryo, mga opisyal sa barangay nga gipangunahan sa kapitan, personahe sa Department of Social Welfare and Development ning rehiyon ug sa mga personahe sa AGUSAN UP alang sa probinsya.

Kining programa kabahin sa tinuig nga cash-for-work program ubos sa Risk Resiliency Program-Climate Change Adaptation and Mitigation sa DSWD.

Mosuma sa 540 ka residente sa RTR ang makabenepisyo niini.

Ubos sa program makatrabaho ang mga benepisyaryo sulod sa napulo (10) ka adlaw ug sweldohan sila og 240 pesos matag adlaw.

Ang mahimong trabaho sa mga benepisyaryo mao ang pagpananum og mga kahoy sama sa fruit trees nga rambutan, durian, santol, mangga ug kahoy nga mahogany. Matud pa sa kapitan sa Barangay San Antonio, daku ang iyang pasalamat sa higayon nga bisan sa pandemya ug kalisud sa panahon karon dakong tabang ning programa sa panginabuhian sa iyang katawhan. Bisan kung pipila lang ka adlaw ang trabaho apan daku kining tabang sa makatrabaho niini ug tabang diha sa pagpabaskug sa kinaiyahan. (Jessa Mindajao ug Nibika Calixtro, LGU Agusan del Norte/PIA Agusan del Norte)